Luka 22 - Kinyarwanda Bibiliya Ntagatifu

Yezu bamugambanira

¹ Umunsi mukuru wo kurya imigati idasembuye, witwa Pasika, wari wegereje.

² Nuko abatware b’abaherezabitambo n’abigishamategeko bashakaga aho bamuturuka ngo bamwice, ariko bagatinya rubanda.

³ Nuko Sekibi itaha muri Yuda Isikariyoti, umwe muri ba Cumi na babiri.

⁴ Aragenda ajya kubonana n’abatware b’abaherezabitambo n’abakuru b’abarinzi b’Ingoro, ngo barebere hamwe uko yamubagabiza.

⁵ Ngo babyumve barishima, maze bamusezeranya kuzamuha ikiguzi.

⁶ Aremera, asigara ashaka uko yamutanga, rubanda batabizi.

Itegura rya Pasika

⁷ Nuko umunsi mukuru w’imigati idasembuye, ari na wo bagombaga kubagaho intama za Pasika, uragera.

⁸ Yezu atuma Petero na Yohani, arababwira ati «Nimujye kudutegurira Pasika kugira ngo tuyirye.»

⁹ Baramubaza bati «Urashaka ko tujya kuyitegurira hehe?»

¹⁰ Arabasubiza ati «Mukigera mu murwa, murahura n’umuntu wikoreye ikibindi cy’amazi. Mumukurikire mu nzu ari bwinjiremo,

¹¹ maze mubwire nyir’urugo, muti ’Umwigisha aravuze ngo: Icyumba cyanjye nza kuriramo Pasika hamwe n’abigishwa banjye kiri hehe?’

¹² Ari bubereke mu nzu yo hejuru icyumba kigari, gishashe neza; abe ari ho mutegura.»

¹³ Nuko baragenda, maze basanga byose bimeze uko yabibabwiye, bategura Pasika.

Yezu arema Ukaristiya

¹⁴ Igihe kigeze, ajya ku meza hamwe n’intumwa ze,

¹⁵ maze arazibwira ati «Nifuje cyane gusangira namwe iyi Pasika, ntarababara.

¹⁶ Ndabibabwiye: nta bwo nzongera kuyirya, itaruzurizwa mu Ngoma y’Imana.»

¹⁷ Nuko yakira inkongoro ya divayi bamuhereje, ashimira Imana maze arababwira ati «Nimwakire musangire.

¹⁸ Koko ndabibabwiye: sinzongera kunywa ukundi ku mbuto y’imizabibu, kugeza igihe Ingoma y’Imana izaba yaje.»

¹⁹ Hanyuma afata n’umugati, ashimira Imana, arawumanyura, awubahereza avuga ati «Iki ni umubiri wanjye ubatangiwe; mujye mubikora namwe bibe urwibutso rwanjye.»

²⁰ Barangije kurya, n’inkongoro ayigenzereza atyo, avuga ati «Iyi ni inkongoro y’Isezerano rishya, rishingiye ku maraso yanjye abamenewe.

Yezu amenyesha ubugambanyi bwa Yuda

²¹ Nyamara ugiye kungambanira turiho turasangira.

²² Koko, Umwana w’umuntu aragiye, nk’uko byagenwe; ariko hagowe umuntu umutanze!»

²³ Ubwo batangira kubazanya ugiye gukora ibyo uwo ari we.

Uruta abandi ni uwuhe?

²⁴ Nuko batangira kujya impaka ngo: umukuru muri bo yaba nde?

²⁵ Arababwira ati «Abami batwara amahanga bayategeka uko bishakiye, n’abandi bayafiteho ubutegetsi bagakunda ko babita abagiraneza.

²⁶ Kuri mwe rero, si ko bimeze. Ahubwo umukuru muri mwe nagenze nk’aho ari we muto, kandi umutware ahinduke umugaragu.

²⁷ Ni ko se, umukuru ni uwuhe: uri ku meza, cyangwa ni uhereza? Si uwo se uri ku meza? Jyewe rero, ndi hagati yanyu nk’umuhereza!

Igihembo cyasezeranyijwe intumwa

²⁸ Mwebwe, muri abankomeyeho mu bigeragezo nagize.

²⁹ Nanjye nabageneye Ingoma nk’uko Data yayingeneye,

³⁰ kugira ngo muzarire kandi muzanywere ku meza yanjye mu Ngoma yanjye; kandi muzicare ku ntebe z’ubutware, mucire imanza imiryango cumi n’ibiri ya Israheli.»

Yezu abwira Petero ko ari bumwihakane

³¹ Nuko Yezu aravuga ati «Simoni, Simoni! Dore Sekibi yabasabye ngo abashungure nk’ingano,

³² ariko nagusabiye kugira ngo ukwemera kwawe kudatezuka. Nawe rero, numara kwisubiraho, uzakomeze abavandimwe bawe.»

³³ Aramusubiza ati «Mwigisha, niteguye kujyana nawe, badufunga cyangwa batwica!»

³⁴ Ariko we aramubwira ati «Yewe Petero, nkubwire: uyu munsi, isake ntiri bubike utaranyihakana gatatu ngo ntunzi.»

Kwitegura ibigiye kuba

³⁵ Hanyuma arababwira ati «Igihe mbohereje nta gasaho k’ibiceri, nta mufuka, nta n’inkweto, ese hari icyo mwabuze?» Baramusubiza bati «Nta cyo.»

³⁶ Arababwira ati «Ubu noneho, ufite agasaho k’ibiceri nakajyane; n’ufite umufuka abigenze atyo; n’udafite inkota nagurishe igishura cye, maze ayigure.

