Itangiriro 28 - Kinyarwanda Bibiliya Ntagatifu

¹ Nuko Izaki ahamagaza Yakobo, amuha umugisha, amutegeka amubwira ati «Ntuzashake umugore mu bakobwa b’i Kanahani.

² Haguruka ugende ujye mu kibaya cya Aramu, kwa sokuru Betuweli; uzahishakire umugore mu bakobwa ba Labani, nyokorome.

³ Imana Nyir’ububasha niguhe umugisha, iguhe kororoka no kugwira, uzabe ikoraniro ry’imiryango!

⁴ Wowe n’urubyaro rwawe, izabahe umugisha yahaye Abrahamu, kugira ngo uzatunge igihugu wimukiyemo, igihugu Imana yahaye Abrahamu!»

⁵ Nuko Izaki yohereza Yakobo, aragenda ajya mu kibaya cya Aramu kwa Labani, mwene Betuweli w’Umwaramu, akaba musaza wa Rebeka, nyina wa Yakobo na Ezawu.

⁶ Ezawu azirikana uko Izaki yahaye umuhugu we Yakobo umugisha, akamutegeka kudashaka umugore mu bakobwa b’i Kanahani, akanamwohereza mu kibaya cya Aramu gushakayo umugore.

⁷ Abonye kandi ko Yakobo yumviye se na nyina, akigira mu kibaya cya Aramu,

⁸ noneho Ezawu amenya atyo ko se Izaki atishimiraga abakobwa b’i Kanahani.

⁹ Ni bwo asanze Ismaheli ngo acyure Mahalata, umukobwa wa Ismaheli mwene Abrahamu. Mahalata uwo yari mwene se wa Nebayoti. Nuko Ezawu amuharika abagore bandi yari atunze.

Yakobo arota

¹⁰ Yakobo rero ava i Berisheba agana i Harani.

¹¹ Aza kugera ahantu araharara, kuko izuba ryari rimaze kurenga. Yenda ibuye ry’aho hantu, araryisegura, maze araryama.

¹² Aza kurota abona urwego rushinze ku isi rukagera ku ijuru, abamalayika b’Imana barumanuka, bakaruzamuka.

¹³ Nuko abona nguyu Uhoraho amuhagaze iruhande, amubwira ati «Ndi Uhoraho, Imana ya so Abrahamu, Imana ya Izaki. Ubutaka uryamyeho nzabuguha, mbuhe n’urubyaro rwawe.

¹⁴ Abazagukomokaho bazangana n’umukungugu wo ku isi, bazisanzurira mu burasirazuba no mu burengerazuba, mu majyepfo no mu majyaruguru. Amoko yose y’isi azaherwa umugisha muri wowe no mu rubyaro rwawe.

¹⁵ Dore, ndi kumwe nawe; nzakurinda aho uzajya hose, kandi nzakugarura muri iki gihugu. Sinzagutererana, kugeza ubwo nzaba nujuje ibyo nakubwiye byose.»

¹⁶ Yakobo ava mu bitotsi, ariyamirira, ati «Mu by’ukuri Uhoraho ari aha hantu, ariko jye nkaba ntari mbizi!»

¹⁷ Ubwoba buramutaha; ati «Mbega aha hantu ko hateye ubwoba! Aha hantu si ikindi kitari Inzu y’Imana, aha hantu ni ryo rembo ry’ijuru!»

¹⁸ Nuko Yakobo arazinduka, yenda rya buye yari yiseguye, araryegura ararishinga, arisukaho amavuta ku isonga.

¹⁹ Aho hantu ahita Beteli (ari byo kuvuga ’Inzu y’Imana’), ariko mbere uwo mugi witwaga Luzi.

²⁰ Nuko Yakobo arahiga ati «Imana niba turi kumwe ikandinda muri uru rugendo ndimo, nimpa ifunguro ikampa n’umwambaro,

²¹ ninsubiza amahoro kwa data, Uhoraho ni we uzambera Imana koko.

²² Iri buye nshinze rizaba inzu y’Imana, kandi mu byo uzampa byose nzajya nkuraho kimwe cya cumi nkiguture.»