Mariko 13 - Kinyarwanda Bibiliya Ntagatifu

Yezu ahanura ko Ingoro izasenywa

¹ Yezu asohotse mu Ngoro, umwe mu bigishwa be aramubwira ati «Mwigisha, irebere nawe: mbega amabuye manini! Mbega amazu meza!»

² Yezu aramubwira ati «Ntureba ariya mazu ukuntu asa? Nkubwiye ko nta buye rizasigara rigeretse ku rindi, yose azasenyuka.»

³ Nuko igihe yari yicaye ku musozi w’Imizeti, ahateganye n’Ingoro, Petero na Yakobo na Yohani na Andereya bamubaza biherereye bati

⁴ «Tubwire igihe ibyo bizabera, n’ikimenyetso kizereka abantu ko ibyo byose bigiye gushira.»

Ibimenyetso bizabanziriza ayo makuba

⁵ Yezu ni ko guterura ati «Muramenye ntihazagire ubayobya,

⁶ kuko hazaza benshi biyitirira izina ryanjye, bavuga bati ’Ni jye Kristu’, maze bayobye abantu benshi.

⁷ Nimwumva bavuga intambara cyangwa impuha zayo, ntimuzakuke umutima. Ibyo bigomba kuba, ariko ntibizaba ari byo herezo.

⁸ Igihugu kizahagurukira ikindi, ingoma ishyamirane n’indi, kandi hamwe hazaba imitingito y’isi, ahandi hatere inzara. Bizamera nk’intangiriro y’ububabare bw’umugore wenda kubyara.

⁹ Namwe ubwanyu, muramenye! Bazabagabiza inkiko, mukubitirwe mu masengero. Bazabahagarika imbere y’abami n’abandi bategetsi, ari jye babaziza, bityo muzambere abagabo imbere yabo.

¹⁰ Icyakora, Inkuru Nziza izabanza yogezwe mu mahanga yose.

¹¹ Maze igihe bazaba babajyanye kubatanga, ntimuzabunze imitima mwibaza icyo muzavuga. Muzavuge ikibajemo muri uwo mwanya, kuko atari mwe muzaba muvuga, ahubwo azaba ari Roho Mutagatifu ubavugiramo.

¹² Umuvandimwe azicisha umuvandimwe we, umubyeyi yicishe umwana we, abana na bo bazahinduka ababyeyi babicishe.

¹³ Kandi muzangwa n’abantu bose, muzira izina ryanjye; ariko uzakomera kugeza ku ndunduro, uwo nguwo azarokorwa.

Amagorwa ya Yeruzalemu

¹⁴ Nimubona ’ishyano ry’icyorezo’ riri aho ritagomba kuba — usoma abyumve neza! — icyo gihe abazaba bari muri Yudeya bazahungire mu misozi;

¹⁵ uzaba ari hejuru y’inzu, ntazamanuke ku nzu ye ngo yinjiremo, maze agire icyo avanamo;

¹⁶ kandi uzaba ari mu murima ntazahindukire ngo ajye gushaka igishura cye imuhira.

¹⁷ Hagowe abazaba batwite n’abazaba bonsa muri iyo minsi!

¹⁸ Nimusabe kugira ngo ibyo byose bitazaba ari mu itumba.

¹⁹ Kuko muri iyo minsi hazaba amakuba atigeze abaho, kuva mu ntangiriro Imana irema isi kugeza ubu ngubu, kandi nta n’ubwo azongera kubaho.

²⁰ Kandi iyo Nyagasani atagabanya iyo minsi, nta muntu wajyaga kuzarokoka; ariko kubera intore yatoye, yagabanyije iyo minsi.

²¹ Ubwo nihagira ubabwira ati ’Dore Kristu ari hano!’ cyangwa ’Ari hariya!’ ntimuzamwemere.

²² Kuko hazaduka abiyita Kristu, haze n’abiyita abahanuzi berekana ibimenyetso, bakore n’ibitangaza byo kuyobya n’abatowe, iyaba byashobokaga.

²³ Naho mwebwe muritonde, dore ndababuriye kuri byose.

Amaza y’Umwana w’umuntu

²⁴ Muri iyo minsi kandi, nyuma y’icyo cyorezo, izuba rizacura umwijima, ukwezi ntikuzamurika,

²⁵ inyenyeri zizahanuka ku ijuru, maze ibikomeye byo mu ijuru bihungabane.

²⁶ Ni bwo bazabona Umwana w’umuntu aje mu bicu, afite ububasha bukomeye n’ikuzo ryinshi.

²⁷ Ubwo rero azohereza abamalayika mu mpande enye z’isi, aho isi iherera kugeza ku mpera y’ijuru, maze akoranye intore ze.

Ikigereranyo ku giti cy’umutini

²⁸ Nimugereranye muhereye ku giti cy’umutini maze mwumve: iyo amashami yacyo amaze gutoha akameraho amababi, mumenyeraho ko igihe cy’imbuto cyegereje.

²⁹ Namwe rero nimubona ibyo bibaye, muzamenye ko Umwana w’umuntu ari hafi, ndetse ko ageze ku miryango yanyu.

³⁰ Ndababwira ukuri, iki gisekuru ntikizahita ibyo byose bitabaye.

³¹ Ijuru n’isi bizashira, ariko amagambo yanjye nta bwo azashira.

³² Nyamara uwo munsi cyangwa iyo saha, nta we ubizi, habe n’abamalayika bo mu ijuru, habe ndetse na Mwana; bizwi n’Imana Data wenyine.

Murabe maso

³³ Mwitonde, mube maso, kuko mutazi igihe bizabera.

³⁴ Bizaba bimeze nk’umuntu wagiye mu rugendo, agashinga abagaragu be urugo rwe, akagenera buri wese umurimo we, naho umunyarugi akamutegeka kuba maso.

³⁵ Murabe maso rero kuko mutazi igihe nyir’urugo azazira, ari ku mugoroba, ari mu gicuku, ari mu nkoko, cyangwa mu gitondo,

³⁶ kugira ngo atazaza abatunguye, agasanga musinziriye.

³⁷ Ibyo mbabwiye, mbibwiye n’abandi bose: Murabe maso!»