Iyimukamisiri 1 - Kinyarwanda Bibiliya Ntagatifu

Ubucakara bw’Abayisraheli mu Misiri

¹ Dore amazina y’abana ba Israheli baje mu Misiri hamwe na Yakobo. Bahageze buri muntu ari kumwe n’urugo rwe.

² Abo ni Rubeni, Simewoni, Levi na Yuda,

³ Isakari, Zabuloni na Benyamini;

⁴ Dani na Nefutali; Gadi na Asheri.

⁵ Abantu bakomoka kuri Yakobo bari mirongo irindwi bose hamwe; Yozefu we yari asanzwe atuye mu Misiri.

⁶ Nuko Yozefu arapfa kimwe n’abavandimwe be bose, n’igisekuru cye cyose.

⁷ Abayisraheli barororoka, baragwira, bahinduka ishyano ryose, bagenda bunguka amaboko, kugeza aho buzura igihugu.

⁸ Ubwo mu gihugu cya Misiri haza kwima undi mwami utari waramenye Yozefu.

⁹ Abwira ingabo ze, ati «Dore umuryango w’Abayisraheli uranga ukaturuta ubwinshi, kandi ukaturusha amaboko.

¹⁰ Nimucyo tuwigire ubwenge, ejo utazarushaho kugwira, maze intambara yatera ukifatanya n’abanzi bacu, ukaturwanya, hanyuma ukazava muri iki gihugu!»

¹¹ Ubwo Abanyamisiri bashyiriraho Abayisraheli abategeka b’akazi, kugira ngo babicishe imirimo y’agahato. Ni bwo bubakiye batyo Farawo imigi y’ibihunikwa: uwa Pitomu n’uwa Ramusesi.

¹² Nyamara uko babakandamizaga, ni ko umubare wabo warushagaho kwiyongera, bagakwira hose. Nuko Abanyamisiri batangira kwanga urunuka Abayisraheli.

¹³ Abanyamisiri bakoresha Abayisraheli by’agahato n’ubugome,

¹⁴ babatera kuzinukwa ubuzima bwabo ku mpamvu y’uburetwa bukabije: nko gukata ibumba, kubumba amatafari, kuvunwa n’ubuhinzi, n’indi mirimo yose inaniza babagerekagaho ku gahato.

Farawo atoteza Abayisraheli

¹⁵ Mu Bahebureyi hari abagore babiri bazi kubyaza, umwe akitwa Shifira, undi akitwa Puwa. Umwami wa Misiri arababwira, ati

¹⁶ «Igihe muzajya mubyaza abagore b’Abahebureyi, maze mwakwitegereza igitsina cy’umwana mugasanga ari umuhungu, mujye mumwica; naho naba umukobwa, mujye mumureka abeho.»

¹⁷ Ariko abo bagore b’ababyaza batinya Imana; ntibagenza uko umwami wa Misiri yari yarababwiye, maze abahungu barabareka babaho.

¹⁸ Umwami wa Misiri ahamagaza abo bagore bazi kubyaza, arabatonganya ati «Mwabigiriye iki kureka abahungu babaho?»

¹⁹ Abagore basubiza Farawo, bati «Ni uko abagore b’Abahebureyi batameze nk’Abanyamisirikazi: ni abanyangufu, maze bakabyara umubyaza atarahagera!»

²⁰ Imana igirira neza abo babyaza. Nuko umuryango uriyongera, ugwiza amaboko.

²¹ Abo bagore babiri b’ababyaza, Imana ibahembera ko bayitinye, ibaha urubyaro.

²² Ni bwo Farawo ahaye igihugu cye cyose itegeko, agira ati «Umuhungu wese w’Umuhebureyi uzavuka, mujye mumujugunya mu Ruzi, naho abakobwa bo mujye mubareka babeho.»