Imigani 5 - Kinyarwanda Bibiliya Ntagatifu

Kwirinda ubusambanyi

¹ Mwana wanjye, uritondere ubuhanga bwanjye, utege amatwi amabwiriza yanjye,

² kugira ngo ugumane ibitekerezo biboneye, n’imvugo yawe ihoremo ubumenyi.

³ Ni koko, iminwa y’umugore w’indaya iba isize ubuki, n’amagambo ye aryohereye kurusha amavuta.

⁴ Ariko ibyo ntibimubuza gusharira nk’umuravumba, amaherezo ugasanga atyaye nk’inkota ifite ubugi impande zombi.

⁵ Ibirenge bye biramanuka bigana urupfu, intambwe ze zasatiriye inyenga.

⁶ Aho kugira ngo ashake inzira igana ubuzima, arorongotana aho atazi.

⁷ None rero, bana banjye, muntege amatwi, mwoye kwirengagiza amagambo yanjye.

⁸ Uzagendere kure inzira ye, woye kwegera umuryango w’inzu ye,

⁹ hato atazavaho aha icyubahiro cyawe abandi, n’ubuzima bwawe akabutegeza abanyarugomo;

¹⁰ abavantara bagahazwa n’imitsi yawe, ibyo wagokeye bigatunga undi,

¹¹ maze amaherezo wamara kuzongwa wese, ugacura imiborogo.

¹² Ubwo rero uzicuza, ugira uti «Byangendekeye bite kugira ngo nange guhanwa, umutima wanjye usuzugure inyigisho?

¹³ Ni kuki ntumvise ijwi ry’abigisha banjye, nkanga gutega amatwi abanyoboraga?

¹⁴ Habuze gato ngo mbonere akaga mu ikoraniro no mu muryango!»

Kudahemukira umugore washatse

¹⁵ Uzajye unywa amazi yo mu iriba ryawe, amazi ava mu isoko wicukuriye.

¹⁶ Amasoko yawe ntakavuburire hanze, n’amariba yawe ngo asendere mu mayira.

¹⁷ Uzayiharire wenyine, woye kuyasangira n’abanyamahanga.

¹⁸ Isoko yawe nigire umugisha! Jya unezezwa n’umugore washatse mukiri bato;

¹⁹ akubere nk’impara y’inkundwakazi, cyangwa isha iteye ubwuzu. Amabere ye azahore agushyushya, ntugahweme kunyurwa n’urukundo rwe.

²⁰ Mwana wanjye, ni kuki wararukira umugore w’undi, ugahobera umuvantara umusoma mu gituza?

²¹ Ni koko, imigenzereze ya buri wese yiyerekana mu maso y’Uhoraho, agakurikirana inzira ze.

²² Umugome azafatirwa mu mutego w’ubwicanyi bwe, ajishwe n’ingoyi y’icyaha cye.

²³ Azicwa no kutagira uburere, azire ubusazi bwe bwamurenze.