Luka 7 - Kinyarwanda Bibiliya Ntagatifu

Yezu akiza umugaragu w’umutegeka w’abasirikare

¹ Yezu amaze kubwira rubanda ayo magambo yose, arahaguruka, ajya i Kafarinawumu.

² Hakaba umutware w’abasirikare wari urwaje umugaragu yakundaga, yenda gupfa.

³ Yumvise bavuga Yezu, amutumaho bamwe mu bakuru b’Abayahudi, ngo bamumwingingire aze gukiza umugaragu we.

⁴ Bageze iruhande rwa Yezu bamwinginga bakomeje, baramubwira bati «Uwo muntu akwiye ko wamutabara,

⁵ kuko akunda umuryango wacu, kandi ni we watwubakiye isengero.»

⁶ Nuko Yezu ajyana na bo. Agiye kugera hafi y’urugo, umutware w’abasirikare amutumaho incuti ze ngo zimubwire ziti «Nyagasani, wikwirushya, kuko ndakwiye ko wakwinjira mu nzu yanjye.

⁷ Ni na cyo cyatumye ndatinyuka kugusanga; ahubwo vuga ijambo rimwe gusa, umugaragu wanjye arakira.

⁸ Erega, n’ubwo ndi umuntu utegekwa, nanjye mfite abasirikare ntegeka. Iyo mbwiye umwe nti ’Genda’ aragenda; nabwira undi nti ’Ngwino’ akaza; nabwira n’umugaragu wanjye nti ’Kora iki’ akagikora.»

⁹ Yezu yumvise ayo magambo, aramutangarira cyane; ahindukirira abantu bari bamukurikiye, arababwira ati «Ndababwira ukuri: no muri Israheli nta kwemera gukomeye nk’uku nigeze mpabona.»

¹⁰ Nuko abari batumwe bahindukiye, basanga umugaragu yakize rwose.

Yezu azura umwana w’umupfakazi w’i Nayini

¹¹ Yezu arakomeza ajya mu mugi witwa Nayini. Abigishwa be n’abandi benshi baramukurikira.

¹² Ngo agere hafi y’irembo ry’umugi, ahura n’abahetse umurambo bajya guhamba umuhungu w’ikinege, nyina akaba yari umupfakazi; kandi abantu benshi bo muri uwo mugi bari bamuherekeje.

¹³ Nyagasani amubonye, amugirira impuhwe; aramubwira ati «Wirira.»

¹⁴ Nuko yegera ikiriba, agikoraho, abari bagihetse barahagarara. Aravuga ati «Wa musore we, ndabigutegetse, haguruka!»

¹⁵ Nuko uwari wapfuye areguka, aricara, atangira kuvuga. Yezu amusubiza nyina.

¹⁶ Bose ubwoba burabataha, basingiza Imana bavuga bati «Umuhanuzi ukomeye yaduturutsemo, kandi Imana yasuye umuryango wayo.»

¹⁷ Iyo nkuru isakara muri Yudeya yose, no mu gihugu cyose kiyikikije.

Yohani Batisita yibaza Yezu uwo ari we

¹⁸ Abigishwa ba Yohani baza kumumenyesha ibyabaye byose; nuko ahamagara babiri muri bo,

¹⁹ abatuma kuri Nyagasani kumubaza bati «Mbese uri Wawundi ugomba kuza, cyangwa se dutegereze undi?»

²⁰ Abo bantu basanga Yezu, baramubwira bati «Yohani Batisita yakudutumyeho ngo: Mbese ni wowe Wawundi ugomba kuza, cyangwa se dutegereze undi?»

²¹ Ubwo Yezu akaba arakiza abarwayi benshi, n’abamugaye, n’abahanzweho na roho mbi, agahumura n’impumyi nyinshi.

²² Nuko arabasubiza ati «Nimugende mubwire Yohani ibyo mwabonye n’ibyo mwumvise: dore impumyi zirahumuka, abacumbagira baragenda, ababembe barahumanurwa, ibipfamatwi birumva, abapfuye barazuka, n’abakene barabwirwa Inkuru Nziza.

²³ Kandi hahirwa utazatsitara ku mpamvu yanjye.»

Yezu arata Yohani Batisita

²⁴ Intumwa za Yohani zimaze kugenda, Yezu atangira kubaza rubanda ibyerekeye Yohani, ati «Mwagiye kureba iki mu butayu? Urubingo ruhungabanywa n’umuyaga?

