Imigani 27 - Kinyarwanda Bibiliya Ntagatifu

¹ Ntukiringire iby’ejo, kuko utazi icyo uyu munsi uhaka.

² Aho kwirata, waratwa n’abandi; washimwa n’umuvantara aho kwishima ubwawe!

³ Ibuye riraremera, n’umucanga ni uko, ariko umujinya w’umusazi ubirusha byombi!

⁴ Uburakari butera urugomo, umujinya wo ugahurura nk’isuri, ariko se ni nde wakwihanganira ishyari?

⁵ Intonganya zeruye ziruta ubucuti buhishe.

⁶ Incuti y’indahemuka ntizatindiganya kuguhana, ariko umwanzi agusoma akubeshya.

⁷ Akanwa kahaze kinemfaguza ibinyagu by’ubuki, ariko iyo inda ishonje, n’icyaruraga kirayiryohera.

⁸ Umuntu uhunze igihugu cye, aba ameze nk’igishwi gitaye icyari cyacyo.

⁹ Amavuta n’imibavu binezeza umutima, kandi incuti ituje irasusurutsa kurusha inama wakwigira.

¹⁰ Ntuzatererane incuti yawe cyangwa incuti ya so, ntuzirukire ku muvandimwe wawe mu gihe cy’amakuba; umuturanyi uri bugufi aruta umuvandimwe uri iyo gihera.

¹¹ Mwana wanjye, urabe umunyabuhanga, unezeze umutima wanjye, bityo nshobore gusubiza untuka.

¹² Umunyabwenge abona icyago akihisha, naho injiji zikakiyahuraho, zikabizira.

¹³ Fata umwenda we, kuko yishingiye uwo atazi, umwake ingwate kuko yemarariye abavantara!

¹⁴ Umuntu nazinduka arangurura ijwi aha umugisha mugenzi we, ibyo bizitwa ko amuvumye.

¹⁵ Umugore w’ingare asa n’umutonyi ujojoba ubutitsa imvura yaguye;

¹⁶ gushaka kumutangira, ni nko gufata umuyaga, cyangwa kuyoza amavuta intoki.

¹⁷ Icyuma gityazwa n’icyuma, n’umuntu anoza imyifatire ya mugenzi we.

¹⁸ Uwita ku giti cy’umutini azarya imbuto zacyo, kandi urinda shebuja, na we azabishimirwa.

¹⁹ Nk’uko amazi agaragaza ishusho y’uyarebamo, ni na ko umutima w’umuntu uranga nyirawo.

²⁰ Nk’uko ikuzimu no mu nyenga hadahaga, ni na ko amaso y’umuntu adahaga kurora.

²¹ Uruganda rutunganya feza, itanura rigatunganya zahabu, ariko umuntu ashimirwa imyifatire ye.

²² N’iyo wasekurira umupfayongo mu isekuru, mbese nk’uko umuhini umenagura ingano, ubusazi bwe ntibwamuvaho.

²³ Uzajye umenya uko amatungo yawe ameze, wite ku mashyo yawe;

²⁴ kuko ubukire budahoraho iteka, ndetse n’ikamba ry’abami ntirihererekanywa ubuziraherezo.

²⁵ Jya utema ubwatsi maze ubundi butohe, wahire n’ubwo ku misozi;

²⁶ intama zawe zizakwambike ubwoya bwazo, naho amasekurume uyaguremo akarima;

²⁷ ihene zawe zizakamwe cyane zigutunge, hamwe n’umuryango wawe n’abaja bawe.