Imigani 29 - Kinyarwanda Bibiliya Ntagatifu

¹ Umuntu bahana agashinga ijosi, nta kabuza azavunika atunguwe.

² Iyo intungane zigwiriye, abantu barishima, naho iyo umugiranabi atwara, rubanda bacura imiborogo.

³ Ukunda ubuhanga ashimisha se, naho ugenda mu ndaya atagaguza ibintu bye.

⁴ Umwami w’intabera atengamaza igihugu cye, naho uwaka imisoro y’ikirenga aragisenya.

⁵ Umuntu urata mugenzi we akabya, aba amushyize umutego mu maguru.

⁶ Icyaha cy’umugiranabi ni umutego azafatirwamo, naho intungane irishima ikavuza impundu.

⁷ Intungane ihangayikwa n’amagorwa y’abakene, naho umugome ntakozwa ubumenyi.

⁸ Abasekanyi batera impagarara mu mugi, ariko abanyabuhanga bahosha uburakari.

⁹ Iyo umunyabuhanga aburana n’umupfayongo, yaba arakaye cyangwa se aseka, ntashobora kumugusha neza.

¹⁰ Abantu b’abicanyi banga umunyamurava, naho ab’intabera baramushakashaka.

¹¹ Umupfayongo yasasa umujinya we, naho umunyabuhanga arawubundikira, akawucubya.

¹² Iyo umutware yita ku mazimwe, abayoboke be bose baba abagome.

¹³ Umukene n’umugiranabi bafite icyo bahuriyeho, Uhoraho ni we umurikira amaso yabo bombi.

¹⁴ Umwami ukemura imanza z’abakene acishije mu kuri, ingoma ye yashinze imizi burundu.

¹⁵ Inkoni no gucyaha bitoza ubuhanga, naho umusore batereye iyo, akoza nyina isoni.

¹⁶ Iyo abagome biyongera, icyaha cyiha intebe, ariko intungane zizababona barimbuka.

¹⁷ Hana umuhungu wawe, uzagira amahoro, kandi azagutera ibyishimo ku mutima.

¹⁸ Iyo abahanuzi babuze, imbaga yiberaho uko ibonye, ariko ukurikiza itegeko azahirwa.

¹⁹ Nta bwo amagambo ari yo ahana umucakara, n’iyo yayumvise, ntayitaho.

²⁰ Ese ujya witegereza umuntu wihutira kuvuga? Uwo nguwo we, wakwizera ko n’umupfayongo azamutanga kuri byinshi.

²¹ Niba umucakara ateteshejwe kuva mu bwana, amaherezo azigomeka.

²² Umuntu w’umunyamushiha akurura intonganya, umunyamwaga akagwiza ibicumuro.

²³ Ubwirasi bw’umuntu buzamutesha agaciro, naho ufite umutima wiyoroshya azakuzwa.

²⁴ Usangira n’igisambo aba yiyanga ubwe, yumva imivumo bagitongera, akinumira.

²⁵ Gutinya abantu birimo umutego, naho uwiringira Uhoraho ntazahungabana.

²⁶ Benshi baharanira ubutoni ku mutware, ariko Uhoraho ni we uha buri wese ikimukwiye.

²⁷ Intungane ziterwa ishozi n’umugiranabi, umugome agatera isoni abanyamurava.