Itangiriro 32 - Kinyarwanda Bibiliya Ntagatifu

¹ Labani azinduka kare cyane, ahobera abuzukuru be n’abakobwa be, abaha umugisha; nyuma asubira iwe.

Yakobo yitegura guhura na Ezawu

² Yakobo akomeza urugendo. Agira atya ahura n’intumwa z’Imana.

³ Yakobo azibonye aravuga ati «Aha ni inkambi y’Imana». Aho hantu ahita Mahanayimu (bisobanura ngo «Inkambi ebyiri».)

⁴ Yakobo yohereza intumwa kuri Ezawu mukuru we, aho yari ari i Seyiri mu mirambi ya Edomu.

⁵ Arabategeka ati «Muzabwire databuja Ezawu muti ’Umugaragu wawe Yakobo aradutumye ngo: Nabaye kwa Labani, ndahatinda kugeza ubu.

⁶ Mfite ibimasa, indogobe, n’andi matungo. Mfite abagaragu n’abaja. None nsanze ari ngombwa kohereza intumwa ngo mbimenyeshe databuja Ezawu kugira ngo mugushe neza».

⁷ Intumwa zigaruka kuri Yakobo zivuga ziti «Twageze kuri mwene so Ezawu, ariko agusanganije igitero cy’abantu magana ane.»

⁸ Yakobo ashya ubwoba, umutima urakuka; hanyuma agabanya abantu, amashyo yose, n’ingamiya mo inkambi ebyiri.

⁹ Aribwira ati «Ezawu natera inkambi ya mbere akabatsinda, abo mu nkambi ya kabiri bazashobora guhunga.»

¹⁰ Yakobo ariyamirira, ati «Mana ya data Abrahamu, Mana ya data Izaki, Uhoraho, wowe wambwiye uti ’Subira mu gihugu cyawe, mu gihugu cya ba sokuruza, nzakugirira neza’,

¹¹ sinkwiriye ubuntu n’ineza wagiriye umugaragu wawe w’intamenyekana! Dore nambutse Yorudani iyi ngiyi, nitwaje inkoni gusa; none mpindukiye ngabye inkambi ebyiri.

¹² Ndakwinginze, unkize mwene data Ezawu; ndamutinya, ndatinya ko aza akatwica, ari jye, ari abagore n’abana.

¹³ Kandi warambwiye uti ’Nzakugirira neza, ngwize urubyaro rwawe nk’umusenyi wo ku nkombe y’inyanja utabarika’!»

¹⁴ Yakobo arara aho ngaho iryo joro. Yakobo yenda mu byo yari atunze, akuramo ibyo gutura mukuru we Ezawu:

¹⁵ ihene magana abiri, isekurume makumyabiri, intama magana abiri n’isekurume zazo makumyabiri,

¹⁶ ingamiya zikamwa mirongo itatu n’izazo, inka mirongo ine, imfizi icumi, indogobe z’ingore makumyabiri n’iz’ingabo icumi.

¹⁷ Buri shyo arishyira ukwaryo, maze yose ayashinga abagaragu be; arababwira ati «Munjye imbere, musige intera hagati y’amashyo.»

¹⁸ Umugaragu wa mbere aramutegeka ati «Mukuru wanjye nimumara guhura, akakubaza ati ’Uri uwa nde? Urajya hehe? Ayo matungo ushoreye ni aya nde?’

¹⁹ Uzamusubize uti ’Ni ay’umugaragu wawe Yakobo, ni ayo atuye databuja Ezawu, kandi dore aje adukurikiye.’»

²⁰ Uwa kabiri n’uwa gatatu, mbese abagaragu be bose bari bashoreye amatungo, abategeka kuvuga kimwe. Arababwira ati «Ngayo amagambo muzabwira Ezawu nimuhura,

²¹ muzavuge muti ’Dore umugaragu wawe Yakobo na we ari inyuma’.» Kuko yibwiraga ati «Ndamwuruza amaturo andangaje imbere; hanyuma dushobore guhuza amaso, wenda yanyakira neza.»

²² Nuko ya maturo barayajyana, naho we yongera kurara aho.

Yakobo akirana n’Imana

²³ Iryo joro Yakobo arahaguruka, ahagurukana n’abagore be uko ari babiri, n’abaja be uko ari babiri, ntiyasiga abana be cumi n’umwe; nuko yambuka umugezi wa Yaboki.

²⁴ Arabambutsa bose, yambutsa n’ibyo yari atunze byose.

²⁵ Yakobo asigara aho wenyine. Haza umugabo akirana na we, kugeza mu museke.

²⁶ Abonye ko adashoboye gutsinda Yakobo, amukora ku mutsi wo ku nyonga y’itako, igihe bari hasi ku butaka, itako rirakuka, rikuka bagikirana.

²⁷ Wa mugabo aramubwira ati «Ndekura ngende, dore umuseke urakebye.» Yakobo ati «Sinkurekura utampaye umugisha.»

²⁸ Undi aramubaza ati «Witwa nde?» Ati «Nitwa Yakobo.»

²⁹ Undi ati «Ntibazongere kukwita Yakobo, ahubwo Israheli, kuko wakiranye n’Imana n’abantu, kandi ugatsinda.»

³⁰ Yakobo aramubwira ati «Ndakwinginze, mpishurira izina ryawe.» Undi ati «Izina ryanjye urarimbariza iki?» Nuko amuha umugisha, awumuhera aho ngaho.

³¹ Aho hantu Yakobo ahita Penuweli (bisobanura ngo ’Mu maso y’Imana’), agira ati «Kuko nahaboneye Imana mu maso, nkarenga nkabaho.»

³² Izuba ryarashe arenga Penuweli, agenda acumbagira itako.

³³ Ni yo mpamvu kugeza na n’ubu Abayisraheli batarya umutsi uri mu itako. Kuko Imana yari yakoze Yakobo ku mutsi wo ku nyonga y’itako.