Imigani 16 - Kinyarwanda Bibiliya Ntagatifu

¹ Umuntu yigira imigambi ku mutima, ariko igisubizo gitangwa n’Uhoraho.

² Inzira za muntu zose, ahora abona zimunogeye, ariko Uhoraho ni we ugenzura ikiri ku mutima.

³ Ibikorwa byawe biragize Uhoraho, maze imigambi yawe izatungane.

⁴ Uhoraho yahanze byose bifite icyo bigenewe, yewe n’umugiranabi yaremewe umunsi w’ibyago.

⁵ Umutima wikuza utera Uhoraho ishozi, nta kabuza uzahanwa!

⁶ Ubudahemuka n’umurava bihanagura icyaha, gutinya Uhoraho birinda umuntu ikibi.

⁷ Iyo Uhoraho yashimye imyifatire y’umuntu, ageza n’aho atuma abanzi be bigorora na we.

⁸ Uduke turimo ubutungane, turuta inyungu nyinshi z’amahugu.

⁹ Umutima w’umuntu uzirikana inzira anyuramo, ariko Uhoraho ni we uyimukomezamo.

¹⁰ Umwami aba afite imvugo y’Imana mu munwa we, iyo aca imanza, ururimi rwe ntirurenganya.

¹¹ Uhoraho ashimishwa n’iminzani iboneye, ni we wategetse uko bagomba gupima.

¹² Umwami ugira nabi aba akoze ishyano, kuko ubutabera ari bwo bushimangira ingoma.

¹³ Iminwa itaryarya itona ku mwami, abavuga ukuri arabakunda.

¹⁴ Uburakari bw’umwami bushobora kurimbura benshi, ariko umunyabuhanga arabuhosha.

¹⁵ Iyo mu maso y’umwami hakeye, benshi bibaviramo ubuzima, ubugwaneza bwe bunezeza nk’imvura yo ku muhindo.

¹⁶ Kunguka ubuhanga biruta zahabu iyunguruye, kandi kuronka ubwenge bisumba feza.

¹⁷ Inzira y’intabera ni ukwirinda ikibi, uwitondera aho anyura akiza amagara ye.

¹⁸ Ujya kurimbuka abanza kwirata! n’ugiye guhanuka abanza kwikuza!

¹⁹ Kwicisha bugufi hamwe n’abanyabyago, biruta gusangira iminyago n’abirasi.

²⁰ Uwita ku ijambo azatengamara, kandi hahirwa uwisunga Uhoraho.

²¹ Umunyabuhanga ku mutima, bamwita umunyabwenge, kandi umunwa utuje wongera ubumenyi.

²² Abashyira mu gaciro bibabera isoko y’ubuzima, naho ubusazi ni cyo gihano cy’ubucucu.

²³ Umutima w’umunyabuhanga ubwiriza ururimi rwe, kandi umwungura ubwenge mu byo avuga.

²⁴ Amagambo yuje ubwuzu ni nk’umushongi w’ubuki, aryohera mu kanwa, kandi agakomeza amagufa.

²⁵ Hari inzira isa n’itunganiye umuntu, amaherezo ariko, ikaba iganisha ku rupfu.

²⁶ Ipfa ry’umukozi ni ryo rimutera ubwira, kuko akanwa ke kaba kamwaka ubutitsa.

²⁷ Umuntu w’ikigwari ateza ibyago, ururimi rwe rwotsa nk’umuriro.

²⁸ Umuntu w’umugome akurura amahane, kamenabanga agatanya incuti.

²⁹ Umunyarugomo ashuka mugenzi we, akamunyuza mu nzira idakwiye.

³⁰ Uwubika ingohe aba azirikana ubugome, naho urya iminwa aba yarangije guhemuka.

³¹ Uruyenzi rw’imvi ni ikamba ry’ikuzo, umuntu arigabanira mu nzira y’ubutungane.

³² Utihutira kurakara aruta intwari, kandi umuntu witsinda aruta uganza umugi.

³³ Umuntu asasa igishura akakijugunyaho amabuye y’ubufindo, nyamara Uhoraho ni we umuha igisubizo.