Kubara 10 - Kinyarwanda Bibiliya Ntagatifu

Impanda za feza

¹ Uhoraho abwira Musa, ati

² «Koresha impanda ebyiri uzicurishe muri feza. Uzazifashisha uhamagara imbaga cyangwa uhagurutsa ingando.

³ Nibavuza izo mpanda, imbaga yose izakoranira iruhande rwawe ku muryango w’ihema ry’ibonaniro.

⁴ Nihavuga imwe gusa, abatware b’imiryango bonyine ni bo bazakoranira iruhande rwawe.

⁵ Nibavuza mu ijwi riranguruye, ingando z’iburasirazuba zizagenda.

⁶ Nibavuza ubwa kabiri mu ijwi riranguruye, ingando zo mu majyepfo zizagenda. Ingando zose zizahagurutswa n’ijwi riranguruye.

⁷ Naho mu guhamagaza imbaga, muzavuza mu ijwi rirongoroye, ariko ritaranguruye.

⁸ Abaherezabitambo ari bo bahungu ba Aroni ni bo bonyine bazavuza izo mpanda. Ibyo bibabere itegeko ridakuka kuri mwebwe no ku bazabakomokaho.

⁹ Umwanzi nabatera mu gihugu cyanyu, mukajya kumurwanya, mujye muvuza izo mpanda mu ijwi riranguruye. Bityo Uhoraho Imana azabibuka maze abakize ababisha banyu.

¹⁰ Ku munsi w’ibyishimo, uw’ibirori na buri wa mbere w’ukwezi, muzavuza izo mpanda kugira ngo amajwi yazo aherekeze ibitambo byanyu bitwikwa cyangwa by’ubuhoro; ibyo bizatuma Imana yanyu ibibuka. Ndi Uhoraho Imana yanyu.»

ABAYISRAHELI BAVA KURI SINAYI BEREKEZA MU BIBAYA BYA MOWABU Uko imiryango ya Israheli yakurikiranaga mu igenda

¹¹ Mu mwaka wa kabiri, ku munsi wa makumyabiri w’ukwezi kwa kabiri, igicu kizamuka kiva ku ihema ry’ibonaniro.

¹² Abayisraheli bahaguruka mu butayu bwa Sinayi, buri muryango ukwawo, maze igicu gihagarara mu butayu bwa Parani.

¹³ Bwari ubwa mbere bahaguruka ku itegeko ry’Uhoraho bari bagejejweho na Musa.

¹⁴ Habanje kugenda abari mu ngando ya bene Yuda, n’imitwe y’ingabo zabo. Ingabo za bene Yuda zategekwaga na Nashoni mwene Aminadabu.

¹⁵ Ingabo za bene Isakari zategekwaga na Netaneli mwene Shuwari.

¹⁶ Naho ingabo za bene Zabuloni zigategekwa na Eliyabu mwene Heloni.

¹⁷ Ingoro y’Uhoraho barayiremura, bene Gerishoni na bene Merari bagenda bayihetse.

¹⁸ Abari mu ngando ya Rubeni na bo bahagurukana n’imitwe y’ingabo zabo. Ingabo za bene Simewoni zategekwaga na Elishuru mwene Shedewuru.

¹⁹ Ingabo za bene Simewoni zategekwaga na Shelumiyeli mwene Shurishadayi.

²⁰ Naho ingabo za bene Gadi zigategekwa na Eliyasafu mwene Dewuyeli.

²¹ Hakurikiraho Abakehati, bagenda bikoreye ibikoresho bitagatifu. Abandi bose bababanza imbere, kuko bagombaga gushinga Ingoro Abakehati batarahagera.

²² Hongera gukurikiraho abari mu ngando ya bene Efurayimu, n’imitwe y’ingabo zabo. Ingabo za bene Efurayimu zategekwaga na Elishama mwene Amihudi.

²³ Ingabo za bene Manase zategekwaga na Gameliyeli mwene Pedashuri.

²⁴ Naho ingabo za bene Benyamini zategekwaga na Avidani mwene Gidewoni.

²⁵ Nyuma iyaherutse izindi zose, ni ingando ya bene Dani, n’imitwe y’ingabo zayo. Ingabo za bene Dani zategekwaga na Ahiyezeri mwene Amishadayi.

²⁶ Ingabo za bene Asheri zategekwaga na Pagiyeli, mwene Okrani.

²⁷ Naho ingabo za bene Nefutali zigategekwa na Ahira mwene Eyinani.

²⁸ Uko ni ko Abayisraheli bahagurutse n’imitwe y’ingabo zabo, nuko baragenda.

Musa ashaka uzabayobora mu rugendo

²⁹ Musa abwira Hobabu mwene Rewuyeli w’Umumadiyani, ari we sebukwe, ati «Tugiye mu gihugu Uhoraho yadusezeranije, agira ati ’Ndakibahaye’. None, ngwino tujyane, tuzasangire ihirwe Uhoraho yasezeranije Israheli.»

³⁰ Hobabu aramusubiza ati «Ntituzajyana, ndifuza gusubira mu gihugu cyanjye, muri bene wacu.»

³¹ Musa arongera ati «Widutererana! Kuko wowe uzi ahantu twashobora gushinga ingando mu butayu, uzatuyobore inzira.

³² Kandi nuza tukajyana, ihirwe Uhoraho azatugirira, uzaribonaho.»

³³ Ubwo bava ku musozi w’Uhoraho, bafata urugendo rw’iminsi itatu. Ubushyinguro bw’Isezerano ry’Uhoraho bwabagendaga imbere, kugira ngo bubashakire ahantu bashoboraga gushinga ingando.

³⁴ Igicu cy’Uhoraho cyabatwikiraga ku manywa, iyo babaga bavuye mu ngando.

³⁵ Iyo ubushyinguro bwahagurukaga, Musa yaravugaga, ati «Haguruka Nyagasani, abanzi bawe batatane, abakurwanya bahunge kure yawe!»

³⁶ Igicu cyahagarara, akavuga ati «Garuka, Nyagasani, uture mu mbaga nyamwinshi y’Abayisraheli!»