Iyimukamisiri 22 - Kinyarwanda Bibiliya Ntagatifu

¹ Umujura nafatirwa mu cyuho nijoro, bakamukubita agapfa, nta we uzabazwa amaraso ye;

² nyamara niba afashwe yiba ku manywa y’ihangu, bazabazwa amaraso ye. Uwo mujura agomba kuriha ibyo yibye; niba ari nta cyo atunze, azagurishwe ubwe, kugira ngo arihe ibyo yibye.

³ Itungo azaba yibye, — ari inka, ari indogobe cyangwa intama —, narifatanwa rikiri rizima, azaririha incuro ebyiri.

Kwangiza iby’abandi

⁴ Umuntu nareka amatungo ye akajya kona imyaka cyangwa imizabibu y’undi, ntayakuremo, azariha ibyangijwe, atange ibivuye mu murima we uruta iyindi cyangwa ibivuye mu muzabibu we uruta iyindi afite.

⁵ Umuntu nacana umuriro, ukagurumana, ugakwira mu bihuru by’amahwa, maze ugatwika imirara y’ingano, cyangwa ingano zigihagaze mu murima, uzaba yacanye iyo nkongi azatanga indishyi y’ibyo yangije.

⁶ Umuntu nabitsa undi imari ye, yaba ifeza cyangwa ibindi bintu, maze bikibirwa mu nzu y’ubibitse, umujura nafatwa azabiriha incuro ebyiri.

⁷ Niba umujura atabonetse, nyir’ukubitswa azajya kurahirira imbere y’Imana, kugira ngo rubanda bamenye ko atari we wibye ibintu bya mugenzi we.

⁸ Impaka zose zerekeye inka, indogobe, intama, cyangwa umwambaro byibwe, cyangwa se ikintu cyose cyazimiye, ku buryo bavuga ngo «Ni naka wabigize», ababurana bombi bazajyane urubanza rwabo imbere y’Imana; uwo Imana izaba yerekanye ko atsinzwe, azariha mugenzi we incuro ebyiri.

⁹ Umuntu naragiza mugenzi we inka, intama, cyangwa irindi tungo, iryo tungo rigapfa cyangwa rikavunika, cyangwa se rikanyagwa ntawabibonye,

¹⁰ uwo muturanyi azarahirira imbere y’Uhoraho ko atibye itungo ry’undi. Nyir’itungo azabyemere kubera iyo ndahiro, maze undi yegutanga indishyi.

¹¹ Ariko itungo niryibirwa iwe, azaririha nyiraryo.

¹² Niba itungo ryatanyaguwe n’inyamaswa, azagaragaze icyemezo cyabyo, maze yekuzariha itungo ryatanyaguwe.

¹³ Umuntu natira undi itungo, hanyuma rikavunika cyangwa rigapfa nyiraryo atahibereye, azagomba kuririha.

¹⁴ Niba ibyo bibaye nyirayo ahibereye, nyir’ukuritira ntagomba kuririha; niba itungo ryakodeshejwe, nyir’ukurikodesha azatange gusa igiciro cy’ubukodeshe.

¹⁵ Umuntu nagusha mu bishuko umukobwa utarasabwa, maze akaryamana na we, azagomba gutanga inkwano kugira ngo abe umugore we.

¹⁶ Niba se yanze kumumushyingira, uwo mugabo azishyure ifeza zihwanye n’inkwano basanzwe baka ku bakobwa.

Andi mategeko yerekeye kudahemukira Imana no kutarenganya abatishoboye

¹⁷ Uwitwa umupfumukazi wese uzamurwanye, yoye gukomeza kubaho.

¹⁸ Umuntu wese ufashwe asambana n’inyamaswa, agomba kwicwa.

¹⁹ Uzatura ibitambo izindi mana, uretse Uhoraho wenyine, azavumirwe kurimbuka.

²⁰ Ntuzanyunyuze imitsi y’umusuhuke cyangwa ngo umukandamize, kuko namwe mwabaye abasuhuke mu gihugu cya Misiri.

²¹ Ntimuzagirire nabi umupfakazi cyangwa imfubyi.

²² Numugirira nabi akantakira, nzumva amaganya ye,

²³ maze uburakari bwanjye bugurumane, mbamarire ku nkota, abagore banyu bapfakare, n’abana banyu babe imfubyi.

²⁴ Niba ugurije amafeza umuntu wo mu muryango wanjye, cyane cyane umutindi muturanye, ntuzamugenzereze nk’abaharanira gukira vuba: ntuzamushakeho urwunguko.

²⁵ Niba igishura cya mugenzi wawe ugitwayeho ingwate, uzakimusubize mbere y’uko izuba rirenga;

²⁶ kuko ari cyo kiringiti cye rukumbi, n’umwambaro yifubika. None se yaryama mu ki? Nantakambira nzamwumva, kuko jyeweho ndi umunyampuhwe.

²⁷ Ntuzatuke Imana, kandi ntuzatuke umuntu wese ufite ubutegetsi mu gihugu.

²⁸ Uzaze kuntura bidatinze ibingenewe mu musaruro wawe n’umutobe w’imizabibu yawe. Uzanture imfura mu bahungu bawe;

²⁹ uzabigenze utyo no ku buriza bw’inka yawe n’ubw’intama yawe. Izagumane na nyina iminsi irindwi, ku wa munani uyinture.

³⁰ Muzambere abantu b’intungane! Ntimuzarye itungo ryatanyaguriwe n’igikoko mu gasozi; muzarijugunyire imbwa.