Kubara 34 - Kinyarwanda Bibiliya Ntagatifu

Imbibi z’igihugu cya Kanahani

¹ Uhoraho abwira Musa, ati

² «Dore ibyo uzategeka Abayisraheli: Mugiye kwinjira muri Kanahani, icyo ni cyo gihugu mwahaweho umugabane; imbibi zacyo ziteye zitya.

³ Mu majyepfo, urubibi rwanyu ruturuka mu butayu bwa Sinayi rugakurikira umupaka w’igihugu cya Edomu. Iburasirazuba, urubibi rwanyu ruva ku mpera y’inyanja y’Umunyu,

⁴ rukigobya mu majyepfo y’umuzamuko w’Akarabimu, rugaca i Sini, maze rugahinguka i Kadeshi-Barineya. Rukongera rukerekeza i Hasari-Adari, rugaca ahitwa Asimoni,

⁵ maze rukiheta rugana mu mugezi wa Misiri, aho ruhurira n’inyanja.

⁶ Iburengerazuba ho, inyanja nini ni yo izababera urubibi. Urwo ni rwo rubibi rwanyu iburengerazuba.

⁷ Mu majyaruguru, muzashinge imbago z’urubibi rwanyu muhereye ku Nyanja Nini, mugeze ku musozi wa Hori.

⁸ Nimuhava, mukomeze i LeboHamati, n’i Sedadi,

⁹ mugane i Zifironi, maze muhagararire i Hasari-Eyinani. Urwo ni rwo rubibi rwanyu rwo mu majyaruguru.

¹⁰ Iburasirazuba, muzashinga imbago z’urubibi rwanyu guhera i Hasari-Eyinani kugera i Shefami,

¹¹ mumanuke kuri Rivila iburasirazuba bwa Ayini, maze mukomeze mugere ku misozi iri mu burasirazuba bw’Inyanja ya Kinereti,

¹² mwongere mugere kuri Yorudani, muze guhagararira ku Nyanja y’Umunyu. Icyo ni cyo gihugu cyanyu n’imbibi zacyo zigikikije.»

¹³ Musa aha Abayisraheli amabwiriza, agira ati «Icyo ni cyo gihugu muzagabana mukoresheje ubufindo. Ni igihugu Uhoraho yategetse ko gihabwa imiryango icyenda hamwe n’igice kimwe cy’umuryango wa Manase.

¹⁴ Koko rero, umuryango wa bene Gadi n’uwa bene Rubeni hamwe n’igice kimwe cy’umuryango wa Manase, bari bahawe umugabane wabo.

¹⁵ Iyo miryango ibiri n’icyo gice cy’umuryango bahawe umugabane wabo hakurya ya Yorudani iburasirazuba, ahateganye na Yeriko.»

Amazina y’abari bashinzwe kugabanya igihugu

¹⁶ Uhoraho abwira Musa, ati

¹⁷ «Dore amazina y’abazabagabanya igihugu: ni umuherezabitambo Eleyazari na Yozuwe mwene Nuni.

¹⁸ Muri buri muryango kandi muzatoremo umuntu uzagabanya igihugu.

¹⁹ Dore rero amazina y’abo bantu: mu muryango wa Yuda ni Kalebu mwene Yefune.

²⁰ Mu muryango wa bene Simewoni, ni Shemuyeli mwene Amihudi.

²¹ Mu muryango wa Benyamini, ni Elidadi mwene Kisiloni.

²² Mu muryango wa bene Dani, uwatowe ni Buki mwene Yogili.

²³ Kwa bene Yozefu, mu muryango wa bene Manase, uwatowe ni Haniyeli mwene Efodi;

²⁴ mu muryango wa bene Efurayimu, uwatowe ni Kemuyeli mwene Shifutani.

²⁵ Mu muryango wa bene Zabuloni, uwatowe ni Elisafani mwene Parinaki.

²⁶ Mu muryango wa bene Isakari, uwatowe ni Palitiyeli mwene Azani.

²⁷ Mu muryango wa bene Asheri, uwatowe ni Ahihudi mwene Shelomi.

²⁸ Mu muryango wa bene Nefutali, uwatowe ni Pedaheli mwene Amihudi.»

²⁹ Abo ni bo bagabo Uhoraho yategetse gukwiza Abayisraheli imigabane mu gihugu cya Kanahani.