Imigani 15 - Kinyarwanda Bibiliya Ntagatifu

¹ Igisubizo cyiza gicubya uburakari, ariko ijambo risesereza rikabyutsa umujinya.

² Ururimi rw’abanyabuhanga rutuma barata ubumenyi, ariko umunwa w’abapfayongo ukasasa ubusazi bwabo.

³ Amaso y’Uhoraho areba hose, akagenzura ababi n’abeza.

⁴ Ururimi rugusha neza ni nk’igiti cy’ubuzima, naho ururimi rubi rukomeretsa umutima.

⁵ Umusazi yanga ko se amuhana, ariko uzi ubwenge yemera gucyahwa.

⁶ Mu nzu y’intungane habamo ubukungu bwinshi, ariko amahaho y’umunyabyaha atera ibyago.

⁷ Iminwa y’abanyabuhanga ikwirakwiza ubumenyi, ariko umutima w’abapfayongo ntugenza utyo.

⁸ Igitambo cy’abagiranabi gitera Uhoraho ishozi, ariko amasengesho y’intabera akamushimisha.

⁹ Uhoraho yanga imyifatire y’abagome, ariko agakunda abitangiye ubutungane.

¹⁰ Uta inzira abishaka, azahanwa bikomeye! kandi uwanga gucyahwa azapfa.

¹¹ Ibiri ikuzimu no mu nyenga ntibyihishe Uhoraho, yayoberwa ate rero ibiri mu mitima y’abantu!

¹² Umusekanyi ntakunda guhanwa, yirinda kwegera abanyabuhanga.

¹³ Ufite umutima wishimye, acya mu maso, naho umutima ushavuye utera kwiheba.

¹⁴ Umutima w’umunyabwenge ushakashaka ubumenyi, naho umunwa w’abapfayongo uhazwa n’ubusazi.

¹⁵ Umutindi ahora mu minsi mibi, naho uwishimye ku mutima agahora mu birori.

¹⁶ Uduke turimo gutinya Uhoraho, turuta ibyinshi birimo impagarara.

¹⁷ Igaburo ry’imboga ririmo urukundo, riruta iry’inyama z’ikimasa riherekejwe n’urwango.

¹⁸ Ugira umujinya hafi akurura amahane, naho utarakara vuba ahosha intonganya.

¹⁹ Inzira y’umunebwe ni nk’uruzitiro rw’amahwa, naho iy’abanyamwete ni umuhanda nyabagendwa.

²⁰ Umwana witonda ashimisha se, naho umupfayongo asuzugura nyina.

²¹ Ubusazi bwizihira abatagira umutima, naho umunyabwenge aboneza inzira itunganye.

²² Aho inama itari, imigambi ntihama, abajyanama benshi batera gutsinda.

²³ Umuntu ashimishwa n’igisubizo cyiza kimuvuye mu kanwa, kandi ijambo rivugiwe igihe ni ryo rinyura.

²⁴ Umunyabwenge akurikira inzira y’ubuzima imuzamura, bityo akirinda umumanura ikuzimu.

²⁵ Uhoraho asenya urugo rw’abirasi, ariko agakomeza urubibi rw’umupfakazi.

²⁶ Ibitekerezo by’ubugome bitera ishozi Uhoraho, naho amagambo y’urukundo aba akeye.

²⁷ Ugabanye ibyibano ahangayikisha urugo rwe, naho uwanga ruswa azabaho.

²⁸ Umutima w’intungane uzirikana icyo uri busubize, naho umunwa w’abagiranabi uvundereza ubugome.

²⁹ Uhoraho yitaza abagiranabi, ariko akumva isengesho ry’intungane.

³⁰ Indoro nziza inezeza umutima, inkuru nziza ikongera imbaraga.

³¹ Utega amatwi inama z’ubuzima, akwiye kubana n’abanyabuhanga.

³² Uwanga gukosorwa aba yisuzuguye ubwe, naho uwemera gucyahwa yunguka ubwenge.

³³ Gutinya Uhoraho ni ko kwitoza ubuhanga, kandi mbere yo gushaka ikuzo, ni ngombwa kwiyoroshya.