Mariko 4 - Kinyarwanda Bibiliya Ntagatifu

Umugani w’umubibyi

¹ Arongera atangira kwigishiriza ku nkombe y’inyanja. Abantu benshi cyane bamuteranira iruhande, bituma ajya kwicara mu bwato, mu nyanja, naho abantu bose bari imusozi ku nkombe y’inyanja.

² Yabigishaga byinshi avugira mu migani, maze mu nyigisho ze akababwira ati

³ «Nimutege amatwi! Umubibyi yavuye iwe ajya kubiba.

⁴ Nuko igihe abiba, imbuto zimwe zigwa iruhande rw’inzira, inyoni ziraza zirazirya.

⁵ Izindi zigwa mu rubuye, ntizahasanga igitaka cyinshi, nuko zimera vuba, kuko igitaka cyari gike;

⁶ izuba rivuye zirashya, ziruma kuko zitari zifite imizi.

⁷ Izindi zigwa mu mahwa, amahwa arakura, arazipfukirana, nuko ntizagira icyo zera.

⁸ Naho izindi zose zigwa mu gitaka cyiza, zo zirakura ziragara, zera imbuto, imwe ikera mirongo itatu, indi mirongo itandatu, indi ijana.»

⁹ Nuko Yezu aravuga ati «Ufite amatwi yo kumva, niyumve!»

Igituma Yezu avugira mu migani

¹⁰ Igihe bari basigaye bonyine, ba cumi na babiri n’abandi bari kumwe na we, bamusiganuza iby’imigani.

¹¹ Arababwira ati «Mwebweho mwahawe kumenya amabanga y’Ingoma y’Imana, naho bariya bo hanze, byose bibabera urujijo,

¹² ’ku buryo bitegereza ariko ntibabone, bakumva ariko ntibasobanukirwe, kugira ngo badahinduka bagakizwa.’

¹³ Nuko yungamo ati «Nta bwo mwumva uwo mugani! Ubwo se iyindi migani yose, muzayumva mute?»

Yezu asobanura umugani w’umubibyi

¹⁴ Umubibyi, ni Ijambo ry’Imana abiba.

¹⁵ Hari rero abari iruhande rw’inzira aho iryo Jambo ribibwa. Bamara kuryumva, ako kanya Sekibi akaza, akabakuramo iryo jambo ryababibwemo.

¹⁶ Abandi ni abakirira imbuto nko mu rubuye; iyo bamaze kumva Ijambo, ako kanya baryakirana ibyishimo,

¹⁷ ariko ntirishore imizi muri bo, bakarimarana igihe gito; hatera amagorwa cyangwa batotezwa bahorwa iryo Jambo, bagahita bagwa.

¹⁸ Abandi ni abakirira imbuto nko mu mahwa: bumva Ijambo,

¹⁹ ariko imihihibikano y’isi, n’ibishuko by’ubukungu, n’ibindi byifuzo bibi bibatwara umutima, bigapfukirana iryo Jambo, ntiryere imbuto na busa.

²⁰ Naho abakirira imbuto nko mu gitaka cyiza, ni abumva Ijambo bakaryakira, bakera imbuto, umwe mirongo itatu, undi mirongo itandatu, undi ijana.»

Umugani w’itara n’uw’igipimisho

²¹ Yezu arababaza ati «Harya bazanira itara kugira ngo baryubikeho icyibo cyangwa ngo barishyire mu nsi y’urutara? Si ukugira ngo rishyirwe ku gitereko cyaryo?

²² Koko rero, nta cyahishwe kitazahishurwa, nta n’ibanga rizahera ritamenyekanye!»

²³ Ufite amatwi yo kumva, niyumve!».

²⁴ Arongera aravuga ati «Mwitondere ibyo mwumva. Igipimisho muzageresha, ni cyo namwe muzagererwamo, ndetse muzarengerezwaho.

²⁵ Kuko ufite byinshi azongererwa, naho ufite bike na byo akazabyakwa.»

Umugani w’imbuto ikura ku bwayo

²⁶ Na none aravuga ati «Iby’Ingoma y’Imana byagereranywa n’umuntu watera imbuto mu gitaka.

²⁷ Yasinzira cyangwa yaba maso, haba nijoro cyangwa ku manywa, izo mbuto ntizihwema kumera no gukura, we atazi uko bigenda.

²⁸ Igitaka ku bwacyo kibanza kumera ingemwe, hanyuma zikagengarara, hanyuma imbuto z’ingano zikuzura mu mahundo.

²⁹ Izo mbuto zamara kwera, ako kanya bakazitemesha urusaruzo, kuko imyaka iba yeze.»

Umugani w’imbuto ya sinapisi

³⁰ Arongera ati «Iby’Ingoma y’Imana twabigereranya n’iki, cyangwa se twabivuga mu wuhe mugani?

³¹ Bimeze nk’imbuto ya sinapisi ibibwa mu gitaka, ari ntoya kurusha imbuto zose ziba ku isi;

³² ariko yamara kubibwa, igakura ikaruta ibindi bihingwa byose, ikagira amashami manini, bigatuma inyoni zo mu kirere ziza kwarika mu gicucu cyayo.»

Umwanzuro w’imigani yose

³³ Nguko uko yabigishaga Ijambo ry’Imana, abacira imigani myinshi, iringaniye n’ibyo bashoboraga kumva.

³⁴ Kandi ntiyigishaga adaciye imigani, ariko abigishwa be akabasobanurira byose biherereye.

Yezu acubya umuhengeri

³⁵ Uwo munsi nyine, umugoroba ukubye, arababwira ati «Twambuke dufate hakurya.»

³⁶ Nuko basiga rubanda aho, bamujyana muri bwa bwato yahozemo, andi mato aramukurikira.

³⁷ Ni bwo haje umuhengeri mwinshi, maze imivumba irenga ubwato, butangira gusendera.

³⁸ Yezu we yari ku irango asinziriye ku musego. Bamukangura bamubwira bati

³⁹ «Mwigisha, nta cyo bigutwaye ko tugiye gushira?» Nuko arakanguka, akangara umuyaga, abwira inyanja ati «Ceceka! Tuza!» Nuko umuyaga urahosha, maze ituze riba ryose.

⁴⁰ Hanyuma arababwira ati «Icyabateye ubwo bwoba ni iki? Mbese ntimuragira ukwemera?»

⁴¹ Bagira ubwoba bwinshi, barabazanya bati «Uyu yaba ari nde, wumvirwa n’umuyaga n’inyanja?»