Ivugururamategeko 23 - Kinyarwanda Bibiliya Ntagatifu

¹ Ntihazagire umuntu winjira muka se; ntazamworosoreho ikinyita cy’umwenda se yamworoshe.

Abantu bagomba guhezwa mu ikoraniro ritagatifu

² Umuntu wamenetse amabya, kimwe n’uwashahuwe ntibakemererwe kujya mu ikoraniro ry’Uhoraho.

³ Umuntu w’icyimanyi ntazemererwe kujya mu ikoraniro ry’Uhoraho; ndetse n’abazamukomokaho mu gisekuru cya cumi, ntibazemererwe kujya mu ikoraniro ry’Uhoraho.

⁴ Umuhamoni cyangwa Umumowabu ntibazemererwe na rimwe kujya mu ikoraniro ry’Uhoraho; ndetse n’ababakomokaho mu gisekuru cya cumi, ntibazemererwe kujya mu ikoraniro ry’Uhoraho;

⁵ kuko batabasanganije ibyo kurya n’amazi igihe mwari mu rugendo mwimuka mu Misiri, ndetse Mowabu yo ikagurira Balamu mwene Bewori, w’i Petori muri Aramu‐Naharayimu, kugira ngo akuvume.

⁶ Ariko Uhoraho Imana yawe yanze kumvira Balamu, ahubwo umuvumo we Uhoraho Imana yawe awuguhinduriramo umugisha, kuko Uhoraho Imana yawe agukunda.

⁷ Ingoma ibihumbi ntuzabashakire ubukire n’ihirwe igihe cyose ufite kubaho.

⁸ Ntuzange urunuka Umunyedomu, kuko ari mwene wanyu; ntuzange urunuka Umunyamisiri, kuko wabaye umusuhuke mu gihugu cye.

⁹ Ababakomokaho nyuma y’igisekuru cya gatatu bazemererwe kujya mu ikoraniro ry’Uhoraho.

¹⁰ Nuca ingando uteye ababisha bawe, uzirinde ikibi cyose.

¹¹ Muri mwe nihaba umugabo wahumanyijwe n’uko yisohoreyeho nijoro asinziriye, azasohoke mu ngando, yoye kuyigarukamo:

¹² nibujya kwira aziyuhagire, maze izuba nirirenga asubire mu ngando.

¹³ Uzagire ahantu hikinze hatari mu ngando, abe ari ho wituma.

¹⁴ Mu bintu byawe, uzabe ufitemo n’igihosho, maze nujya hanze kwituma, ugicukuze umwobo, nyuma uze gutwikira imyanda yawe.

¹⁵ Koko rero Uhoraho Imana yawe ubhwe agendagenda mu ngando yawe, kugira ngo akurinde kandi akurekurire ababisha bawe. Ni cyo gituma ingando yawe ari ahantu hatagatifu; ntibikwiye rero ko Uhoraho ayibonamo ikintu cyamutera ishozi: naho ubundi, yareka kujyana nawe.

Kurengera umucakara watorotse shebuja

¹⁶ Nihagira umucakara ucika shebuja, agahungira iwawe, ntuzamumusubize;

¹⁷ azagumane nawe, abe iwanyu, aho azatoranya muri umwe mu migi yanyu, kugira ngo amererwe neza. Ntuzashake kumurya imitsi.

Kudashyigikira indaya

¹⁸ Mu bakobwa b’Abayisraheli ntihazabeho indaya zigenewe gukorera ibigirwamana, no mu bahungu b’Abayisraheli ntihazabeho indaya zigenewe gukorera ibigirwamana.

¹⁹ Mu Ngoro y’Uhoraho Imana yawe, ntuzajyanemo amaronko y’umukobwa w’indaya cyangwa igihembo cy’uwo muhungu w’inyana y’imbwa, ngo ubitangeho ituro ry’uguhigura; kuko bombi ari amahano Uhoraho yanga urunuka.

Inguzanyo

²⁰ Ntuzagire icyo uguriza umuvandimwe wawe ngo umwake n’inyungu: cyaba ifeza, cyaba ibiribwa, cyangwa se ikindi kintu cyose cyashobora gushakwaho inyungu.

²¹ Umunyamahanga we, uzamugurize umutezeho inyungu; ariko umuvandimwe wawe ntuzamwake inyungu, kugira ngo Uhoraho Imana yawe azaguhere umugisha mu mirimo uzakorera mu gihugu ugiye kwinjiramo ngo ukigarurire.

Imihigo igiriwe Uhoraho

²² Nugirira umuhigo Uhoraho Imana yawe, ntuzatinde kuwuhigura; naho ubundi Uhoraho Imana yawe ntiyabura kuwukuryoza, bikagukururira icyaha.

²³ Ariko niwirinda kugira imihigo, ntibizagukururira icyaha.

²⁴ Ijambo rikuvuye mu kanwa, jya ushishikarira kurishyira mu bikorwa, ukurikije umuhigo wagiriye Uhoraho Imana yawe ku bwende, ukawivugira ubwawe.

Imirima y’undi

²⁵ Nujya mu murima w’imizabibu w’umuturanyi wawe, wemerewe kurya imbuto z’imizabibu uko ushaka, ugashira ipfa; ariko uramenye ntuzasorome ibyo utwara.

²⁶ Nujya mu murima weze w’umuturanyi wawe, ushobora gucamo amahundo n’intoki; ariko ntuzageze aho gufata umuhoro ngo ukarare imyaka y’umuturanyi wawe.