Ivugururamategeko 2 - Kinyarwanda Bibiliya Ntagatifu

¹ Nyuma twarahindukiye tujya mu butayu, twerekeza ku nyanja y’Urufunzo nk’uko Uhoraho yari yabimbwiye; tuzenguruka umusozi wa Seyiri, bimara igihe kirekire.

Abayisraheli banyura mu bihugu bya Edomu, na Mowabu, na Hamoni

² Hanyuma Uhoraho yarambwiye ati

³ «Hashize igihe kirekire muzenguruka uyu musozi, none nimuhindukire mugane mu majyaruguru!

⁴ Ati ha rubanda aya mabwiriza, uti dore mugiye kunyura ku butaka bwa bene wanyu, bene Ezawu batuye muri Seyiri. Bo bazabatinya, ariko rero namwe muzirinde,

⁵ ntimuzabarwanye; nta cyo nzabaha ku gihugu cyabo, habe n’ahangana n’aho umuntu yakandagiza ikirenge, kuko umusozi wa Seyiri naweguriye Ezawu.

⁶ Ibiryo muzarya muzabigure na bo, mubishyure amafeza; ndetse n’amazi yo kunywa, muzemere muyagure na bo mubishyure feza.

⁷ Kuko Uhoraho Imana yawe yaguhereye umugisha mu byo uzakora byose, yitaye ku rugendo wakoreye muri ubu butayu bugari; dore imyaka ibaye mirongo ine Uhoraho Imana yawe ari kumwe nawe, kandi nta cyo wigeze ubura.»

⁸ Nuko rero tunyura kure ya bene wacu, bene Ezawu batuye muri Seyiri, dukurikira inzira ica muri Araba iturutse mu karere ka Eliyati na Esiyoni-Geberi. Turakimirana, twerekeza mu butayu bwa Mowabu.

⁹ Maze Uhoraho arambwira ati «Uramenye ntugirire Mowabu urugomo, ntubarwanye, kuko nta cyo nzaguha ku gihugu cyabo: bene Loti ni bo nahaye umugi wa Ari ngo habe ubukonde bwabo.»

¹⁰ – Kera hari hatuye Abahemi, bakaba abantu b’ibihangange, benshi, kandi barebare cyane nk’Abanaki.

¹¹ Kimwe n’Abanaki, babarirwaga mu Barefayimu, ariko Abamowabu bakabita Abahemi.

¹² No muri Seyiri kera hari hatuye Abahori, maze bene Ezawu barabasahura, barabamenesha, bityo barahiturira, nk’uko Abayisraheli babigenjeje mu gihugu Uhoraho yabahayeho ubukonde. –

¹³ Uhoraho ati «Nimugende, mwambuke umugezi wa Zeredi.» Nuko twambuka umubande wa Zeredi.

¹⁴ Urugendo twakoze kuva i Kadeshi-Barineya kugeza ubwo twambutse umugezi wa Zeredi rwamaze imyaka mirongo itatu n’umunani – kugeza ubwo nyine abaturwaniriraga bose icyo gihe basaza bagashira, nk’uko Uhoraho yari yarabirahiye;

¹⁵ ndetse n’ukuboko k’Uhoraho kwarabashikamiye, kugira ngo bagabanuke mu ngando zacu, barinda bashira.

¹⁶ Urupfu rero rumaze gutsemba muri rubanda abari abatabazi bose icyo gihe,

¹⁷ Uhoraho arambwira ati

¹⁸ «Uyu munsi wambukiranye igihugu cya Mowabu, unyuze mu mugi wa Ari.

¹⁹ Nugera ahateganye na bene Hamoni, uramenye ntubagirire urugomo ngo ubarwanye, kuko nta cyo nzaguha ku gihugu cya bene Hamoni, kubera ko nacyeguriye bene Loti.

²⁰ – Icyo gihugu cyitirirwaga kandi Abarefayimu, kuko Abarefayimu bari bagituye mbere, Abahamoni bakabita Abazamuzimi:

²¹ bari abantu b’ibihangange, benshi kandi barebare cyane, mbese nk’Abanaki! Ariko Uhoraho yarabarimbuye ngo babise Abahamoni; nuko barabanyaga, barabazungura.

²² Ni na ko Uhoraho yari yaragiriye bene Ezawu batuye muri Seyiri arimbura Abahori ngo bababise; nuko barabanyaga, barabazungura, kugeza na n’ubu.

²³ Byongeye kandi, Abakafutori baturutse i Kafutori, barimbuye Abahawi bari batuye mu nsisiro za Gaza, maze barabazungura —.

Israheli yigarurira ingoma ya Sihoni

²⁴ Nuko Uhoraho ati «Nimuhaguruke mugende, mwambuke umugezi wa Arunoni! Dore nkurekuriye Sihoni Umuhemori, umwami wa Heshiboni, hamwe n’igihugu cye. Tangira ucyigarurire, umutere murwane.

²⁵ Uyu munsi, ndatangira gukangaranya amahanga yose atuye mu nsi y’ijuru, kugira ngo agutinye; abazumva bakuvuga, bazahinda umushyitsi, badagadwe imbere yawe.»

²⁶ Nuko igihe turi mu butayu bwa Kedemoti, ni bwo nohereje intumwa kwa Sihoni umwami wa Heshiboni, mubwira aya magambo y’amahoro, nti

²⁷ «Ndeka nyure mu gihugu cyawe! Nzaca mu nzira nyabagendwa, sinzagana iburyo cyangwa ibumoso;

²⁸ ibiryo bizantunga n’amazi nzanywa, uzabingurishe ku giciro cya feza; undeke gusa nitambukire ku maguru,

²⁹ nk’uko bene Ezawu batuye muri Seyiri na bene Mowabu batuye umugi wa Ari bangenjereje, kugeza igihe nzambukira Yorudani nkagera mu gihugu Uhoraho Imana yacu yaduhaye.»

³⁰ Nyamara Sihoni umwami wa Heshiboni ntiyemera ko tunyura mu gihugu cye, kuko Uhoraho Imana yawe yari yateye umutima we kunangira, ntunabashe gutekereza, kugira ngo uwo munsi amukurekurire.

³¹ Nuko Uhoraho arambwira ati «Dore nabanje kukurekurira Sihoni hamwe n’igihugu cye; ngaho tangira ucyigarurire.»

³² Sihoni hamwe n’ingabo ze zose badusanganirira i Yahasa, kugira ngo baturwanye.

³³ Nuko Uhoraho Imana yacu aramuturekurira, tumwicana n’abahungu be, kimwe n’ingabo ze zose.

³⁴ Icyo gihe dufata imigi ye yose, maze buri mugi tuwutura Imana tuwurimbura: ari abagabo, ari abagore, ari abana, ntitwasiga n’uwakirazira;

³⁵ keretse amatungo yonyine, ni yo twajyananye n’ibyo twasahuye mu migi twari twafashe.

³⁶ Uhereye kuri Aroweri yubatse ku musozi uri hejuru y’umugezi wa Arunoni, ugahera no ku mugi wubatse mu mubande waho, ukagera i Gilihadi, nta mugi n’umwe watunaniye: Uhoraho Imana yacu yari yatweguriye byose.

³⁷ Igihugu cya bene Hamoni ni cyo gusa tutegereye: aho ni inkengero zose z’umugezi wa Yaboki n’imigi yo mu bisozi n’ahandi hantu hose Uhoraho Imana yacu yari yaratubujije.