Imigani 7 - Kinyarwanda Bibiliya Ntagatifu

Umugore w’indaya ashuka umusore

¹ Mwana wanjye, uzite ku magambo yanjye, amategeko yanjye uzayahamane.

² Amategeko yanjye ujye uyatunganya, bizakuviramo kubaho, inyigisho zanjye zikubere nk’imboni zo mu maso.

³ Uzabihambire ku ntoki zawe, ubyandike mu mutima wawe, nk’aho ari ku kabaho.

⁴ Uzabwire ubuhanga, uti «Uri mushiki wanjye!» naho ubwenge ubwite ngo «Mugenzi wanjye.»

⁵ Ibyo bizakurinda umugore w’indaya n’umuvantara ufite amagambo aryohereye.

⁶ Nahagaze mu idirishya, ndebera mu myenge yaryo,

⁷ mbona kimwe muri bya bicucu; mu bahungu narabutswemo umusore utagira ubwenge.

⁸ Yanyuraga mu nzira, hafi y’aho uwo mugore w’indaya yari atuye, nuko akaboneza agana iwe,

⁹ haba ku mugoroba ku gicamunsi, haba mu gicuku mu ijoro rwagati.

¹⁰ Noneho uwo mugore akamusanganira, yambaye nk’indaya, uburyarya bumwuzuye umutima.

¹¹ Aba yarubiye, nta rutangira, amaguru ye ahora yirukanka, ntajya aguma iwe.

¹² Nguwo mu mayira, nguwo mu isoko; aho ari hose, aba afite icyo yubikiye.

¹³ Ubwo rero, aramusingira, akamusomagura, akamubwira nta soni, ati

¹⁴ «Nagombaga gutura igitambo cyo gushimira Uhoraho, none uyu munsi narangije amasezerano yanjye.

¹⁵ Ni yo mpamvu naje kugusanganira kugira ngo ngushake, none nakubonye.

¹⁶ Uburiri bwanjye nabushasheho ibiringiti, imyenda y’amabara menshi, na hariri yo mu Misiri.

¹⁷ Nabuminjagiyeho manemane, ishangi n’umusagavu.

¹⁸ Ngwino twishimishe kugeza mu gitondo; tunezerwe hamwe mu rukundo!

¹⁹ Umugabo wanjye ntari imuhira, yazindukiye ahantu kure;

²⁰ yitwaje isaho ya feza, azagaruka ukwezi gutaha kwazoye.»

²¹ Ubwo nyine yifashisha iyo mvugo y’indyarya, akamwemeza, akamushukisha amagambo ye asize umunyu.

²² Nuko wa musore akamwoma mu nyuma, nk’imfizi y’inka igiye mu ibagiro, cyangwa umusazi baboshye bakamujyana mu ihaniro kugeza ubwo umwambi umuhinguranije umwijima.

²³ Aba ameze nk’inyoni yirukankira umutego, ntamenye ko ari ubuzima bwe agiye koreka.

²⁴ None rero, bana, nimuntege amatwi, mwumve amagambo mbabwira.

²⁵ Umutima wawe ntuzigere uboneza muri ibyo birere, ngo uyobere muri ayo mayira.

²⁶ Koko rero, bene abo bagore bishe benshi, barabagusha, ndetse muri abo bishwe, harimo abanyembaraga!

²⁷ Inzu y’indaya ni inzira iboneza ikuzimu, imanuka igana mu masenga y’umwijima n’urupfu.