Imigani 11 - Kinyarwanda Bibiliya Ntagatifu

¹ Uhoraho azirana n’iminzani ibeshya, ariko akunda ibipimo by’ukuri.

² Ubwirasi buhamagara ikimwaro, ariko abiyoroshya bahorana ubuhanga.

³ Umurava w’abantu b’intabera ni wo ubayobora, ariko ubugome bw’abagambanyi ni bwo bubarimbura.

⁴ Umunsi w’urubanza nuza, ubukire nta cyo buzaba bukimaze, ariko ubutungane bwo bukiza ingoyi y’urupfu.

⁵ Ubutungane bw’umuntu w’indakemwa bumuringaniriza inzira, ariko umugiranabi yicwa n’ubugome bwe.

⁶ Ubutungane bw’abantu b’intabera burabakiza, naho abagambanyi bagafatwa n’irari ryabo.

⁷ Iyo umugiranabi apfuye, amizero ye aba ashize, n’ubukungu yishingikirizagaho, nta cyo buba bukimumariye.

⁸ Intungane irokorwa mu makuba, umugiranabi akayagwamo mu cyimbo cyayo.

⁹ Umunwa w’umugome urimbura mugenzi we, naho intungane zikarokorwa n’ubumenyi bwazo.

¹⁰ Iyo intungane zinezerewe, umugi wose urishima, iyo abagiranabi barimbutse, impundu ziravuga.

¹¹ Umugisha w’abantu b’intabera wubaka umugi, naho umunwa w’abagiranabi ukawusenya.

¹² Usuzugura mugenzi we, aba ari imburabwenge, ariko umuntu uzi ubwenge aricecekera.

¹³ Nyir’ugusebanya amena amabanga, utari inzimuzi ahishira byinshi.

¹⁴ Imbaga itagira umutware, irorama, naho umukiro uturuka ku bajyanama benshi.

¹⁵ Uwishingira abandi yikururira ibyago, ariko uwirinda kubemararira agira amahoro.

¹⁶ Umugore ugwa neza ahabwa ikuzo, abantu b’abanyamwete bakaronka ubukungu.

¹⁷ Umuntu w’umunyampuhwe yigirira neza ubwe, naho umunyamwaga ababaza umubiri we.

¹⁸ Umugiranabi aronka inyungu idafashe, naho ubiba ubutungane agahabwa igihembo gishyitse.

¹⁹ Ukomera ku butungane aba agana ubuzima, uwoma mu nyuma y’ikibi agasanga urupfu.

²⁰ Imitima y’uburyarya itera ishozi Uhoraho, ab’umutima uboneye akabatonesha.

²¹ Nta kabuza umugiranabi azahanwa, ariko abakomoka ku ntungane bazakizwa.

²² Umugore w’uburanga ariko utagira ubwenge, ni nk’impeta ya zahabu ikwikiye ku kizuru cy’ingurube.

²³ Intungane zihora zishaka icyiza gusa, naho abagiranabi bikururira uburakari.

²⁴ Hariho abatanga batitangiriye itama, bakongererwa, hari n’abagundira ibintu bagakabya, bagatindahara.

²⁵ Umutima ugira ubuntu uzatengamara, uwicira inyota abandi, na we azayikizwa.

²⁶ Uwimana ingano, rubanda baramuvuma, ariko uzigurisha bamwifuriza umugisha.

²⁷ Ushaka icyiza azatoneshwa, naho ugambiriye ikibi, kizamwokama.

²⁸ Uwiringira ubukire bwe, azarimbuka, naho intungane zizasagamba nk’amababi atoshye.

²⁹ Utera impagarara mu rugo rwe, bizamuviramo umuyaga, kandi umusazi azagaragira umunyamutima.

³⁰ Imbuto y’intungane ni nk’igiti cy’ubuzima, naho abagiranabi bagakinduka.

³¹ Niba intungane ihabwa ibiyikwiye ikiri ku isi, hazacura iki ku bagome n’abanyabyaha?