Imigani 19 - Kinyarwanda Bibiliya Ntagatifu

¹ Umukene urangwa n’umurava aruta ufite ururimi rw’uburiganya akaba n’umupfayongo.

² Ahatari ubumenyi, umwete nta cyo umara, kandi iyihuse yabyaye ibihumye.

³ Ubusazi bw’umuntu ni bwo bumuyobya, n’umutima we ukarakarira Uhoraho.

⁴ Ubukire bukurura incuti nyinshi, naho umukene atana n’incuti ye.

⁵ Utangwaho umugabo akabeshya, azahanwa, kandi n’ubunza ibinyoma ntazarokoka.

⁶ Igikomerezwa gishagarwa n’indyarya nyinshi, kandi abantu bose bakunda ugira ubuntu.

⁷ Abavandimwe b’umukene bamwanga bose, none se incuti ni zo zitazamuhungaho?

⁸ Uwunguka ubwenge aba yikunda ubwe, naho ukomeza ubumenyi aba agira amahirwe.

⁹ Utangwaho umugabo akabeshya, azahanwa, kandi n’ubunza ibinyoma azarimbuka.

¹⁰ Kuba mu bukire, ntibibereye umupfayongo, n’umugaragu ntakwiriye gutegeka abatware.

¹¹ Umuntu ushyira mu gaciro, bituma atarakara vuba, agaheshwa ikuzo no kwihanganira inabi yagiriwe.

¹² Uburakari bw’umwami ni nk’imitontomo y’intare, ariko ineza ye ikamera nk’ikime cyatonze ku byatsi.

¹³ Umwana w’ikigoryi ashyira se mu makuba, naho intonganya z’umugore ni nk’umutonyi udahwema kujojoba.

¹⁴ Umurage uva ku babyeyi ni inzu n’umutungo, naho umugore uzi ubwenge, Uhoraho ni we umutanga.

¹⁵ Ubunebwe butera gusinzira ubuticura, kandi umunyamwete muke ahorana inzara.

¹⁶ Uwubahiriza amategeko aba arinze ubuzima bwe, naho uhinyura inzira zayo azapfa.

¹⁷ Ugiriye impuhwe umukene, aba agurije Uhoraho, kandi iyo neza ni we uzayimwitura.

¹⁸ Jya uhana umuhungu wawe bikiri mu maguru mashya, ariko ntukarakare ngo ugeze aho kumwica.

¹⁹ Umunyamujinya wa cyane yikururira ibihano, iyo umwihoreye, arashyekerwa.

²⁰ Jya wumva inama, wemere bakwigishe, bizatuma uhinduka umunyabuhanga.

²¹ Umuntu yigira imigambi myinshi ku mutima, ariko icyo Uhoraho ashaka ni cyo gikorwa.

²² Icyo umuntu yifuza ku wundi, ni ubudahemuka, kandi umukene aruta umubeshyi.

²³ Gutinya Uhoraho bitanga ubuzima, uzijuta, usinzire neza, nta cyago kiguteye.

²⁴ Umunebwe ashora ikiganza ku mbehe, ariko ntashobore kwitamika.

²⁵ Uzakubite umusekanyi, injiji izakurizaho guca akenge, nucyaha umunyabwenge, azasobanukirwa amenye.

²⁶ Ujujubya se kandi akirukana nyina, aba ari umwana gito kandi uteye ishozi.

²⁷ Mwana wanjye, nureka kumva inyigisho, bizakuviramo kohoha kure y’amagambo y’ubumenyi.

²⁸ Uhamya ibinyoma aba asuzuguye ubutabera, kandi umunwa w’abagiranabi unyurwa n’amahugu.

²⁹ Abasekanyi bateganirijwe ibihano, kandi ibicucu bizakubitwa inkoni mu bitugu.