Imigani 24 - Kinyarwanda Bibiliya Ntagatifu

¹ Ntukagirire abagome ishyari kandi ntukifuze kubana na bo,

² kuko umutima wabo ugambiriye ubwicanyi, iminwa yabo ikavuga ibibi.

³ Inzu yubakwa n’ubuhanga, kandi igakomezwa n’ubwenge;

⁴ ubumenyi ni bwo butuma ibigega byuzura ibintu byiza byose kandi by’agaciro.

⁵ Umunyabuhanga aruta umunyembaraga, kandi n’ufite ubumenyi akaruta umunyabigango;

⁶ nuko rero nushoza urugamba, uzabanze urwitegure, kandi wizeye abajyanama benshi bazaguha gutsinda.

⁷ Ubumenyi burenze kure umupfayongo, ntakagire icyo arevura abaturage bakoranye.

⁸ Ugambiriye kugira nabi, bamwita umunyamayeri.

⁹ Igicucu nta kindi gitekereza atari icyaha, kandi umupfayongo atera abantu ishozi.

¹⁰ Nuba ikigwari amakuba yaje, ubutwari bwawe buzaba ari nta bwo.

¹¹ Uzarokore abakatiwe urwo gupfa, utabare n’abahutazwa bajyanywe aho bazicirwa!

¹² Ntuzavuge ngo «Ariko ntitwari tubizi!» Upima imitima se ntabyumva? Uwakubumbye arabizi, kandi azitura buri muntu akurikije imyifatire ye.

¹³ Mwana wanjye, jya urya ubuki kuko ari bwiza, kandi ikinyagu cyabwo kinurira akanwa kawe.

¹⁴ Ubimenye, n’ubuhanga ni ko bumereye umutima wawe. Nuburonka, uzabaho neza mu gihe kizaza, maze icyizere cyawe cyoye gupfa ubusa.

¹⁵ Wa mugome we, ntukareme igico ku rugo rw’intungane, kandi ntuzayisenyere inzu!

¹⁶ Koko rero, intungane n’iyo yagwa incuro ndwi, irongera ikabyuka, naho abagome borama mu makuba.

¹⁷ Umwanzi wawe nagwa, ntukabyinire ku rukoma, natsikira, umutima wawe ntukishime,

¹⁸ hato Uhoraho atavaho abibona akabigaya, maze akirengagiza uburakari yari yamugiriye.

¹⁹ Ntugahagarikwe umutima n’abagiranabi, cyangwa ngo ugirire ishyari abagome,

²⁰ kuko umuntu mubi ataramba, n’itara ry’abagome rirazima.

²¹ Mwana wanjye, jya wubaha Uhoraho n’umwami, kandi ntugacudike n’abakunda guhindagura ibintu,

²² kuko ibyago bizabatungura, ndetse nta n’uzi amakuba azabatera.

IV. INDI MIGANI Y’ABANYABUHANGA

²³ Izi na zo ni inama z’abanyabuhanga: Si byiza guca urubanza ubera.

²⁴ Ubwira umugome ngo «Uri intungane», imbaga iramuvuma, n’amahanga akamwanga urunuka;

²⁵ ariko abamucyaha baranezerwa, kandi bakaronka umugisha n’umukiro.

²⁶ Uguhaye igisubizo cy’ukuri, aba aguhobeye agusoma.

²⁷ Banza ukiranuke n’imirimo y’igasozi, utunganye imirima yawe, hanyuma uzabone kubaka inzu yawe.

²⁸ Ntugashinje mugenzi wawe nta mpamvu, wakwiyemeza se kubeshyeshya umunwa wawe?

²⁹ Ntuzavuge ngo «Uko yangenje, ni ko nzamugenzereza! Buri wese nzamwitura ibyo yangiriye!»

³⁰ Nanyuze hafi y’umurima w’umunebwe, warimo imizabibu y’uwo munyabwenge buke.

³¹ Nasanze wararariyemo ikigunda, wuzuyemo amahwa, n’uruzitiro rw’amabuye rwarasenyutse.

³² Jyewe naritegereje, ndatekereza, ndareba, maze nkuramo iyi nyigisho:

³³ «Urasinzira gato, ugahwekera, ukipfumbata kugira ngo usinzire;

³⁴ nyamara ubwo ubukene n’ubutindi biba birekereje, bikagutera nk’umujura w’ingufu.»