Itangiriro 49 - Kinyarwanda Bibiliya Ntagatifu

Yakobo aha umugisha abahungu be, uko ari cumi na babiri

¹ Yakobo ahamagaza abana be, maze arababwira ati «Nimuterane, mbamenyeshe ibizababaho mu bihe bizaza.

² Nimwegerane mwumve, bana ba Yakobo, mwumve so Israheli.

³ Rubeni, uri imfura yanjye, imbaraga zanjye, umuganura w’ingufu zanjye. Wuzuye ishema n’ububasha.

⁴ Wisumagira nk’amazi yo mu isumo! Kuko wuriye uburiri bwa so, ukanduza uburyamo bwanjye.

⁵ Simewoni na Levi ni abavandimwe, inkota zabo zifatanya mu bwicanyi.

⁶ Umutima wanjye ntukajye mu migambi yabo, sinkifatanye n’amateraniro yabo; kuko bishe abantu mu burakari bwabo, maze mu burahuke bwabo bagatema ibitsi by’amapfizi!

⁷ Burakavumwa uburakari bwabo bukaze, n’umujinya wabo ukabije! Nzabavangura muri Yakobo, mbanyanyagize muri Israheli.

⁸ Yuda, woweho abo muva inda imwe bazagusingiza. Ukuboko kwawe gutsikamiye ijosi ry’abanzi bawe, na bene so bazagupfukamira.

⁹ Yuda, uri nk’icyana cy’intare, mwana wanjye, uzamutse uvuye ku rugamba! Yaciye bugufi, abunda nk’intare, kandi nk’intare y’ingore, ni nde wamutsimbura?

¹⁰ Inkoni y’ubwami ntizatirimuka mwa Yuda, n’inkoni y’ubutware ntizajya kure y’ibirenge bye, kugeza igihe Uwo igenewe azazira, Uwo amahanga azayoboka.

¹¹ Azirika ku muzabibu indogobe ye, ku ishami ryawo umutavu w’indogobe ye y’ingore. Amesa umwambaro we muri divayi, n’igishura cye mu mutuku w’imizabibu.

¹² Amaso ye yatukujwe na divayi, n’amenyo ye yezwa n’amata.

¹³ Zabuloni azatura ku nkombe y’inyanja, ku cyambu cy’amato, Sidoni bazagabana imbibi.

¹⁴ Isakari ni indogobe ikomeye, iryamye mu nzitiro rwagati.

¹⁵ Yumvise uko kuruhuka ari byiza, kandi abona ko igihugu gihimbaje, maze atega umugongo ngo bamukorere, yemera imirimo y’uburetwa.

¹⁶ Dani azaca imanza mu muryango we, nk’uko indi miryango ya Israheli ibigenza.

¹⁷ Dani arabe inzoka mu muhanda, impiri mu kayira, iruma ifarasi ku gitsi, maze uwo yari ihetse agacuranguka.

¹⁸ Uhoraho, niringiye agakiza kawe!

¹⁹ Gadi, abambuzi baramwambura, na we akambura abasigaye inyuma.

²⁰ Asheri agira ibyo kurya binuze, akagabura ibyo kurya bikwiye umwami.

²¹ Nefutali ni imparakazi yiruka cyane, ikabyara ibyana biteye ubwuzu.

²² Yozefu ni urugemwe rushinze hafi y’isoko idudubiza, amashami yarwo akarenga hejuru y’urukuta rw’urugo.

²³ Abarashi baramugondoje, bamurasa bamusagariye.

²⁴ Ariko umuheto we ntiwavunwe, n’amaboko ye yagumanye umurego, abikesheje ikiganza cy’Imana, Nyir’ubutwari ya Yakobo, n’izina ry’Umushumba n’Urutare bya Israheli,

²⁵ abikesheje Imana, Imana ya so, ihora igufasha, na Nyir’ububasha uguha umugisha! Imigisha y’ijuru mu kirere, imigisha y’inyenga ibundikiye ikuzimu, imigisha y’amabere n’iy’inda ibyara!

²⁶ Dore imigisha ya so isumba imigisha y’imisozi yahozeho n’ibyifuzo by’imirambi ya kera: irakoranire ku mutwe wa Yozefu, ku ruhanga rw’uwagizwe indatwa mu bavandimwe be.

²⁷ Benyamini ni ikirura gitanyagura, mu gitondo aconshomera icyo yishe, nimugoroba akagabagabanya iminyago.»

Urupfu rwa Yakobo

²⁸ Abo bose ni bo bagize imiryango cumi n’ibiri ya Israheli. Kandi ngibyo ibyo se yababwiye. Yabahaye umugisha; aha buri muryango umugisha uwukwiriye.

²⁹ Nuko arabategeka, ati «Ngiye gusanga abanjye; muzampambe hamwe na ba sokuru, mu buvumo buri mu murima wa Efuroni w’Umuheti.

³⁰ Ubwo buvumo buba mu murima w’i Makipela, ahareba i Mambure, mu gihugu cya Kanahani. Abrahamu yawuguze na Efuroni w’Umuheti ngo ube ubukonde, bajye bawuhambamo.

³¹ Aho ni ho Abrahamu n’umugore we Sara bahambwe, ni ho Izaki n’umugore we Rebeka bahambwe; ni na ho nahambye Leya.

³² Uwo murima n’ubuvumo buwurimo byaguzwe kuri bene Heti.»

³³ Yakobo amaze guha ayo mategeko abana be, asubiza amaguru ku buriri, arapfa, asanga abe.