Itangiriro 4 - Kinyarwanda Bibiliya Ntagatifu

Kayini na Abeli

¹ Muntu abonana na Eva, umugore we. Eva arasama, abyara Kayini, maze aravuga ati «Nungutse umuntu nkesha Uhoraho.»

² Ku buheta abyara Abeli murumuna we. Abeli aba umushumba w’amatungo naho Kayini aba umuhinzi w’ubutaka.

³ Igihe kirahita, Kayini ashyira Uhoraho amaturo avuye mu myaka y’imirima ye.

⁴ Abeli na we azana uburiza mu matungo ye, agerekaho n’ibinure byayo. Uhoraho ashima Abeli n’amaturo ye,

⁵ ariko ntiyashima Kayini n’amaturo ye. Kayini biramurakaza cyane, maze mu maso he harahinduka, yubika umutwe.

⁶ Uhoraho abaza Kayini ati «Urakajwe n’iki? Kandi ni iki cyatumye uhinduka utyo mu maso?

⁷ Nugenza neza, ntuzubura umutwe se? Naho nutagenza neza, itonde kuko icyaha kibunze ku irebe ry’umuryango wawe ngo kigusumire, ariko wowe ugomba kukirusha amaboko.»

⁸ Kayini abwira murumuna we Abeli, ati «Tujyane mu mirima.» Nuko igihe bari mu mirima, Kayini asimbukira murumuna we Abeli maze aramwica.

⁹ Uhoraho abaza Kayini ati «Abeli murumuna wawe ari hehe?» Undi ati «Simbizi! Mbese ndi umurinzi wa murumuna wanjye?»

¹⁰ Uhoraho ati «Wakoze ibiki? Amaraso ya murumuna wawe wamennye, ngaha arantabariza mu gitaka.

¹¹ Ubu ngubu ubaye ikivume ku butaka, bwo bwasamye ukabwuhira amaraso ya murumuna wawe.

¹² Nuhinga ubutaka, ntibuzongera kukurumbukira; uzahora uri inzererezi yangara ku isi.»

¹³ Kayini abwira Uhoraho, ati «Igihano umpaye kirakabije.

¹⁴ Dore unyirukanye kuri ubu butaka, unciye no mu maso yawe. Nzahora ndi inzererezi, nangara ku isi, kandi uzambona wese azanyica!»

¹⁵ Uhoraho aramubwira ati «Yewe, uzica Kayini uwo ari we wese, azabihanirwa karindwi.» Nuko Uhoraho ashyira ikimenyetso kuri Kayini, kugira ngo uwo bazahura wese atazamukubita mu ngusho.

¹⁶ Nuko Kayini ava mu maso y’Uhoraho, ajya gutura mu gihugu cyitwa Nodi, mu burasirazuba bwa Edeni.

Abakomoka kuri Kayini

¹⁷ Kayini abonana n’umugore we, umugore arasama abyara Henoki. Nuko Kayini agiye kubaka umugi, awitirira umuhungu we, awita Henoki.

¹⁸ Henoki abyara Iradi; Iradi abyara Mehuyayeli, Mehuyayeli abyara Metushayeli; Metushayeli abyara Lameki.

¹⁹ Nuko Lameki azana abagore babiri; umwe akitwa Ada, undi akitwa Sila.

²⁰ Ada abyara Yabali; ni we wabaye sekuruza w’abatura mu mahema bakagira amatungo.

²¹ Murumuna we yitwa Tubali; ni we wabaye sekuruza w’abacuranga inanga, bakavuza n’imyirongi.

²² Sila we abyara TubaliKayini; ni we wabaye sekuruza w’abacuzi bose b’umuringa n’ubutare. Mushiki wa Tubali‐Kayini yari Nahama.

²³ Lameki abwira abagore be, ati «Ada na Sila, nimuntege amatwi! Bagore ba Lameki, nimwumve ijambo ryanjye! Nishe umugabo ankomerekeje, nica n’umwana ansaritse.

²⁴ Ubwo Kayini yahorewe karindwi, Lameki we azahorerwa mirongo irindwi na karindwi!»

Seti n’abamukomokaho

²⁵ Adamu abonana n’umugore we; umugore abyara umuhungu amwita Seti, ati «kuko Imana inshumbushije indi mbuto, mu kigwi cya Abeli, Kayini yishe.»

²⁶ Seti na we abyara umuhungu amwita Enoshi. Nuko kuva ubwo batangira kwambaza Izina ry’Uhoraho.