Itangiriro 33 - Kinyarwanda Bibiliya Ntagatifu

Yakobo ahura na Ezawu

¹ Yakobo ngo yubure amaso, abona Ezawu aje aherekejwe n’abantu magana ane. Abana abaha Leya na Rasheli n’abaja bombi.

² Abaja n’abana babo bajya imbere, hakurikiraho Leya n’abana be, hanyuma hakurikiraho Rasheli na Yozefu.

³ Naho we abarangaza imbere, yunama karindwi ku butaka, arinda agera kuri Ezawu mukuru we.

⁴ Ezawu amusanganira n'ingoga, amugwa mu nda, aramuhobera, aranamusoma, nuko bombi baraturika bararira.

⁵ Ezawu yubura amaso abona abagore n’abana, hanyuma arabaza ati «Bariya mupfana iki?» Yakobo ati «Ni abana Imana yahaye umugaragu wawe.»

⁶ Nuko abaja n’abana babo baregera, barapfukama.

⁷ Leya na we araza hamwe n’abana be, barapfukama. Hanyuma haza Rasheli na Yozefu, na bo barapfukama.

⁸ Ezawu aravuga ati «Iriya nkambi yose twahuye ni iy’iki?» Yakobo ati «Ni ukugira ngo databuja andebe neza.»

⁹ Ezawu ati «Ibyo mfite birampagije, muvandimwe, ibyawe bigume bibe ibyawe!»

¹⁰ Yakobo ati «Reka da! Niba undebye neza, urakira amaturo nguhaye, kuko nabonye amaso yawe nk’uko umuntu abona mu maso h’Imana, maze ukanyakira neza.

¹¹ Akira rero amaturo nakugejejeho, kuko Imana yankungahaje, nkaba nta cyo mbuze.» Aramuhata, undi aremera.

¹² Ezawu ati «Ngwino tugende, ndakugenda iruhande.»

¹³ Yakobo ati «Databuja azi ko abana ari ngombwa kubitondesha, kandi ko ngomba kwita ku ntama, n’inka z’imbyeyi. Uwazihutisha n’umunsi n’umwe, amatungo yose yashira.

¹⁴ Databuja rero nangende imbere, jye ndaza nitonze, nkurikije ingendo y’amatungo nshoreye n’intambwe y’abana turi kumwe, kugeza igihe tuzagerera iwawe i Seyiri.»

¹⁵ Ezawu ati «Reka se, ahubwo ngusigire bamwe mu bantu banjye turi kumwe.» Yakobo ati «Ni ab’iki? Mfa kubona gusa ubugwaneza bwa databuja!»

¹⁶ Uwo munsi nyine, Ezawu ni ko gufata inzira ye, yisubirira i Seyiri.

¹⁷ Naho Yakobo agenda agana ahitwa Sukoti; ahubaka inzu, ahubaka n’ibiraro by’amatungo ye. Ni cyo cyatumye aho hantu ahita Sukoti (bisobanura ngo «ibiraro».)

Yakobo atura hafi y’i Sikemu

¹⁸ Yakobo avuye mu kibaya cya Aramu, agaruka amahoro ku mugi wa Sikemu, uri mu gihugu cya Kanahani. Nuko aca ingando imbere y’umugi.

¹⁹ Agura umurima aho ngaho i Sikemu, aho yari yashinze ingando; awugura ibiceri ijana bya feza na bene Hamori, se wa Sikemu nyine.

²⁰ Ahubaka urutambiro arwita ’El, Imana ya Israheli’.