²⁵ Ariko se mwagiye kureba iki? Umuntu wambaye imyenda y’agatangaza? Dore, abambaye ibishashagira bakiberaho mu mudamararo, batuye mu ngoro z’abami.

²⁶ Nk’ubwo se, mwagiye kureba iki? Umuhanuzi se? Koko rero ndabibabwiye, ndetse atambutse umuhanuzi.

²⁷ Ni we banditseho ngo ’Dore nohereje intumwa yanjye imbere yawe, kugira ngo izagutegurire inzira.’

²⁸ Mbabwiye kandi ko mu babyawe n’umugore, nta we uruta Yohani; nyamara umuto mu Ngoma y’Imana aramuruta.

²⁹ Nuko rubanda rwose rwamwumvaga, ndetse n’abasoresha, bakuza Imana bayigarukira, banahabwa batisimu ya Yohani;

³⁰ Abafarizayi n’abigishamategeko, bo bahinyura icyo Imana yabashakagaho, banga kubatizwa na we.»

Uko abantu bakiriye Yohani Batisita na Yezu

³¹ Yezu yungamo ati «Mbese abantu b’iki gihe nabagereranya na nde? Bameze nka nde ? Bameze nk’abana bicaye ku kibuga,

³² bamwe babwira abandi bati ’Twavugije umwirongi maze ntimwabyina! Duteye indirimbo z’amaganya, ntimwarira!’

³³ Koko rero Yohani Batisita yaje atarya umugati, kandi atanywa divayi, muravuga muti ’Yahanzweho !’

³⁴ Naho Umwana w’umuntu aza arya kandi anywa, muravuga muti ’Ni igisambo, ni umusinzi, ni incuti y’abasoresha n’abanyabyaha !’

³⁵ Nyamara ubuhanga bugaragazwa n’ibikorwa byabwo.»

Yezu ababarira umugore w’umunyabyaha

³⁶ Nuko umwe mu Bafarizayi, atumira Yezu ngo basangire; yinjira iwe, ajya ku meza.

³⁷ Maze haza umugore wari ihabara mu mugi. Yari yamenye ko Yezu ari ku meza, mu nzu y’uwo Mufarizayi, aza afite urweso rurimo umubavu.

³⁸ Nuko aturuka inyuma ya Yezu, yunama ku birenge bye arira. Amarira atonyangira ku birenge bya Yezu, abihanaguza imisatsi ye, agumya kubisoma, anabisiga umubavu.

³⁹ Umufarizayi wari wamutumiye, ngo abibone, aribwira ati «Uyu muntu, iyo aba umuhanuzi koko, aba yamenye uyu mugore umukora uwo ari we, n’icyo ari cyo: ko ari umunyabyaha.»

⁴⁰ Yezu araterura, aramubwira ati «Simoni, mfite icyo nkubwira.» Undi aravuga ati «Mbwira, Mwigisha.»

⁴¹ Yezu ati «Umuntu yari afite abantu babiri bamurimo umwenda; umwe yari amurimo amadenari magana atanu, undi mirongo itanu.

⁴² Babuze icyo bishyura, abarekera uwo mwenda. Muri abo bombi, ni uwuhe uzarusha undi kumukunda?»

⁴³ Simoni arasubiza ati «Ndasanga ari uwarekewe umwenda munini.» Yezu aramubwira ati «Ushubije neza.»

⁴⁴ Nuko ahindukirira wa mugore, abwira Simoni ati «Urabona uyu mugore? Ninjiye mu nzu yawe, ntiwansuka amazi ku birenge; naho we, yuhagije ibirenge byanjye amarira ye, maze abihanaguza imisatsi ye.

⁴⁵ Ntiwampobeye unsoma; naho we, kuva aho yinjiriye mu nzu, ntiyahwemye kunsoma ibirenge.

⁴⁶ Ntiwansize amavuta ahumura mu mutwe; naho we, yansize umubavu ku birenge.

⁴⁷ Ni cyo gitumye nkubwira nti: ibyaha bye byose uko bingana arabibabariwe, kubera urukundo rwe rwinshi. Naho ubabariwe bike, akunda buke.»

⁴⁸ Nuko Yezu abwira uwo mugore ati «Ibyaha byawe birakijijwe.»

⁴⁹ Abari kumwe na we ku meza batangira kwibaza bati «Uyu ni muntu ki ugeza n’aho gukiza ibyaha?»

⁵⁰ Nuko Yezu abwira wa mugore ati «Ukwemera kwawe kuragukijije; genda amahoro.»