Imigani 26 - Kinyarwanda Bibiliya Ntagatifu

¹ Urubura mu mpeshyi, imvura mu isarura, byombi ntibikwiye; nkanswe icyubahiro ku mupfayongo.

² Nk’uko igishwi gihunga, cyangwa intashya ikaguruka, ni na ko umuvumo w’amaherere udahama.

³ Ikiboko gikwiriye ifarasi, icyuma gikwiriye akanwa k’indogobe; inkoni zo zibereye ibitugu by’umupfayongo!

⁴ Ntugasubize umupfayongo ukurikije ubusazi bwe, hato utazavaho umera nka we.

⁵ Ujye usubiza umupfayongo ukurikije ubusazi bwe, hato atazibeshya ko yabaye umunyabuhanga.

⁶ Utumye umupfayongo, aba yigoreye ubusa, ni nk’aho yakubise amaguru y’ubusa.

⁷ Uko amaguru y’ucumbagurika aba adashinga, ni na ko umugani uvuzwe n’igicucu uba udafashe.

⁸ Guha umupfayongo icyubahiro, ni nko gupfunyika ibuye mu muhumetso.

⁹ Umugani uvuzwe n’umupfayongo, ni nk’ihwa rihanda mu kiganza cy’umusinzi.

¹⁰ Ukoresha umupfayongo cyangwa umusinzi, aba ari nk’umurashi w’umuheto ukomeretsa abihitira bose.

¹¹ Uko imbwa isubira ku birutsi byayo, ni na ko umupfayongo akomera ku busazi bwe.

¹² Ese wabonye umuntu wirata ko ari umunyabuhanga? Uwo nguwo we, wakwizera ko n’umupfayongo azabumutanga.

¹³ Umunebwe aravuga ati «Mu nzira hari ikirura! Mu mayira hari intare!»

¹⁴ Uko urugi rwihindukiza ku mapata yarwo, ni na ko umunebwe yihindukiza ku buriri bwe.

¹⁵ Umunebwe ashora ikiganza ku mbehe, bikamunanira kukigarura ku munwa.

¹⁶ Umunebwe yibwira ko arusha ubuhanga abantu barindwi basubizanya ubushishozi.

¹⁷ Kwivanga mu ntonganya z’abandi, ni nko gukurura amatwi y’imbwa yigendera.

¹⁸ Hari usa n’umuntu wihindura umusazi, akajugunya amafumba yaka, akarasa n’imyambi yica!

¹⁹ Ni wa wundi ubeshya mugenzi we, agahindukira, akavuga ngo «Nikiniraga!»

²⁰ Iyo umuriro ubuze inkwi, urazima, kandi iyo inzimuzi zidahari, intonganya zirahosha.

²¹ Nk’uko umuntu yongera amakara mu ziko n’inkwi mu muriro, ni na ko umunyamahane asembura intonganya.

²² Amagambo y’inzimuzi araryoha, kandi ashyika ku nkingi z’umutima.

²³ Amagambo meza avuye ku mutima mubi, ni nk’ibishunga bya feza bitatse ku rujyo.

²⁴ Uwangana ahorana amagambo areshya, ariko mu mutima we aba abitsemo ikinyoma;

²⁵ nakuzanaho imvugo nziza, ntukamwizere, kuko umutima we uba wuzuye amahano.

²⁶ N’aho urwango rwe rwakwikingiranya mu buryarya, amaherezo umugome azatahurwa imbere ya bose.

²⁷ Ucukura urwobo azarugwamo, kandi ushungura ibuye, ni we rizagarukaho.

²⁸ Ururimi rubeshya rwanga abo rwahemukiye, kandi umunwa w’indyarya ukurura urupfu.