Luka 17 - Kinyarwanda Bibiliya Ntagatifu

Yezu aha abigishwa be inyigisho zinyuranye

¹ Nuko Yezu abwira abigishwa be ati «Kubuza ibigusha abantu mu byaha ntibishoboka, ariko hagowe umuntu biturukaho!

² Ikiruta kuri we, ni uko bamuhambira urusyo ku ijosi bakamuroha mu nyanja, ataragira uwo agusha muri aba batoya.

³ Murabyitondere! Umuvandimwe wawe nagucumuraho, ubimuhane ukomeje, maze niyicuza, umubabarire.

⁴ Ndetse nagucumuraho karindwi mu munsi, akakwitwaraho karindwi avuga ati ’Ndabyicujije’, uzamubabarire.»

⁵ Nuko intumwa zibwira Yezu ziti «Twongerere ukwemera.»

⁶ Nyagasani arabasubiza ati «Iyaba mwari mufite ukwemera kungana n’impeke y’ururo, mwabwiye iki giti cya boberi muti ’Randuka, ujye kwitera mu nyanja’, kikabumvira.

Kuba abagaragu biyoroshya

⁷ Ni ko se, ni nde muri mwe wagira umugaragu umuhingira cyangwa akamuragirira amatungo, yataha akamubwira ati ’Banguka uze ufungure’?

⁸ Ahubwo ntazamubwira ati ’Banza ujye kuntekera, ukenyere umpereze, kugeza ndangije kurya no kunywa; hanyuma nawe ubone kurya no kunywa’?

⁹ Mbese shebuja yashimira uwo mugaragu we ko yarangije ibyo yari yategetswe?

¹⁰ Namwe ni uko, nimurangiza gukora icyo mwategetswe cyose, mujye muvuga muti ’Turi abagaragu nk’abandi: twakoze ibyo twari dushinzwe.’»

Ababembe cumi

¹¹ Yezu yari mu rugendo, anyura ku mipaka ya Samariya na Galileya, yerekeza i Yeruzalemu.

¹² Ageze mu rusisiro, ababembe cumi baza bamugana, bahagarara ahitaruye.

¹³ Nuko barangurura ijwi, bati «Yezu, Mwigisha, tubabarire!»

¹⁴ Ababonye, arababwira ati «Nimujye kwiyereka abaherezabitambo.» Bakiri mu nzira barakira.

¹⁵ Umwe muri bo, abonye ko yakize, asubira inyuma arangurura ijwi, asingiza Imana.

¹⁶ Nuko amwikubita imbere, yubitse umutwe ku butaka, aramushimira. Uwo muntu kandi yari Umunyasamariya.

¹⁷ Yezu araterura aravuga ati «Mbese bose ntibakize uko ari icumi? Abandi icyenda bari hehe?

¹⁸ Nta wundi wabonetse ngo agaruke gushimira Imana, atari uyu munyamahanga?»

¹⁹ Nuko aramubwira ati «Haguruka wigendere; ukwemera kwawe kuragukijije.»

Uko Ingoma y’Imana yamamara

²⁰ Abafarizayi baramubaza bati «Ingoma y’Imana izaza gihe ki?» Yezu arabasubiza ati «Ingoma y’Imana ntizaza yigaragaza mu maso y’abantu,

²¹ ngo bagire bati ’Ngiyi, ngiriya.’ Ahubwo nimumenye ko Ingoma y’Imana ibarimo.»

Umunsi w’Umwana w’umuntu

²² Yongera kubwira abigishwa be, ati «Hazaza igihe muzifuza kubona nibura umwe mu minsi y’Umwana w’umuntu, ariko ntimuzawubona.

²³ Bazababwira bati ’Dore nguyu, nguriya.’ Ntimuzajyeyo, ntimuzirukireyo.

²⁴ Koko rero, nk’uko umurabyo urabiriza mu ruhande rumwe rw’isi, ukabonekera mu rundi, ni ko n’Umwana w’umuntu azaza ku munsi yigeneye.

²⁵ Ariko agomba kubanza kubabara cyane, kandi abantu b’iyi ngoma bamwihakane.

²⁶ Mbese nk’uko byagenze mu gihe cya Nowa, ni na ko bizamera mu minsi y’Umwana w’umuntu.

²⁷ Icyo gihe abantu bararyaga bakanywa, abahungu bararongoraga, abakobwa bakarongorwa, kugeza ubwo Nowa yinjiye mu bwato, maze umwuzure uraza urabatsemba bose.

²⁸ Bizamera nk’uko byagenze mu minsi ya Loti. Icyo igihe abantu bararyaga bakanywa, bararanguraga bagacuruza, kandi barahingaga bakubaka;

²⁹ ariko umunsi Loti avuye muri Sodoma, Imana igusha umuriro uvanze n’amahindure biturutse ku ijuru, bose irabatsemba.

³⁰ Ni ko bizamera ku munsi Umwana w’umuntu azigaragazaho.

³¹ Kuri uwo munsi, uzaba ari hejuru y’inzu, ntazamanuke ku nzu ye ngo agire icyo avanamo. Kandi uzaba ari mu murima, ntazasubire imuhira.

³² Nimwibuke umugore wa Loti!

³³ Uwihambira ku bugingo bwe, azabubura, naho uzahara ubugingo bwe azabuhorana.

³⁴ Ndabibabwiye: muri iryo joro, abantu babiri bazaba bari ku buriri bumwe, umwe azafatwa, undi asigare.

³⁵ Abagore babiri bazaba bari hamwe basya, umwe azafatwa, undi asigare.» (36 . . . )

³⁷ Abigishwa ni ko kumubaza bati «Ibyo bizabera hehe, Nyagasani?» Arabasubiza ati «Ahazaba hari intumbi, ni ho inkongoro zizakoranira.»