Itangiriro 12 - Kinyarwanda Bibiliya Ntagatifu

ABRAHAMU Imana ihamagara Abramu, imusaba kuva mu gihugu cye

¹ Uhoraho abwira Abramu ati «Wimuke uve mu gihugu cyawe, mu muryango wawe, mu nzu ya so, ujye mu gihugu nzakwereka.

² Nzakugira umuryango munini, nzaguha umugisha. Izina ryawe nzarigira ikirangirire, uzaba umunyamugisha.

³ Abazakuvuga neza, nzabaha umugisha; uzagutuka nzamuvuma. Imiryango yose y’isi izaguherwamo umugisha.»

⁴ Nuko Abramu aragenda, agenza uko Uhoraho yamubwiye, na Loti barajyana. Abramu yimuka mu mugi wa Harani; yari ageze mu kigero cy’imyaka mirongo irindwi n’itanu.

⁵ Abramu ahagurukana n’umugore we Sarayi, na Loti umuhungu wa mwene se, hamwe n’ibintu byose bari batunze, n’abagaragu bose bari barahakiye i Harani; bagenda berekeza mu gihugu cya Kanahani. Nuko bagera mu gihugu cya Kanahani.

Abramu yambukiranya Kanahani, akamanukira mu Misiri

⁶ Abramu yambukiranya igihugu cyose, agera ahantu hitwa Sikemu, ku giti cy’umushishi wa More. Abakanahani bari bagituye muri icyo gihugu.

⁷ Uhoraho abonekera Abramu, aramubwira ati «Urubyaro rwawe nzaruha iki gihugu.» Aho ngaho Abramu ahubaka urutambiro, arwubakira Uhoraho wari wamubonekeye.

⁸ Ahavuye, ajya ku musozi uri iburasirazuba bwa Beteli. Nuko ashinga ihema rye hagati ya Beteli iburengerazuba, na Hayi mu burasirazuba. Aho ni ho yubakiye urutambiro Uhoraho, maze ahambariza izina rye.

⁹ Hanyuma Abramu agenda yimuka, agana muri Negevu.

¹⁰ Haza gutera inzara mu gihugu; Abramu ni ko kumanuka ajya mu Misiri guturayo, kuko inzara yari yabiyogoje mu gihugu.

¹¹ Igihe agiye kugera mu Misiri abwira umugore we Sarayi, ati «Dore, uri umugore mwiza mu maso, ufite uburanga.

¹² Abanyamisiri nibakubona bazavuga bati ’Uriya ni umugore we!’ Jyewe bazanyica, wowe bakureke ubeho.

¹³ Ndabigusabye, uravuge ko uri mushiki wanjye, kugira ngo bamfate neza kubera wowe; mbone no gukiza amagara yanjye, mbikesha wowe.»

¹⁴ Koko rero Abramu ageze mu Misiri, Abanyamisiri basanga umugore we ari mwiza byahebuje.

¹⁵ Abatware ba Farawo bamaze kumubona, bajya kumuratira Farawo; uwo mugore bamuzana mu ngoro ye.

¹⁶ Nuko bafata neza Abramu ku mpamvu z’uwo mugore, abona amatungo magufi n’amatungo maremare, n’indogobe, n’abagaragu n’abaja, n’indogobe z’ingore n’ingamiya.

¹⁷ Ariko Uhoraho ahanisha ibyago bikomeye Farawo n’urugo rwe, amuhora Sarayi umugore wa Abramu.

¹⁸ Farawo ni ko guhamagaza Abramu, aramubwira ati «Wangize ibiki? Ni iki cyatumye utamenyesha ko ari umugore wawe?

¹⁹ Kuki wambwiye ngo ni mushiki wawe, bigatuma mugira umugore wanjye? Ngaho noneho, dore umugore wawe, mufate ugende!»

²⁰ Farawo ategeka abantu be, baramwirukana, we, n’umugore we, n’ibye byose.