Imigani 3 - Kinyarwanda Bibiliya Ntagatifu

Kumenya no gutinya Uhoraho

¹ Mwana wanjye, ntuzibagirwe inyigisho zanjye, kandi umutima wawe ujye wizirika ku mategeko yanjye;

² bizakuviramo kuramba biguhe n’amahoro menshi.

³ Ubupfura n’ubudahemuka uzabikomereho, ubyambare mu ijosi, ubyandike mu mutima wawe,

⁴ kuko ari byo bizagutonesha ukagira ishya mu maso y’Imana n’ay’abantu.

⁵ Uzizere Uhoraho n’umutima wawe wose, woye kwiringira ubwenge bwawe;

⁶ mu migenzereze yawe yose, ujye umwibuka, na we azaringaniza inzira zawe.

⁷ Ntuzibonemo ubuhanga, ahubwo uzatinye Uhoraho kandi wirinde ikibi,

⁸ bizatuma umubiri wawe unoga, n’ingingo zawe zose zigororoke.

⁹ Uzahimbaze Uhoraho mu byo utunze byose, umuture umuganura w’umusaruro wawe;

¹⁰ bityo ibigega byawe bizuzura ingano, na divayi isendere urwengero rwawe.

¹¹ Mwana wanjye, ntugahinyure uburere Uhoraho agutoza, cyangwa ngo winubire amabwiriza ye,

¹² kuko Uhoraho acyaha uwo akunda nk’uko umubyeyi agenzereza umwana umwizihiza.

Ubuhanga burusha agaciro zahabu

¹³ Hahirwa uwageze ku buhanga, akaba yarungutse ubwenge,

¹⁴ kuko uwo mutungo uruta feza, n’inyungu yabyo igasumba kure iya zahabu.

¹⁵ Ubuhanga buruta amasaro y’igiciro, kandi nta n’ikindi bihwanye mu byo umuntu yakwifuza.

¹⁶ Iburyo bwabwo hatanga kuramba, naho ibumoso hagatanga umukiro n’ikuzo!

¹⁷ Inzira zabwo zuzuyemo ibyishimo kandi ziganjemo amahoro.

¹⁸ Ni igiti cy’ubuzima ku babushyikiriye; hahirwa ababufite!

¹⁹ Uhoraho yahangishije isi ubuhanga, akomeresha ijuru ubwenge.

²⁰ Ubuhanga bwe ni bwo bwatumye inyenga zifunguka, n’ibicu bikabyara urume.

Uhoraho arinda umunyabuhanga

²¹ Mwana wanjye, ubwitonzi n’ubushishozi ntukabikureho amaso, ahubwo uzabikurikirane,

²² ubitungishe roho yawe, bibe umurimbo w’ijosi ryawe.

²³ Bityo rero, uzagenda mu nzira nta cyo wikanga, ikirenge cyawe cyoye gutsikira.

²⁴ Nujya kuryama nta kizaguhungabanya, uzasinzira mu mahoro.

²⁵ Ntuzatinye icyago cy’impanuka cyangwa igitero cy’abagome,

²⁶ kuko Uhoraho azakwishingira, intambwe zawe akazirinda umutego.

Gukunda mugenzi wawe

²⁷ Ntukirengagize kugirira neza ubikeneye kandi ubishoboye.

²⁸ Niba ufite icyo agusaba, ntukamubwire ngo «Genda uzagaruke ejo, ni ho nzaguha.»

²⁹ Ntukagambanire mugenzi wawe kandi ari we mwabanaga akwizeye.

³⁰ Ntihazagire uwo mutongana nta mpamvu, mu gihe nta kibi yagukoreye.

³¹ Ntuzifuze kumera nk’umunyarugomo, cyangwa ngo ukurikire imwe mu nzira ze,

³² kuko Uhoraho yanga abagome, agakunda ab’indakemwa.

³³ Uhoraho avuma inzu y’umugome, ariko agaha umugisha aho intungane zituye.

³⁴ Asuzugura abapfayongo, agatonesha abicisha bugufi.

³⁵ Abanyabuhanga bazagabirwa ikuzo, naho ibicucu bikorwe n’ikimwaro.