Kubara 2 - Kinyarwanda Bibiliya Ntagatifu

Umwanya wa buri muryango mu ngando

¹ Uhoraho abwira Musa na Aroni, ati

² «Buri Muyisraheli azagandike mu mutwe w’ingabo we, hafi y’ibendera ry’inzu akomokamo. Abayisraheli kandi bazagandika berekeye ihema ry’ibonaniro, ariko boye kuryegera cyane.

³ Abazagandika imbere y’abandi iburasirazuba, ni imitwe y’ingabo zo mu ngando ya Yuda. Umutware wa bene Yuda ni Nashoni mwene Aminadabu;

⁴ umutwe w’ingabo ze ukabamo abagabo 74,600.

⁵ Abazashinga ingando iruhande rwe, ni umuryango wa Isakari hamwe n’uwa Zabuloni. Umutware wa bene Isakari ni Netaneli mwene Shuwari,

⁶ kandi umutwe w’ingabo ze ukabamo abagabo 54,400.

⁷ Umutware wa bene Zabuloni ni Eliyabu mwene Heloni,

⁸ kandi umutwe w’ingabo ze ukabamo abagabo 57,400.

⁹ Abantu bari muri iyo mitwe y’ingabo uko ari itatu yo mu ngando ya Yuda, bose hamwe ni 186,400. Abo rero ni bo bazafata iya mbere mu rugendo.

¹⁰ Imitwe y’ingabo yo mu ngando ya Rubeni izaherera mu majyepfo. Umutware wa bene Rubeni ni Elishuri mwene Shedewuri,

¹¹ kandi umutwe w’ingabo ze ukabamo abagabo 46,500.

¹² Abazashinga ingando iruhande rwe ni umuryango wa Simewoni hamwe n’uwa Gadi. Umutware wa bene Simewoni ni Shelumiyeli mwene Shurishadayi,

¹³ kandi umutwe w’ingabo ze ukabamo abagabo 59,300.

¹⁴ Umutware wa bene Gadi ni Eliyasafu mwene Rewuyeli,

¹⁵ kandi umutwe w’ingabo ze ukabamo abagabo 45,650.

¹⁶ Abantu bari muri iyo mitwe y’ingabo uko ari itatu yo mu ngando ya Rubeni, bose hamwe ni 151,450. Abo rero ni bo bazajya bahaguruka aba kabiri.

¹⁷ Nyuma hazagenda ihema ry’ibonaniro rikurikirwe n’inteko y’Abalevi izaba iri hagati y’izindi nteko. Muzagende mukurikije uko muri mu ngando, buri wese mu mwanya we, inteko imwe inyuma y’indi.

¹⁸ Imitwe y’ingabo yo mu ngando ya Efurayimu izaherera mu burengerazuba. Umutware wa bene Efurayimu ni Elishama mwene Amihudi,

¹⁹ kandi umutwe w’ingabo ze ukabamo abagabo 40,500.

²⁰ Abazashinga ingando iruhande rwe, ni umuryango wa Manase hamwe n’uwa Benyamini. Umutware wa bene Manase ni Gamaliyeli mwene Pedashuri,

²¹ kandi umutwe w’ingabo ze ukabamo abagabo 32,200.

²² Umutware wa bene Benyamini ni Avidani mwene Gidewoni,

²³ kandi umutwe w’ingabo ze ukabamo abagabo 35,400.

²⁴ Abantu bari muri iyo mitwe y’ingabo uko ari itatu yo mu ngando ya Efurayimu, bose hamwe ni 108.100. Abo ni bo bazajya bahaguruka aba gatatu.

²⁵ Imitwe y’ingabo yo mu ngando ya Dani, izaherera mu majyaruguru. Umutware wa bene Dani ni Ahiyezeri mwene Amishadayi,

²⁶ kandi umutwe w’ingabo ze ukabamo abagabo 62,700.

²⁷ Abazashinga ingando iruhande rwe ni umuryango wa Asheri hamwe n’uwa Nefutali. Umutware wa bene Asheri ni Pagiyeli mwene Okrani,

²⁸ kandi umutwe w’ingabo ze ukabamo abagabo 41,500.

²⁹ Umutware wa bene Nefutali ni Ahira mwene Eyinani,

³⁰ kandi umutwe w’ingabo ze ukabamo abagabo 53,400.

³¹ Abantu bari muri iyo ngando ya Dani ni 157,600. Bazajya bahaguruka aba nyuma, buri mutwe w’ingabo inyuma y’uwundi.

³² Ngabo rero abana ba Israheli uko babaruriwe mu mazu yabo; umubare rusange w’ingabo zose zabaruriwe mu ngando no mu mitwe yazo ni 603.550.

³³ Cyakora Abalevi, nk’uko Uhoraho yari yabitegetse Musa, ntibashyizwe muri iryo barurwa ry’Abayisraheli.

³⁴ Ibyo, Abayisraheli barabyubahirije, bakurikiza ugushaka kw’Uhoraho, ari mu guca ingando, ari no mu guhaguruka, buri wese akurikije umuryango we n’inzu akomokamo.