Imigani 1 - Kinyarwanda Bibiliya Ntagatifu

¹ Imigani ya Salomoni, mwene Dawudi, umwami wa Israheli.

² Iyi migani igamije kwigisha ubuhanga n’ubumenyi, no gusobanura amagambo aboneye.

³ Igamije gutoza uburere nyakuri burangwa n’ubutabera, ubutungane n’umurava.

⁴ Ab’ibihubutsi ibaha kwitonda, abasore ikabaha kumenya no guhumuka.

⁶ Igamije kandi kungura ubwenge bwo gusobanukirwa n’imigani n’amarenga, ibiganiro by’abanyabuhanga hamwe n’inshoberamahanga zabo.

⁵ Umuhanga nayumva aziyungura ubumenyi, naho umunyabwenge abonereho uko ayobora abandi.

⁷ Gutinya Uhoraho ni ryo shingiro ry’ubumenyi, naho abasazi bahinyura ubuhanga n’uburere.

I. AKAMARO K’UBUHANGA Ni ngombwa kwirinda inama z’abagome

⁸ Mwana wanjye, ujye wumva inyigisho za so, kandi ntugahinyure icyo nyoko agutoza;

⁹ bizakubera nk’ikamba ry’ineza ku mutwe, cyangwa urunigi rwiza mu ijosi ryawe.

¹⁰ Mwana wanjye, abagome nibashaka kukoshya, uzange!

¹¹ Bazagushuka bati «Ngwino tureme igico, tumene amaraso, umwere tumugwe gitumo nta mpamvu;

¹² tuzamurigisa ari mutaraga nk’uzimiriye ikuzimu, agende wese nk’uwo bahambye!

¹³ Tuzaronka ibyiza by’amoko menshi, amazu yacu tuyuzuze iminyago.

¹⁴ Nawe uzagira uruhare rwawe, twese tuzasangire iryo yabo.»

¹⁵ Mwana wanjye, ntuzabakurikire, uzirinde guca mu mayira banyuzemo,

¹⁶ kuko bashingura intambwe bagamije ikibi, bakihutira kumena amaraso.

¹⁷ Ni byo, nta cyo bimaze gutega inyoni, kandi zose ziruzi umutego!

¹⁸ Ariko bo, barema ibico, nyamara amaraso bagambiriye kuzamena ni ayabo bwite kandi babe ari bo bafatirwa mu mutego wabo!

¹⁹ Nguko uko bigendekera umuntu wese urarikira iminyago: ageza n’aho yinyaga ubuzima bwe bwite.

Inama n’impanuro z’ubuhanga

²⁰ Ubuhanga buvugira ahagaragara, bugatera hejuru mu mayira yose;

²¹ ijwi ryabwo rikarenga hejuru y’andi yose, rigahamagarira hafi y’imiryango y’umugi, rigira riti

²² «Yemwe, mwa bihubutsi mwe, muzaba ibicucu kugeza ryari? Abapfayongo bazishimira guseka ubusa kugeza ryari? Naho se injiji zo zizanga ubwenge kugeza ryari?

²³ Nimugarukire amabwiriza yanjye! Dore, ngiye kubasakazaho umwuka wanjye, mbamenyeshe amagambo yanjye.

²⁴ Kubera ko nabahamagaye mukananira, nkabahereza ikiganza ntihagire n’umwe ucyitaho,

²⁵ mukamaganira kure inama zanjye kandi mukanga amabwiriza yanjye,

²⁶ nanjye rero nzabashungera amakuba nabagwirira. Koko, nzabaseka igihe icyago kizaba cyabugarije;

²⁷ cyabateye nk’inkubi y’umuyaga, amakuba yabayogoje nka serwakira, agahinda n’ishavu bibashengura.

²⁸ Ubwo nyine bazampamagara, ariko sinzitaba; bazanshakashaka ariko ntibazambona.

²⁹ Kubera ko banze kujijuka, ntibahitemo gutinya Uhoraho,

³⁰ bakanga inama zanjye, kandi bagasuzugura amabwiriza yanjye,

³¹ ni cyo gituma bazarya imbuto z’ingeso zabo, bagahazwa n’imigambi yabo mibi.

³² Ab’ibihubutsi bazira kutumva inama, kandi bakicwa no kwishongora.

³³ Ariko untega amatwi, agira amahoro, akaba mu ituze kure y’impungenge z’icyago.»