³⁷ Koko ndabibabwiye: ni ngombwa ko Ibyanditswe binyuzurizwaho ngo ’Yabariwe mu bagome.’ Koko rero ibinyerekeyeho bigiye kurangira.»

³⁸ Baramubwira bati «Mwigisha, dore hano hari inkota ebyiri.» Arabasubiza ati «Birahagije!»

Yezu asengera ku musozi w’Imizeti

³⁹ Arasohoka, ajya ku musozi w’Imizeti nk’uko yari asanzwe abigenza, n’abigishwa baramukurikira.

⁴⁰ Amaze kuhagera, arababwira ati «Nimwambaze, kugira ngo mutagwa mu bishuko.»

⁴¹ Nuko arabitarura ajya ahareshya n’aho umuntu yatera ibuye; arapfukama, asenga agira ati

⁴² «Dawe, ubishatse wakwigizayo iyi nkongoro! Ariko ntibibe uko nshaka, ahubwo bibe uko ubishaka.»

⁴³ Nuko umumalayika wo mu ijuru aramubonekera, aramukomeza.

⁴⁴ Asambishwa n’agahinda, nyamara arushaho gusenga, abira ibyuya by’amaraso byatonyangiraga hasi.

⁴⁵ Amaze kwambaza arahaguruka, asanga abigishwa be basinzirijwe n’agahinda.

⁴⁶ Arababwira ati «Koko mwasinziriye? Nimuhaguruke maze mwambaze kugira ngo mutagwa mu bishuko!»

Yezu afatwa

⁴⁷ Akivuga ibyo, hatunguka igitero cy’abantu babanjirijwe n’uwitwa Yuda, umwe muri ba Cumi na babiri. Yegera Yezu kugira ngo amuhobere.

⁴⁸ Yezu aramubwira ati «Yuda, ni koko utanze Umwana w’umuntu umusoma?»

⁴⁹ Abari bakikije Yezu, babonye ibigiye kuba, baramubwira bati «Mwigisha, turwanishe inkota se?»

⁵⁰ Nuko umwe muri bo ayikubita umugaragu w’umuherezabitambo mukuru, amuca ugutwi kw’iburyo.

⁵¹ Ariko Yezu arababwira ati «Nimusigeho!» Aherako amukora ku gutwi, aramukiza.

⁵² Hanyuma Yezu abwira abari bamuteye, ari bo batware b’abaherezabitambo, n’abakuru b’abarinzi b’Ingoro, n’abakuru b’umuryango, ati «Mwanteye mufite inkota n’ibibando nk’aho ndi igisambo.

⁵³ Nyamara buri munsi nari kumwe namwe mu Ngoro, ntimwagira icyo munkoraho. Ariko ubu ni igihe cyanyu, cyo kwisunga umwijima.»

Petero yihakana Yezu

⁵⁴ Yezu bamufata ubwo, baramujyana bamwinjiza mu nzu y’umuherezabitambo mukuru. Naho Petero abakurikirira kure.

⁵⁵ Bari bacanye umuriro mu gikari, barawukikiza barota, Petero na we akaba yari yicaranye na bo.

⁵⁶ Nuko umuja amubonye yicaye ku ikome, aramwitegereza maze aravuga ati «N’uyu yari kumwe na we!»

⁵⁷ Ariko Petero ahakana, avuga ati «Wa mugore we, uwo muntu nta bwo muzi.»

⁵⁸ Hashize akanya undi amubonye, ati «Nawe, uri umwe muri bo!» Petero ati «Wa mugabo we, nta bwo ndi uwo muri bo.»

⁵⁹ Hashize nk’isaha, undi yemeza akomeje ati «Ni ukuri: n’uyu yari kumwe na we, ndetse ni n’Umunyagalileya!»

⁶⁰ Petero ati «Wa mugabo we, sinzi ibyo uvuga.» Muri ako kanya akivuga ibyo, isake irabika.

⁶¹ Nuko Nyagasani arakebuka, yitegereza Petero, maze Petero yibuka rya jambo Nyagasani yari yamubwiye ati «Uyu munsi, isake itarabika uraba wanyihakanye gatatu.»

⁶² Nuko Petero asohoka arirana ishavu.

Ibitutsi n’agashinyaguro

⁶³ Ubwo abantu barindaga Yezu bamujyaho baramushinyagurira, bakanamukubita.

⁶⁴ Bari bamupfutse mu maso, nuko bakamubaza bati «Ngaho fora: ni nde ugukubise?»

⁶⁵ Maze bamuhunda n’ibindi bitutsi byinshi.

Yezu imbere y’inama nkuru

⁶⁶ Bumaze gucya, inama y’abakuru b’umuryango n’abatware b’abaherezabitambo n’abigishamategeko iraterana, maze bahamagaza Yezu mu rukiko rwabo.

⁶⁷ Baravuga bati «Niba uri Kristu, bitubwire!» Arabasubiza ati «Nimbibabwira ntimubyemera,

⁶⁸ kandi nimbabaza ntimunsubiza.

⁶⁹ Ariko guhera ubu, Umwana w’umuntu agiye kwicara iburyo bw’Imana Nyir’ububasha.»

⁷⁰ Nuko bose baravuga bati «Rero uri Umwana w’Imana!» Arabasubiza ati «Murabyivugiye: ndi we.»

⁷¹ Batera hejuru bati «Abagabo bandi ni ab’iki? Ubwacu turamwiyumviye!»