Mariko 11 - Kinyarwanda Bibiliya Ntagatifu

Yezu yakirwa i Yeruzalemu nk’umwami

¹ Bagiye kugera i Yeruzalemu, ahagana i Betifage n’i Betaniya, hafi y’umusozi w’Imizeti, Yezu yohereza babiri mu bigishwa be,

² arababwira ati «Nimujye mu ngo ziri imbere yanyu; mukihagera murabona icyana cy’indogobe kiziritse, kitigeze kigira uwo giheka, mukiziture, maze mukinzanire.

³ Nihagira ubabwira ati ’Ibyo mukora ni ibiki?’ musubize muti ’Umwigisha aragikeneye, kandi aracyohereza vuba.’»

⁴ Baragenda, basanga icyana cy’indogobe kiziritse ku irembo iruhande rw’inzira, barakizitura.

⁵ Bamwe mu bari aho ngaho barababwira bati «Ibyo mukora ni ibiki? Kuki muzitura iyo ndogobe?»

⁶ Bo babasubiza uko Yezu yari yababwiye, nuko barabihorera.

⁷ Icyana cy’indogobe bakizanira Yezu, bagisasaho ibishura byabo, acyicaraho.

⁸ Nuko abantu benshi basasa ibishura byabo mu nzira; abandi basasa amashami bari batemye mu mirima.

⁹ Abamugendaga imbere n’abari bamukurikiye barangurura ijwi bati «Hozana! Hasingizwe Uje mu izina rya Nyagasani!

¹⁰ Hasingizwe Ingoma y’umubyeyi wacu Dawudi itugezeho! Hozana, Imana nihabwe impundu mu ijuru!»

¹¹ Nuko Yezu agera i Yeruzalemu, yinjira mu Ngoro y’Imana. Amaze kwitegereza byose hirya no hino, umugoroba ukubye, arasohoka, ajyana na ba Cumi na babiri i Betaniya.

Umutini uteraga imbuto

¹² Bukeye, bahagurutse i Betaniya, Yezu aza gusonza.

¹³ Akiri kure, arabukwa igiti cy’umutini gifite amababi, ajya kureba ko hari imbuto yakibonaho, acyegereye, asanga ni ibibabi bisa, kuko kitari igihe cyacyo cyo kwera.

¹⁴ Abwira icyo giti ati «Ntihakagire umuntu urya imbuto zawe ukundi!» Ubwo abigishwa be baramwumvaga.

Yezu yirukana abacuruzi mu Ngoro y’Imana

¹⁵ Baragenda, bagera i Yeruzalemu. Yezu yinjira mu Ngoro y’Imana, atangira kwirukana abacuruzi n’abaguzi bari mu Ngoro; ahirika ameza y’abavunjaga amafaranga, n’intebe z’abacuruzaga inuma,

¹⁶ kandi abuza abikoreraga imitwaro kwahuranya ikibuga cy’Ingoro.

¹⁷ Nuko abigisha ababwira ati «Mbese ntihanditswe ngo: Inzu yanjye izitwa inzu yo gusengerwamo n’amahanga yose, naho mwebwe mwayigize ubuvumo bw’abambuzi!»

¹⁸ Abatware b’abaherezabitambo n’abigishamategeko ngo babimenye, bashaka ukuntu bamwicisha, ariko bakamutinya, kuko rubanda rwatangariraga inyigisho ze.

¹⁹ Bugorobye, Yezu n’abigishwa be bava mu mugi.

Umutini wumye

²⁰ Mu gitondo bahita, babona wa mutini wumye kugeza mu mizi.

²¹ Petero yibuka ibyabaye, maze abwira Yezu ati «Mwigisha, cya giti wavumye, dore cyumye cyose!»

²² Yezu aramusubiza ati «Nimwemere Imana!

²³ Ndababwira nkomeje ko uwizera Imana ashobora kubwira uriya musozi ati ’Shyiguka aho wirohe mu nyanja’, niyizera adashidikanya ko ibyo avuze biba, bizaba.

²⁴ Ni cyo gituma mbabwira nti ’Icyo musabye cyose musenga, mwizere ko mugihawe, kandi muzagihabwa.’

²⁵ Kandi igihe muhagaze musenga, mujye mubabarira uwo mwaba mufitanye akantu, kugira ngo namwe So wo mu ijuru abababarire ibicumuro byanyu.

²⁶ Naho nimutababarira abandi, na So wo mu ijuru ntazabababarira ibicumuro byanyu.»

Abategetsi babaza Yezu inkomoko y’ububasha bwe

²⁷ Barongera bagaruka i Yeruzalemu. Ubwo Yezu yagendagendaga mu Ngoro y’Imana, abaherezabitambo bakuru, abigishamategeko n’abakuru b’imiryango baramwegera,

²⁸ baramubwira bati «Ibyo ubikoresha bubasha ki? Ni nde waguhaye ubwo bubasha?»

²⁹ Yezu arababwira ati «Reka nanjye ngire icyo mbabaza, kandi munsubize, maze nanjye mbone kubabwira aho ububasha butuma nkora ibyo mubona bukomoka.

³⁰ Batisimu ya Yohani yaturutse mu ijuru cyangwa ku bantu? Nimunsubize!»

³¹ Naho bo baribwira bati «Nituvuga ko yaturutse mu ijuru, aratubwira ati ’Mwabujijwe n’iki kumwemera?’

³² Nituramuka tuvuze ko yaturutse ku bantu, bizatugendekera bite?» Koko rero batinyaga rubanda, kuko bose bahamyaga ko Yohani ari umuhanuzi nyawe.

³³ Nuko basubiza Yezu bati «Ntitubizi.» Yezu na we arababwira ati «Nanjye rero simbabwiye aho nkura ububasha bwo gukora ibyo mubona.»