Luka 20 - Kinyarwanda Bibiliya Ntagatifu

Abategetsi babaza Yezu inkomoko y’ububasha bwe

¹ Umunsi umwe, Yezu yigishirizaga abantu mu Ngoro, yamamaza Inkuru Nziza. Haza abatware b’abaherezabitambo n’abigishamategeko, hamwe n’abakuru b’umuryango.

² Baramubaza bati «Tubwire: ibyo ubikoresha bubasha ki? Ni nde waguhaye ubwo bubasha?»

³ Yezu araba subiza ati «Reka nanjye ngire icyo mbabaza. Ngaho nimumbwire:

⁴ batisimu ya Yohani yaturutse mu ijuru, cyangwa ku bantu?»

⁵ Naho bo baribwira bati «Nituvuga ko yaturutse mu ijuru, aratubwira ati ’Mwabujijwe n’iki kumwemera?’

⁶ Nituramuka tuvuze ko yaturutse ku bantu, rubanda rwose baradutera amabuye kuko bemera ko Yohani ari umuhanuzi.»

⁷ Nuko basubiza ko batazi aho ituruka.

⁸ Yezu na we arababwira ati «Nanjye rero simbabwira aho nkura ububasha bwo gukora ibyo mubona.»

Umugani w’abanyamizabibu b’abahotozi

⁹ Yezu abwira rubanda uyu mugani, ati «Umuntu yateye imizabibu mu murima we, awatira abahinzi, maze yigira mu rugendo ruzamara igihe.

¹⁰ Igihe cy’isarura kigeze, yohereza umugaragu kuri ba bahinzi, kugira ngo bamumuhere ku mbuto z’imizabibu. Ariko abo bahinzi baramuhondagura, bamwohereza amara masa.

¹¹ Arongera abatumaho undi mugaragu; uwo na we baramuhondagura, baramutukagura, maze bamwohereza amara masa.

¹² Arongera yohereza uwa gatatu; we baramukomeretsa, kandi baramwirukana.

¹³ Nuko nyir’imizabibu aribwira ati ’Ndabigenza nte? Ngiye kohereza noneho umwana wanjye nkunda; ahari we nta cyo bazamutwara.’

¹⁴ Ariko abahinzi bamubonye barabwirana bati ’Dore uzamuzungura; nimuze tumwice, maze tuzazungure ibye.’

¹⁵ Nuko bamaze kumujugunya inyuma y’umurima w’imizabibu baramwica. Mbese murabona nyir’imizabibu azabagenza ate?

¹⁶ Azaza arimbure abo bahinzi, maze imizabibu ayishinge abandi.» Rubanda babyumvise, baravuga bati «Ibyo ntibikabe!»

¹⁷ Nuko Yezu abahanga amaso, arababaza ati «Ibyanditswe ngo ’Ibuye ryajugunywe n’abubatsi ryabaye insanganyarukuta’ bivuga iki?

¹⁸ Umuntu wese uzagwira iryo buye azamenagurika; n’uwo rizagwira rizamujanjagura.»

¹⁹ Abigishamategeko n’abatware b’abaherezabitambo bashaka uko bahita bamufata ako kanya, ariko batinya rubanda. Bari bumvise neza ko ari bo yavugaga muri uwo mugani.

Umusoro wa Kayizari

²⁰ Nuko batangira kumugenzura, maze bamwoherezaho ingenza, ziriyoberanya zigira nk’intungane, kugira ngo zimufatire mu magambo ye, maze bamugabize abategetsi n’umutware mukuru w’igihugu.

²¹ Baraza baramubaza bati «Mwigisha, tuzi ko uvuga ukuri kandi ukakwigisha; byongeye kandi nta we ubera, ahubwo wigisha inzira y’Imana mu kuri.

²² Ese twemerewe guha Kayizari umusoro, cyangwa si byo?»

²³ Ariko Yezu kuko yari azi uburyarya bwabo, arababwira ati

²⁴ «Nimunyereke igiceri. Iri shusho n’iri zina biriho ni ibya nde?» Baramusubiza bati «Ni ibya Kayizari.»

²⁵ Nuko Yezu arababwira ati «Ibya Kayizari mubisubize Kayizari, n’iby’Imana mubisubize Imana!»

²⁶ Nuko babura uko bamufatira mu magambo imbere ya rubanda, baraceceka, basigara batangazwa n’amagambo yabashubije.

Ikibazo cyerekeye izuka ry’abapfuye

²⁷ Nuko Abasaduseyi bamwe baramwegera, ba bandi bavuga ko kuzuka bitabaho.

²⁸ Baramubaza bati «Mwigisha, dore Musa yatwandikiye iri tegeko ngo ’Umuntu napfa asize umugore batabyaranye, umuvandimwe we agomba gucyura uwo mugore, kugira ngo acikure nyakwigendera.

²⁹ Habayeho rero abavandimwe barindwi; uwa mbere ashaka umugore maze apfa batabyaranye.

³⁰ Uwa kabiri aramucyura,

³¹ n’uwa gatatu aramucyura kimwe n’abandi. Bose uko ari barindwi bapfa badasize abana.

³² Hanyuma wa mugore na we arapfa.

³³ Ubwo se, igihe cy’izuka uwo mugore azaba uwa nde muri abo, ko bose bamutunze uko ari barindwi?»

³⁴ Yezu arabasubiza ati «Ab’iyi ngoma ni bo bagira abagore cyangwa abagabo.

³⁵ Naho abo Imana izasanga bakwiye kugira uruhare ku bugingo buzaza no kuzuka mu bapfuye, bo ntibazagira abagore cyangwa abagabo.

³⁶ Ntibazaba bagipfuye ukundi, kuko bazaba bameze nk’abamalayika; babaye abana b’Imana koko babikesha ukuzuka.

³⁷ Naho iby’izuka ry’abapfuye, Musa na we yabitwumvishije igihe yari yibereye imbere y’igihuru kigurumana, akita Nyagasani ngo ’Imana ya Abrahamu, Imana ya Izaki, n’Imana ya Yakobo.’

³⁸ Nta bwo rero ari Imana y’abapfuye, ahubwo ni iy’abazima. Koko bose ni Yo babereyeho.»

³⁹ Abigishamategeko bamwe baramubwira bati «Mwigisha, uvuze neza.»

⁴⁰ Nuko baherukira aho ntibatinyuka kugira ikindi bamubaza.

Kristu asumba Dawudi

⁴¹ Yezu na we arababaza ati «Bashobora bate kuvuga ko Kristu ari mwene Dawudi?

⁴² Kandi Dawudi ubwe mu gitabo cya Zaburi yaravuze ati ’Nyagasani yabwiye Umutegetsi wanjye, ati: Icara iburyo bwanjye,

⁴³ kugeza igihe abanzi bawe mbahindura imisego y’ibirenge byawe.’

⁴⁴ Uwo rero Dawudi yita Umutegetsi we, yaba umwana we ate?»

Yezu aburira rubanda ngo birinde abigishamategeko

⁴⁵ Nuko abwira abigishwa be, rubanda rwose rwumva, ati

⁴⁶ «Murajye mwirinda abigishamategeko, bakunda gutembera bambaye amakanzu maremare, no kuramukirizwa mu materaniro; bakunda kandi guhabwa intebe z’icyubahiro mu masengero, n’imyanya y’imbere aho batumiwe.

⁴⁷ Icyabo ni ukurya ingo z’abapfakazi, maze bakiha kuvuga amasengesho y’urudaca. Abo bazacirwa urubanza rukaze kurusha abandi!»