Ivugururamategeko 11 - Kinyarwanda Bibiliya Ntagatifu

¹ Uzakunde rero Uhoraho Imana yawe, ukurikize amategeko ye, imigenzo ye, amabwiriza ye n’amateka ye, ubigire iminsi yose.

Israheli irajye izirikana ibyo Imana yayigiriye

² Mwe murabizi ubu — ariko abana banyu ntibabimenye kandi ntibabyiboneye — mwe mwamenye ukuntu Uhoraho Imana yanyu yabigishije, mwamenye ubuhangange bwe, n’imbaraga n’umurego by’ukuboko kwe.

³ Mwabonye ibimenyetso bye n’ibigwi bye muri Misiri nyirizina, mwabonye ibyo yakoreye Farawo umwami wa Misiri n’igihugu cye cyose.

⁴ Mwamenye ibyo yakoreye ingabo z’Abanyamisiri, amafarasi yabo n’amagare yabo, akabubikaho amazi y’inyanja y’Urufunzo igihe bari babasatiriye, maze Uhoraho akabarimbura buheriheri.

⁵ Mwabonye kandi ibyo yabakoreye mwebwe, kuva igihe mwari mu butayu kurinda mugera hano,

⁶ n’ibyo yakoreye Datani na Abiramu, bene Eliyabu wo mu muryango wa Rubeni: imbere y’Abayisraheli bose, ubutaka bwarasamye bubamirana n’ab’iwabo bose, n’amahema yabo, ndetse n’abantu bose bari babashyigikiye.

⁷ Mbese mwiboneye n’amaso yanyu ibigwi by’Uhoraho!

⁸ Muzakomeze rero amategeko yose mbahaye uyu munsi, kugira ngo muzabe intwari, mwigarurire igihugu mugiye kwinjiramo ngo mugitunge,

⁹ maze muzarambe ku butaka Uhoraho yarahiriye kuzaha abasokuruza banyu hamwe n’urubyaro rwabo — igihugu gitemba amata n’ubuki.

Igihugu Uhoraho yitaho

¹⁰ Nanone igihugu ugiye kwinjiramo ngo ukigarurire nta bwo gihwanye n’igihugu cya Misiri mwavuyemo. Aho ngaho wabibaga imbuto zawe, ukaziyoboramo amazi ukoresheje ikirenge cyawe, nk’uko umuntu avomerera umurima w’imboga;

¹¹ naho igihugu mugiyemo ngo mukigarurire ni igihugu kirimo imisozi n’ibikombe, cyuhirwa amazi y’imvura:

¹² ni igihugu Uhoraho Imana yawe yitaho, Uhoraho Imana yawe agihozaho amaso kuva mu ntangiriro y’umwaka kugera ku ndunduro yawo.

¹³ Nimugira umwete wo kumvira koko amategeko yanjye, ayo nguhaye none, mukabigira mukunda Uhoraho Imana yanyu, munamukorera n’umutima wanyu wose n’amagara yanyu yose,

¹⁴ mu gihe gikwiye nzavubira ubutaka bwanyu imvura bukeneye, ari iy’umuhindo ari n’iy’urugaryi, muzasarure imyaka yanyu y’impeke na divayi nshya, n’amavuta y’imizeti;

¹⁵ kandi nzameza ubwatsi bw’amatungo yawe mu nzuri zawe, maze uzarye uhage.

¹⁶ Muramenye, imitima yanyu itazoshywa mugateshuka inzira, mukayoboka izindi mana, mukazipfukamira;

¹⁷ kuko icyo gihe uburakari bw’Uhoraho bwabagurumanira, akaziba ijuru, akica imvura, ubutaka ntibwongere kwera imyaka, bityo mukarimbuka bidatinze, mugashira mu gihugu cyiza Uhoraho abahaye.

¹⁸ Aya magambo yanjye mwumvise, muzayabike muri mwe, mu mitima yanyu, muyagire ikimenyetso kidasibangana mu biganza byanyu, muyatamirize mu ruhanga hagati y’amaso yanyu.

¹⁹ Muzayigishe abana banyu, muyabasubirishemo igihe wicaye iwawe n’igihe ugenda mu nzira, igihe uryamye n’igihe ubyutse.

²⁰ Uzayandike ku nkomanizo z’umuryango w’inzu yawe, no ku marembo y’imigi yawe,

²¹ kugira ngo mwebwe n’abana banyu muzarambe mu gihugu Uhoraho yarahiriye kuzaha abasekuruza banyu, uko ijuru rizahora hejuru y’isi.

²² Nimugira rwose umwete wo gukomeza ayo mategeko yose mbahaye ngo muyakurikize, mugakunda Uhoraho Imana yanyu, mukagenda mu nzira ze zose, kandi mukamwihambiraho,

²³ Uhoraho azamenesha ariya mahanga yose ari imbere yanyu, bityo munyage amahanga abaruta ubwinshi kandi abarusha amaboko.

²⁴ Ahantu hose muzashinga ikirenge hazaba habaye ahanyu; kuva ku butayu bwo mu majyepfo, kugera kuri Libani mu majyaruguru, kuva ku ruzi rwa Efurati mu burasirazuba kugera ku Nyanja y’Iburengerazuba, ngicyo igihugu cyanyu.

²⁵ Nta muntu uzatinyuka kubahangara; Uhoraho azakangaranya igihugu muzakandagiramo cyose, babatinye nk’uko yabibasezeranyije.

Muhitemo umugisha cyangwa umuvumo

²⁶ Dore, uyu munsi mbashyize imbere umugisha n’umuvumo.

²⁷ Umugisha muzawubona nimwumvira amategeko y’Uhoraho Imana yanyu mbagejejeho none;

²⁸ umuvumo muzawugira nimutumvira amategeko y’Uhoraho Imana yanyu, mugateshuka inzira mbabwirije none, ngo mwikurikirire izindi mana mutari muzi.

²⁹ Kandi Uhoraho Imana yawe namara kukugeza mu gihugu ugiye kwinjiramo kugira ngo ukigarurire, uzavugire umugisha ku musozi wa Garizimu, n’umuvumo uwuvugire ku musozi wa Ebali.

³⁰ Iyo misozi yombi iri hakurya ya Yorudani, (hirya y’inzira igana iburengerazuba mu gihugu cy’Abakanahani batuye muri Araba), iteganye na Giligali, hafi y’ibiti by’imishishi by’i More.

³¹ Koko rero mugiye kwambuka Yorudani, mwigarurire igihugu Uhoraho Imana yanyu abahaye: muzakigarurira maze mugituremo . . .

³² Ariko rero muzajye mwihatira gukurikiza amategeko yose n’imihango mbashyikirije uyu munsi.