Mariko 15 - Kinyarwanda Bibiliya Ntagatifu

Yezu ari imbere ya Pilato

¹ Mu gitondo kare, abatware b’abaherezabitambo bateranira hamwe n’abakuru b’imiryango n’abigishamategeko, mbese abagize inama nkuru bose. Bamaze kuboha Yezu, baramujyana bamushyikiriza Pilato.

² Nuko Pilato aramubaza ati «Mbese uri umwami w’Abayahudi?» Yezu aramusubiza ati «Urabyivugiye.»

³ Abatware b’abaherezabitambo bamurega byinshi.

⁴ Pilato arongera aramubaza ati «Nta cyo usubiza? Ntiwumva ibyo bakurega byose?»

⁵ Yezu ariko ntiyongera kugira icyo asubiza, Pilato biramutangaza cyane.

⁶ Buri munsi mukuru yabarekuriraga imwe mu mfungwa babaga bamusabye.

⁷ Ubwo rero mu buroko hakaba uwitwa Barabasi, wari wafatanywe n’abandi bagome bari biciye umuntu mu myivumbagatanyo.

⁸ Nuko rubanda rurazamuka, batangira gusaba Pilato ngo abagirire uko yabamenyereje.

⁹ Pilato arababaza ati «Murashaka ko mbarekurira umwami w’Abayahudi?»

¹⁰ Yari azi neza ko abaherezabitambo bakuru bari bamutanze babitewe n’ishyari.

¹¹ Ubwo ariko abaherezabitambo bakuru boshya rubanda gusaba ko abarekurira Barabasi.

¹² Pilato arongera arababaza ati «Maze se ngire nte uwo mwita umwami w’Abayahudi?»

¹³ Bo rero batera hejuru bati «Mubambe ku musaraba!»

¹⁴ Pilato arababaza ati «Ikibi yakoze ni ikihe?» Bo rero barushaho gutera hejuru bati «Mubambe ku musaraba!»

¹⁵ Pilato ahitamo gushimisha rubanda, abarekurira Barabasi. Amaze gukubitisha Yezu, aramutanga ngo bajye kumubamba.

Yezu atamirizwa amahwa

¹⁶ Nuko abasirikare bajyana Yezu mu gikari cy’ingoro ya Pilato, maze bakoranya igombaniro ryose.

¹⁷ Bamwambika igishura gitukura, nyuma baboha ikizingo cy’amahwa, bakimushyira ku mutwe.

¹⁸ Nuko batangira kumushungera bavuga bati «Turakuramya, Mwami w’Abayahudi!»

¹⁹ Ubwo bamukubitisha urubingo mu mutwe, bakamuvunderezaho amacandwe, maze bagatera ivi imbere ye byo kumuramya.

²⁰ Bamaze kumukwena batyo, bamwambura igishura gitukura, bamwambika imyambaro ye, baramushorera, bajya kumubamba.

Ibambwa rya Yezu

²¹ Mu nzira, bafatirana Simoni w’i Sireni, se wa Alegisanderi na Rufusi, wiviraga mu murima, ngo amutwaze umusaraba.

²² Nuko bajyana Yezu ahantu hitwa Gologota, bikavuga ku Kibihanga.

²³ Bamuha divayi ivanze n’indurwe ngo abinywe, ariko ntiyabyakira.

²⁴ Nuko baramubamba. Hanyuma bigabanya imyambaro ye, bayikoreraho ubufindo ngo bamenye icyo buri wese yegukana.

²⁵ Bamubambye ari ku isaha ya gatatu.

²⁶ Hari kandi urubaho rwanditseho icyo azize, ngo «Umwami w’Abayahudi».

²⁷ Maze bamubambana n’abagome babiri, umwe iburyo undi ibumoso bwe. (28 )

²⁹ Abahisi bakamutuka bazunguza umutwe kandi bavuga ngo «Ngaho da! Wowe usenya Ingoro y’Imana maze ukongera ukayubaka mu minsi itatu,

³⁰ ikize ubwawe, wimanure ku musaraba!»

³¹ Abatware b’abaherezabitambo hamwe n’abigishamategeko bamushinyaguriraga bavuga ngo «Yakijije abandi, none yananiwe kwikiza ubwe!

³² Kristu, Umwami wa Israheli, namanuke ku musaraba ubu ngubu, kugira ngo tubone maze twemere!» Ndetse n’abari babambanywe na we, na bo baramutukaga.

Urupfu rwa Yezu

³³ Bigejeje ku isaha ya gatandatu, umwijima ucura ku isi yose, kugeza ku isaha ya cyenda.

³⁴ Nuko ku isaha ya cyenda, Yezu avuga mu ijwi riranguruye ati «Eloyi, Eloyi, lama sabaktani?» bivuga ngo «Mana yanjye, Mana yanjye, icyatumye untererana ni iki?»

³⁵ Bamwe mu bari aho bamwumvise, baravuga bati «Dore aratabaza Eliya!»

³⁶ Umwe ariruka, avika icyangwe muri divayi irura, maze agitunga ku rubingo, aramuhereza ngo anywe, avuga ati «Nimureke turebe niba Eliya aza kumumanura.»

³⁷ Yezu arangurura ijwi cyane, nuko araca.

³⁸ Maze umubambiko wo mu Ngoro y’Imana utanyukamo kabiri, kuva hejuru kugeza hasi.

³⁹ Nuko umutegeka w’abasirikare, wari uhagaze imbere ye, abonye ko aciye atyo, aravuga ati «Koko, uyu yari umwana w’Imana!»

⁴⁰ Hari n’abagore bareberaga kure. Barimo Mariya Madalena, na Mariya nyina wa Yakobo muto na Yoze, na Salome,

⁴¹ bajyaga bakurikira Yezu kandi bakamukorera igihe yari mu Galileya. Bari kumwe n’abandi bagore benshi bari barazamukanye na we ajya i Yeruzalemu.

Ihambwa rya Yezu

⁴² Bugorobye, kuko hari ku mwiteguro w’isabato,

⁴³ Yozefu w’i Arimatiya, umujyanama w’umunyacyubahiro, wari utegereje na we Ingoma y’Imana, ashirika ubwoba aza kwa Pilato, maze asaba umurambo wa Yezu.

⁴⁴ Pilato atangazwa n’uko yaba yapfuye, ahamagaza umutegeka w’abasirikare, amubaza niba hashize igihe apfuye.

⁴⁵ Amaze kubyemezwa n’uwo mutegeka, yemerera Yozefu kujyana umurambo.

⁴⁶ Yozefu, ngo amare kugura umwenda, amanura umurambo wa Yezu ku musaraba, awuzingiraho uwo mwenda, maze awushyingura mu mva yari yacukuwe mu rutare. Hanyuma ahirikira ibuye ku muryango w’imva.

⁴⁷ Nuko Mariya Madalena na Mariya nyina wa Yoze bitegereza aho bamushyize.