Itangiriro 11 - Kinyarwanda Bibiliya Ntagatifu

Umunara w’i Babeli

¹ Ku isi yose hari ururimi rumwe, n’imvugo imwe.

² Mu iyimuka ry’abantu bava mu burasirazuba, babona ikibaya mu gihugu cya Shineyari, barahatura.

³ Nuko barabwirana bati «Nimuze, tubumbe amatafari, tuyatwikire mu itanura.» Amabuye bayasimbuza amatafari, n’urwondo rwo kuyafatanisha barusimbuza ubujeni.

⁴ Nuko bati «Nimuze twiyubakire umugi n’umunara ukora ku ijuru, maze izina ryacu ribe ikirangirire, kugira ngo tutazatatana ku isi hose.»

⁵ Uhoraho aramanuka, aza kureba uwo mugi n’uwo munara bene Muntu bubakaga.

⁶ Nuko Uhoraho aravuga ati «Dore bose hamwe baremye umuryango umwe, bafite n’imvugo imwe. Ubwo batangiye gukora biriya, nta wundi mugambi uzabananira!

⁷ Reka tumanuke maze ururimi bavuga turusobanye, hatazagira uwongera kumva icyo undi avuze!»

⁸ Nuko Uhoraho abakura aho abanyanyagiza ku isi hose, ibyo kubaka wa mugi barabireka.

⁹ Ni cyo cyatumye uwo mugi bawita Babeli (ari byo kuvuga isobanya), kuko ari ho Uhoraho yasobanyirije indimi zo ku isi yose.

Urubyaro rwa Semu kugeza kuri Abramu

¹⁰ Dore rero urubyaro rwa Semu: Semu amaze imyaka ijana avutse, abyara Arupagishadi mu mwaka wa kabiri umwuzure ushize.

¹¹ Amaze kubyara Arupagishadi, Semu abaho indi myaka magana atanu, abyara abahungu n’abakobwa.

¹² Arupagishadi amaze imyaka mirongo itatu n’itanu avutse, abyara Shela.

¹³ Arupagishadi amaze kubyara Shela, abaho indi myaka magana ane n’itatu, abyara abahungu n’abakobwa.

¹⁴ Shela amaze imyaka mirongo itatu avutse, abyara Eberi.

¹⁵ Shela amaze kubyara Eberi, abaho indi myaka magana ane n’itatu, abyara abahungu n’abakobwa.

¹⁶ Eberi amaze imyaka mirongo itatu n’ine avutse, abyara Pelegi.

¹⁷ Eberi amaze kubyara Pelegi, abaho indi myaka magana ane na mirongo itatu, abyara abahungu n’abakobwa.

¹⁸ Pelegi amaze imyaka mirongo itatu avutse, abyara Rewu.

¹⁹ Pelegi amaze kubyara Rewu, abaho indi myaka magana abiri n’icyenda, abyara abahungu n’abakobwa.

²⁰ Rewu amaze imyaka mirongo itatu n’ibiri avutse, abyara Serugu.

²¹ Rewu amaze kubyara Serugu, abaho indi myaka magana abiri n’irindwi, abyara abahungu n’abakobwa.

²² Serugu amaze imyaka mirongo itatu avutse, abyara Nahori.

²³ Serugu amaze kubyara Nahori, abaho indi myaka magana abiri, abyara abahungu n’abakobwa.

²⁴ Nahori amaze imyaka makumyabiri n’icyenda avutse, abyara Tera.

²⁵ Nahori amaze kubyara Tera, abaho indi myaka ijana na cumi n’icyenda, abyara abahungu n’abakobwa.

²⁶ Tera amaze imyaka mirongo irindwi avutse, abyara Abramu, Nahori na Harani.

Urubyaro rwa Tera

²⁷ Dore urubyaro rwa Tera: Tera yabyaye Abramu, Nahori na Harani. Harani yabyaye Loti.

²⁸ Harani apfa mbere ya se Tera, agwa mu gihugu cye kavukire, ari cyo Uri y’Abakalideya.

²⁹ Abramu na Nahori bararongora; muka Abramu yitwaga Sarayi, muka Nahori akitwa Milika, umukobwa wa Harani. Uwo Harani yari se wa Milika, akaba na se wa Yisika.

³⁰ Sarayi ariko yari ingumba, nta mwana yagiraga.

³¹ Tera ajyana Abramu umuhungu we, na Loti mwene Harani umwuzukuru we, na Sarayi umukazana we, umugore wa Abramu; nuko abavana Uri y’Abakalideya ngo abajyane mu gihugu cya Kanahani. Bageze i Harani, barahatura.

³² Iminsi yose Tera yabayeho ni imyaka magana abiri n’itanu, nuko apfira i Harani.