Luka 1 - Kinyarwanda Bibiliya Ntagatifu

Intangiriro

¹ Ubwo benshi batangiye kwandika barondora ibyabaye muri twe,

² mbese nk’uko twabigejejweho n’ababyiboneye kuva mu ntangiriro, ari na bo bari bashinzwe kwamamaza ijambo ry’Imana,

³ nanjye, maze kubaririza neza uko byagenze kuva bigitangira, niyemeje, nyakubahwa Tewofili, kukwandikira ayo mateka nyakurikiranyije,

⁴ ngo umenye nyakuri ukuntu inyigisho washyikirijwe zihamye.

Integuza y’ivuka rya Yohani Batisita

⁵ Ku ngoma ya Herodi, umwami wa Yudeya, hari umuherezabitambo wo mu cyiciro cya Abiya, akitwa Zakariya, n’umugore we akaba uwo mu muryango wa Aroni, akitwa Elizabeti.

⁶ Bombi bari intungane imbere y’Imana, bagakurikiza badatezuka amategeko n’amabwiriza yose ya Nyagasani.

⁷ Ariko nta mwana bari bafite, kuko Elizabeti yari ingumba; byongeye bombi bari bageze mu zabukuru.

⁸ Igihe rero Zakariya yariho akora imihango y’ubuherezabitambo imbere y’Imana, mu mwanya ugenewe icyiciro cye,

⁹ nk’uko abaherezabitambo babigenzaga, ubufindo buramufata ngo ajye gutwika ububani mu Ngoro ya Nyagasani.

¹⁰ Rubanda rwose rwasengeraga hanze igihe cyo gutwika ububani.

¹¹ Nuko Umumalayika wa Nyagasani amubonekera ahagaze iburyo bw’urutambiro rw’ububani.

¹² Zakariya amubonye arikanga, ubwoba buramutaha.

¹³ Ariko Malayika aramubwira ati «Wigira ubwoba, Zakariya, kuko isengesho ryawe ryashimwe: umugore wawe Elizabeti azakubyarira umuhungu, maze ukazamwita Yohani.

¹⁴ Azagutera ibyishimo n’umunezero, kandi benshi bazashimishwa n’ivuka rye,

¹⁵ kuko azaba umuntu ukomeye mu maso ya Nyagasani. Ntazanywa divayi n’icyitwa inzoga cyose, kandi azuzura Roho Mutagatifu akiri mu nda ya nyina.

¹⁶ Azagarura abana benshi ba Israheli kuri Nyagasani, Imana yabo,

¹⁷ kandi azagenda imbere y’Imana arangwa n’umutima n’ubushobozi nka Eliya, agira ngo yunge ababyeyi n’abana babo, no kugira ngo ab’ibigande abagire intungane, maze ategurire atyo Nyagasani umuryango umutunganiye.»

¹⁸ Nuko Zakariya abwira Malayika, ati «Nzabibwirwa n’iki, ko ndi umusaza, n’umugore wanjye akaba ageze mu zabukuru?»

¹⁹ Malayika aramusubiza ati «Ndi Gaburiyeli uhora imbere y’Imana; natumwe kukubwira no kukugezaho iyo nkuru nziza.

²⁰ Nyamara guhera ubu ngubu ugiye kuba ikiragi; ntuzongera kuvuga kugeza ku munsi ibyo bizaberaho, kuko utemeye ibyo nakubwiye bizagaragara igihe cyabyo kigeze.»

²¹ Ubwo rubanda rwari rutegereje Zakariya, rutangazwa n’uko yatinze mu Ngoro.

²² Aho asohokeye, ntiyari agishobora kuvuga, maze bamenya ko yabonekerewe mu Ngoro. Nuko aba uwo kubacira amarenga, akomeza kuba ikiragi.

²³ Iminsi y’imihango y’ubuherezabitambo irangiye arataha.

²⁴ Hashize iminsi, umugore we Elizabeti arasama, amara amezi atanu atajya ahagaragara, avuga ati

²⁵ «Dore ibyo Nyagasani yangiriye, yarangobotse ankiza icyankozaga isoni mu bantu.»

Integuza y’ivuka rya Yezu

²⁶ Hahise amezi atandatu, Malayika Gaburiyeli atumwa n’Imana, mu mugi wo mu Galileya witwa Nazareti,

²⁷ ku mukobwa w’isugi wari warasabwe n’umusore witwa Yozefu, wo mu muryango wa Dawudi; uwo mukobwa yitwaga Mariya.

²⁸ Malayika aza iwabo, aramubwira ati «Ndakuramutsa, mutoni w’Imana; Nyagasani ari kumwe nawe.»

²⁹ Yumvise ayo magambo, arikanga, yibaza icyo iyo ndamutso ivuga.

³⁰ Malayika aramubwira ati «Wigira ubwoba, Mariya, kuko wagize ubutoni ku Mana.

³¹ Dore ugiye gusama inda, ukazabyara umuhungu, maze ukazamwita izina rya Yezu.

³² Azaba umuntu ukomeye, kandi bazamwita Mwene Nyir’ijuru. Nyagasani Imana azamwegurira ingoma ya se Dawudi;

³³ azategeka umuryango wa Yakobo ubuziraherezo, ingoma ye ntizashira.»

³⁴ Nuko Mariya abwira Malayika, ati «Ibyo bizashoboka bite, kandi nta mugabo mfite?»

³⁵ Malayika aramusubiza ati «Roho Mutagatifu azakumanukiraho, maze ububasha bwa Nyir’ijuru bukubundikire mu gicucu cye, ndetse ugiye kuvuka azaba intungane, kandi azitwa Umwana w’Imana.

