Imigani 14 - Kinyarwanda Bibiliya Ntagatifu

¹ Ubuhanga bwiyubakira urugo rwabwo, naho ubusazi bukisenyera.

² Ugenda mu nzira igororotse aba yubashye Uhoraho, naho unyura mu y’uburyarya aba amusuzuguye.

³ Umunwa w’igicucu ni indiri y’ubwirasi, naho uw’umunyabuhanga ni wo umurinda.

⁴ Ahatari ibimasa bihinga ibigega biba birimo ubusa, naho imfizi ifite imbaraga ituma umusaruro wiyongera.

⁵ Umugabo w’indahemuka ntabeshya, ariko uw’umuhemu ahorana ikinyoma.

⁶ Umusekanyi ashakashaka ubuhanga, ntabugeraho, ariko kugera ku bumenyi, byorohera umunyabwenge.

⁷ Uzagendere kure umuntu w’igicucu, kuko nta jambo ry’ubwenge uzamukuraho.

⁸ Ubuhanga bw’umuntu ujijutse, ni ugushishoza inzira ye, ariko ubusazi bw’ibicucu buba mu binyoma byabo.

⁹ Amahema y’abapfayongo ni indiri y’icyaha, ariko inzu y’intabera irangwamo ubugiraneza.

¹⁰ Umutima ni wo umenya akababaro kawo, mbese nk’uko nta we ushobora gufatanya na wo ibyishimo.

¹¹ Inzu y’abagome izasenywa, naho ihema ry’intabera rizashimangirwa.

¹² Hari inzira isa n’itunganiye umuntu, amaherezo ariko, ikaba iganisha ku rupfu.

¹³ Ndetse no mu byishimo, umutima wakuramo ishavu, kandi amaherezo y’ibitwenge ni ugushavura.

¹⁴ Umuntu ufite umutima wahabye anyurwa n’imyifatire ye, naho umugiraneza akanezezwa n’ibikorwa bye.

¹⁵ Igihubutsi cyemera ikivuzwe cyose, ariko uzi ubwenge yitondera aho anyura.

¹⁶ Umunyabuhanga atinya ikibi kandi akagihunga, naho igicucu kirirakaza kandi kikiyemera.

¹⁷ Ugira umujinya hafi akora amarorerwa, n’umunyamayeri ariyangisha.

¹⁸ Umugabane w’ibihubutsi ni ubusazi, naho abazi ubwenge batamiriza ikamba ry’ubumenyi.

¹⁹ Ababi bunamira abeza, abagome bagapfukama imbere y’imiryango y’intungane.

²⁰ Umukene yangwa na bose, ndetse n’umuturanyi we, ariko incuti z’umukire ntizibarika.

²¹ Usuzuguye mugenzi we aba acumuye, kandi hahirwa ugirira impuhwe abakene.

²² Ese abagenda bakwiza ikibi, ntibaba bayoba? Abagamije icyiza bo barangwa n’ubudahemuka n’umurava.

²³ Umurimo wose ugira icyo wungura, ariko amazimwe akurura ubutindi.

²⁴ Ikamba ry’abanyabuhanga ni ukumenya gushishoza, naho iby’abapfayongo ni ubusazi bwabo.

²⁵ Utanzweho umugabo akavuga ukuri, akiza imbaga, naho ubeshye, aba yaritswemo n’ikinyoma.

²⁶ Utinya Uhoraho aba abonye ubuhungiro bukomeye, kuko adahwema kurinda abana be.

²⁷ Gutinya Uhoraho ni isoko y’ubuzima, bikanarinda imitego y’urupfu.

²⁸ Imbaga nyinshi ihesha umwami ikuzo, iyo yabuze abo atwara, na we aba yarimbutse.

²⁹ Utagira umujinya hafi aba ari umunyabwenge, naho urakara vuba yasasa ubusazi bwe.

³⁰ Umutima utuje unogera umubiri, naho ishyari ni imungu mu magufa.

³¹ Ukandamiza utishoboye aba atutse Iyamuremye, naho ugirira impuhwe umukene aba ayubashye.

³² Umugiranabi abirindurwa n’uburyarya bwe, naho intungane igakizwa n’umurava wayo.

³³ Ubuhanga buba mu mutima w’umunyabwenge, naho mu bapfayongo, ni nde wahabusanga?

³⁴ Ubutungane butuma igihugu gisagamba, naho icyaha gikoza isoni amahanga yose.

³⁵ Umwami atonesha umugaragu w’umutima, ariko akarakarira utagira isoni.