Imigani 31 - Kinyarwanda Bibiliya Ntagatifu

VIII. AMAGAMBO YA LEMUWELI

¹ Ngaya amagambo Lemuweli, umwami wa Masa, yatojwe na nyina:

² Umva, mwana wanjye, mwana nibyariye! Nkubwire iki se, mwana namye nsaba Imana?

³ Ntuzategeze ubusore bwawe abagore, cyangwa ngo wishinge indaya zoreka n’abami.

⁴ Lemuweli we, dore ibitabereye abami: abami ntibakwiye kunywa divayi, n’ibikomangoma ngo birarikire inzoga zihiye,

⁵ kugira ngo batanywa bakibagirwa ibyategetswe, maze bakaburizamo imanza z’abakene bose.

⁶ Inzoga ihiye, mujye muyiha uri burimbuke, divayi na yo muyihe ufite intimba ku mutima;

⁷ bityo azanywa yibagirwe amagorwa ye, yoye kwibuka umuruho we!

⁸ Ujye uvuganira ikiragi, wite ku batagira kivurira,

⁹ wature, uce imanza mu butungane, maze usubize abakene n’abatishoboye uburenganzira bwabo.

IX. IGISINGIZO CY’UMUGORE W’UMUTIMA Alefu

Alefu

¹⁰ Umugore w’umutima azabonwa na nde? Ko asumbije agaciro amasaro meza!

Beti

Beti

¹¹ Umugabo we amwiringira abikuye ku mutima, maze agakunda agatunganirwa.

Gimeli

Gimeli

¹² Uwo mugore aramunezereza, na rimwe ntajya amutenguha, iminsi yose y’ubuzima bwe.

Daleti

Daleti

¹³ Ashakashaka ubudodo n’ubuhivu bworoshye, maze intoki ze zigashishikarira kuboha.

He

He

¹⁴ Amera nk’amato y’abacuruzi, ibimutunga akabikura kure.

Vawu

Vawu

¹⁵ Abyuka kare butaracya, agateganya ifunguro ry’abo mu rugo, akabona gukwiza imirimo mu baja.

Zayini

Zayini

¹⁶ Yaba abonye umurima umushimishije akawugura, akawuteramo imizabitu ibyawe n’urwunguko rw’imirimo ye.

Heti

Heti

¹⁷ Arakenyera agakomeza, ahasigaye agakora atikoresheje.

Teti

Teti

¹⁸ N’ubwo abona ibintu bye bigenda neza, na nijoro itara rye riba ryaka akora.

Yodi

Yodi

¹⁹ Ikiganza cye agicyamurira ku rubohero, maze intoki ze zigasingira ikizingo cy’ubudodo.

Kafu

Kafu

²⁰ Amaboko ye ayaramburira abakene, akagirira ubuntu ababuraniwe.

Lamedi

Lamedi

²¹ Ntajya yikanga imbeho y’itumba, kuko abo mu nzu ye bose bambaye ibisusurutse.

Memu

Memu

²² Ubwe yibohera ibiringiti, umwambaro we ni hariri inoze y’umuhemba.

Nuni

Nuni

²³ Umugabo we yubahwa mu nama y’abakuru, iyo yicaranye n’abasheshe akanguhe b’ako karere.

Sameki

Sameki

²⁴ Aboha imyenda akayigurisha, n’umucuruzi uhita akamuguraho imikandara.

Ayini

Ayini

²⁵ Umwete n’umurava ni byo bimuranga, maze ibihe bizaza akabirebana agatwenge.

Pe

Pe

²⁶ Agira ubwitonzi iyo ajya kuvuga, agatanga inama zuje urugwiro.

Tsade

Tsade

²⁷ Akurikirira hafi iby’urugo rwe, maze ntakunde kwicara nta cyo akora.

Kofu

Kofu

²⁸ Abahungu be burabahagurutsa bakamushima, umugabo we akamuvuga ibigwi.

Reshi

Reshi

²⁹ Ati «Hari abakobwa benshi bagize ubutwari, ariko wowe wabarushije bose!»

Shini

Shini

³⁰ Ikimero kirashukana n’uburanga bugashonga, ahubwo umugore utinya Uhoraho ni we ukwiye kuratwa.

Tawu

Tawu

³¹ Mujye mumwegurira ibyavuye mu kuboko kwe, kandi aratirwe mu ruhame ibyo yakoze!