Itangiriro 21 - Kinyarwanda Bibiliya Ntagatifu

ABRAHAMU NA IZAKI Ivuka rya Izaki

¹ Uhoraho agenderera Sara nk’uko yari yarabivuze, amugenzereza uko yari yaramubwiye.

² Sara asama inda, abyarira umusaza Abrahamu umwana w’umuhungu, ku gihe Imana yari yavuze.

³ Abrahamu yita umuhungu we Izaki, uwo Sara yari yamubyariye.

⁴ Hanyuma Abrahamu agenya Izaki ku munsi wa munani, nk’uko Imana yari yarabimutegetse.

⁵ Izaki avuka, Abrahamu yari ageze mu kigero cy’imyaka ijana.

⁶ Sara araterura ati «Imana inteye guseka, n’undi wese uzabyumva azansekera!»

⁷ Arongera ati «Ni nde wigeze abwira Abrahamu ngo ’Sara azonsa abana’? Nyamara dore mubyariye umuhungu mu zabukuru!»

Hagara na Ismaheli bameneshwa

⁸ Umwana arakura, aracuka. Umunsi wo gucutsa Izaki, Abrahamu akoresha ibirori, ararika abantu benshi, arabagaburira.

⁹ Bukeye, wa muhungu Hagara Umunyamisirikazi yari yarabyariye Abrahamu, Sara amubona akina.

¹⁰ Ni ko kubwira Abrahamu, ati «Menesha uriya muja n’umwana we, kuko umwana w’uriya muja atagomba kuzagabana umurage n’umwana wanjye Izaki.»

¹¹ Ibyo birakaza Abrahamu cyane, kuko yari umuhungu we.

¹² Ariko Imana iramubwira iti «Iby’umuhungu wawe n’umuja wawe ntibigutere umutima mubi. Icyo Sara akubwira cyose umwumve, kuko Izaki ari we umuryango witiriwe izina ryawe uzaturukaho.

¹³ Naho umuhungu w’umuja wawe, na we nzamugira umuryango, kuko na we ari uwawe.»

¹⁴ Abrahamu arazinduka cyane, yenda umugati n’isaho y’uruhu irimo amazi, abiha Hagara amuhekesha umwana ku bitugu, aramusezerera. Aragenda ajya kuzerera mu butayu bwa Berisheba.

¹⁵ Amazi aza gushira muri ya saho y’uruhu, umwana amuta mu gihuru.

¹⁶ Aragenda ajya kwicara ahitaruye, nk’intera y’aho umuheto wageza. Ubwo yaribwiraga ati «Noye kureba aho umwana wanjye apfa!» Yicara ahitegeye, atera hejuru ararira.

¹⁷ Imana yumva ijwi ry’umwana, maze Malayika w’Imana ahamagarira Hagara mu ijuru ati «Hagara, ni iki? Wigira ubwoba, kuko Imana yumvise ijwi ry’umwana aho ari.

¹⁸ Haguruka! Ujyane umwana umufashe ukuboko, kuko nzamugira umuryango mugari.»

¹⁹ Imana imuhumura amaso, abona iriba aragenda avoma amazi yuzuza isaho, aramiza umwana.

²⁰ Nuko Imana ibana n’uwo muhungu, arakura, atura mu butayu, aba umurashi.

²¹ Atura mu butayu bwa Parani, nyina amushyingira umukobwa wo mu gihugu cya Misiri.

Abrahamu n’Abimeleki bagirana Isezerano

²² Muri iyo minsi Abimeleki na Pikoli, umutware w’ingabo ze, babwira Abrahamu bati «Imana iri kumwe nawe mu byo ukora byose.

²³ Noneho rero ngaho ndahira ku Mana tukiri aha ngaha, ko utazampenda ubwenge, jyewe, umwana wanjye, cyangwa umwuzukuru wanjye. Uzatubera incuti, jyewe n’igihugu utuyemo, nk’uko twakubereye incuti.

²⁴ Abrahamu ati «Ndabirahiye.»

²⁵ Abrahamu yinubira Abimeleki ku by’iriba abagaragu b’Abimeleki bari bamunyaze.

²⁶ Abimeleki atera hejuru ati «Sinzi uwabigize! Nawe nta bwo wigeze ugira icyo ubimbwiraho, kandi nanjye ni uyu munsi nabyumvise.»

²⁷ Abrahamu azana amatungo magufi n’amaremare, abiha Abimeleki; bombi bagirana isezerano.

²⁸ Abrahamu arobanura abana b’intama z’inyagazi, indwi zo mu mukumbi we.

²⁹ Abimeleki abwira Abrahamu, ati «Utwo twana tw’intama tw’utunyagazi turindwi urobanuye, bisobanura iki?»

³⁰ Aramusubiza ati «Uko ari turindwi, ndatuguha kugira ngo bimbere gihamya cy’uko ari jye wafukuye iryo riba.»

³¹ Ni cyo cyatumye aho hantu bahita Berisheba, kuko ari ho barahiriye bombi.

³² Nuko bagirana isezerano i Berisheba. Abimeleki ahagurukana na Pikoli umutware w’ingabo ze, basubira mu gihugu cy’Abafilisiti.

³³ Abrahamu atera igiti cya tamarisi, agitera i Berisheba, yambarizayo Izina ry’Uhoraho, Imana y’ubuziraherezo.

³⁴ Abrahamu amara iminsi muri icyo gihugu cy’Abafilisiti yari yarasuhukiyemo.