Imigani 9 - Kinyarwanda Bibiliya Ntagatifu

Abatumirwa b’ubuhanga

¹ Ubuhanga bwubatse inzu yabwo, burayinogereza buteramo inkingi ndwi,

² bubaga amatungo yabwo, butegura divayi, maze ndetse butunganya ameza.

³ Bwohereje abaja babwo, na bwo bwigira mu mpinga z’umugi burangurura ijwi, bugira buti

⁴ «Ushaka kujijuka, nanyure hano!» Bubwira n’uw’igicucu, buti

⁵ «Nimuze, murye ku mugati wanjye, munywe no kuri divayi nabateguriye.

⁶ Nimureke ubupfayongo, muboneze inzira y’ubwenge maze muzabeho!»

Umusekanyi n’umuhanga

⁷ Uhana umusekanyi agakurizaho kugusuzugura, wacyaha umugome bikagukururira ibitutsi.

⁸ Ntuzahane uhora asekana, atazavaho akwanga; ariko nuhana umuhanga azagukundira icyo.

⁹ Uzihere umuhanga azunguka kurushaho, niwigisha intungane iziyungura ku byo isanganywe.

¹⁰ Kubaha Uhoraho, ni yo ntangiriro y’ubuhanga, bikaba n’ubumenyi buranga abatagatifujwe be.

¹¹ Koko rero, nzatuma ubaho igihe kirekire, kandi n’imyaka y’ubuzima bwawe iziyongera.

¹² Niba uri umuhanga, ni wowe wigirira neza, naho niba ukwenana, ni wowe wihemukira.

Abatumirwa b’ubusazi

¹³ Ubusazi ni umugore nyirabiruru, ni umupfayongo kandi ntabimenye!

¹⁴ Yicaye mu muryango w’inzu ye, ku ntebe, mu mpinga y’umugi,

¹⁵ akabiza abagenzi bigendera, agira ati

¹⁶ «Ushaka kujijuka, nanyure hano!» Abwira n’uw’igicucu, ati

¹⁷ «Amazi yahishwe araryoha, naho ibiryo byo mu mbere bikaryohera!»

¹⁸ Ubwo ariko cya gicucu nticyamenya ko cyegereye abapfuye, kimwe n’abandi yahamagaye bakagana mu kibaya cy’ikuzimu.