Imigani 13 - Kinyarwanda Bibiliya Ntagatifu

¹ Umwana uzi ubwenge akunda guhugurwa na se, ariko umusekanyi ntiyemera guhanwa.

² Ibyiza bitunga umuntu abikomora ku munwa we, ariko umutima w’abagambanyi uhazwa n’urugomo.

³ Uhana umunwa we aba arinze ubuzima bwe, naho usukagura amagambo azarohama.

⁴ Umunebwe agira irari rikamupfana ubusa, ariko icyo abanyamwete bifuje bakigeraho.

⁵ Intungane yangana n’ikinyoma, ariko umugiranabi aragayisha, agakoza isoni.

⁶ Ubutungane burinda umunyamurava, ariko icyaha kigatera abagiranabi korama.

⁷ Hari abigira abakire kandi ari abatindi, abandi bakigira abakene, kandi batunze ibya mirenge.

⁸ Incungu y’ubuzima bw’umuntu ni umutungo we, ariko umukene nta cyo akangishwa.

⁹ Urumuri rw’intungane rutera ibyishimo, ariko itara ry’abagiranabi rizazima.

¹⁰ Ubwirasi bukurura amahane, ariko ubuhanga buhorana abemera kugirwa inama.

¹¹ Ubukire buje bugubugu burayoyoka, ariko ubwo umuntu yitondeye bukiyongera.

¹² Iyo umutima utabonye icyo wifuza urarwara, wakibona, kikawubera nk’igiti cy’ubuzima.

¹³ Uhinyura inama azayoba, naho ukurikiza amabwiriza azahembwa.

¹⁴ Inyigisho y’umunyabuhanga ni isoko y’ubuzima, itoza kwirinda imitego y’urupfu.

¹⁵ Gushyira mu gaciro bitera igikundiro, ariko inzira y’abagambanyi irabaroha.

¹⁶ Umunyabwenge akora abanje gutekereza, naho umupfayongo akasasa ubusazi bwe.

¹⁷ Intumwa mbi igusha mu makuba, naho iy’indahemuka irakiza.

¹⁸ Uwanga guhugurwa bimutera ubukene akamwara, ariko uwemera guhanwa azakuzwa.

¹⁹ Umutima unezezwa no kuronka icyo wifuza, abapfayongo baterwa ishozi no kureka ikibi!

²⁰ Nugendana n’umunyabuhanga nawe uzaba we, ariko ubana n’abapfayongo, ahinduka mubi.

²¹ Ibyago bikurikirana abanyabyaha, ariko ihirwe rikaba igihembo cy’intungane.

²² Umuntu w’umunyamutima asigira abuzukuru be umurage, ariko umutungo w’umunyabyaha uzahabwa intungane.

²³ Imirima y’abakene irumbuka imyaka myinshi, ariko hariho abapfa bazize ubuhendanyi.

²⁴ Urinda umwana we inkoni, aba amwanga, naho umukunda, ntatinda kumuhana.

²⁵ Intungane irarya igahaga, ariko inda y’abagiranabi ihorana icyena.