³⁶ Dore Elizabeti mwene wanyu, na we yasamiye mu zabukuru; uku kwezi ni ukwa gatandatu, kandi ubundi yitwaga ingumba,

³⁷ koko nta kinanira Imana.»

³⁸ Mariya aravuga ati «Ndi umuja wa Nyagasani; byose bimbeho nk’uko ubivuze.» Nuko Malayika amusiga aho aragenda.

Mariya ajya gusura Elizabeti

³⁹ Muri iyo minsi, Mariya yarahagurutse agenda yihuta, ajya mu misozi miremire, mu mugi wa Yuda,

⁴⁰ agera kwa Zakariya, aramutsa Elizabeti.

⁴¹ Nuko Elizabeti yumvise indamutso ya Mariya, umwana atwite yisimbiza mu nda, maze Elizabeti yuzura Roho Mutagatifu.

⁴² Arangurura ijwi ati «Wahebuje abagore bose umugisha, n’Umwana utwite arasingizwa.

⁴³ Mbikesha iki kugira ngo nyina w’Umutegetsi wanjye angenderere?

⁴⁴ Dore mbaye ncyumva indamutso yawe, umwana yisimbagizanya ibyishimo mu nda yanjye.

⁴⁵ Urahirwa, wowe wemeye ko ibyo watumweho na Nyagasani bizaba.»

⁴⁶ Nuko Mariya na we aravuga ati

⁴⁷ «Umutima wanjye urasingiza Nyagasani, kandi uhimbajwe n’Imana Umukiza wanjye.

⁴⁸ Kuko yibutse umuja we utavugwaga; rwose, kuva ubu amasekuruza yose azanyita umuhire.

⁴⁹ Ushoborabyose yankoreye ibitangaza, Izina rye ni ritagatifu.

⁵⁰ Impuhwe ze zisesekarizwa abamutinya, bo mu bihe byose.

⁵¹ Yagaragaje ububasha bw’amaboko ye, atatanya abantu birata;

⁵² yahanantuye abakomeye abakura ku ntebe zabo, maze akuza ab’intamenyekana;

⁵³ abashonje yabagwirije ibintu, abakungu abasezerera amara masa;

⁵⁴ yagobotse Israheli umugaragu we, bityo yibuka impuhwe ze,

⁵⁵ nk’uko yari yarabibwiye abakurambere bacu, abigirira Abrahamu n’urubyaro rwe iteka.»

⁵⁶ Mariya yamaranye na Elizabeti nk’amezi atatu, abona gutaha.

Ivuka rya Yohani Batisita

⁵⁷ Nuko Elizabeti ageze igihe cyo kubyara, abyara umwana w’umuhungu.

⁵⁸ Abaturanyi na bene wabo, bumvise ko Nyagasani yamugiriye ubuntu, bafatanya na we kwishima.

⁵⁹ Ku munsi wa munani, baza kugenya umwana, bashaka kumwita Zakariya nka se.

⁶⁰ Ariko nyina aravuga ati «Oya, aritwa Yohani.»

⁶¹ Baramubwira bati «Nta muntu wo mu muryango wanyu wigeze kwitwa iryo zina!»

⁶² Nuko babaza se mu marenga uko yifuza kwita umwana.

⁶³ Zakariya yaka akabaho, maze yandikaho aya magambo: «Izina rye ni Yohani.» Bose baratangara.

⁶⁴ Ako kanya umunwa we urabumbuka, n’ururimi rwe ruragobodoka, maze atangira kuvuga, asingiza Imana.

⁶⁵ Nuko ubwoba butaha abaturanyi babo bose, n’abo mu misozi yo mu Yudeya, bakwiza hose ibyabaye.

⁶⁶ Ababyumvaga bose bakomezaga kubizirikana mu mitima, bibaza bati «Uyu mwana azamera ate, ko ububasha bwa Nyagasani buri kumwe na we?»

Zakariya asingiza Nyagasani

⁶⁷ Nuko se Zakariya yuzura Roho Mutagatifu, ahanura avuga ati

⁶⁸ «Nihasingizwe Nyagasani, Imana ya Israheli, kuko yasuye umuryango we kandi akawukiza.

⁶⁹ Yatugoboreye ububasha budukiza mu nzu ya Dawudi umugaragu we,

⁷⁰ nk’uko abahanuzi be batagatifu bari barabitumenyesheje kuva kera

⁷¹ ko azadukiza abanzi bacu, akatugobotora mu nzara z’abatwanga bose.

⁷² Yagiriye impuhwe ababyeyi bacu, maze yibuka isezerano rye ritagatifu,

⁷³ ya ndahiro yarahiye Abrahamu umubyeyi wacu,

⁷⁴ avuga ko namara kutugobotora mu maboko y’abanzi bacu, azaduha kumukorera nta cyo twikanga,

⁷⁵ turangwa n’ubuyoboke hamwe n’ubutungane, iminsi yose y’ukubaho kwacu.

⁷⁶ Nawe rero wa kana we, uzitwa umuhanuzi w’Umusumbabyose, kuko uzabanziriza Nyagasani ngo umutegurire amayira,

⁷⁷ ukamenyesha umuryango we umukiro, bazakesha kubabarirwa ibyaha byabo.

⁷⁸ Koko Imana yacu igira impuhwe zihebuje, ari na zo zatumye Zuba‐rirashe amanuka mu ijuru aje kudusura,

⁷⁹ akabonekera abari batuye mu mwijima no mu gicucu cy’urupfu, kugira ngo atuyobore mu nzira y’amahoro.»

⁸⁰ Umwana uko yakuraga, ni na ko yungukaga ubwenge. Nuko yibera ahantu h’ubutayu kugeza igihe yigaragaje imbere ya Israheli.