Ibyakozwe 25 - Kinyarwanda Bibiliya Ntagatifu

Pawulo ajuririra Kayizari

¹ Nyuma y’iminsi itatu Fesito ageze muri ako karere, ava i Kayizareya ajya i Yeruzalemu.

² Abatware b’abaherezabitambo n’abanyacyubahiro bo mu Bayahudi bamusanganiza ibirego barega Pawulo; bamwinginga

³ bamusaba kubagirira ubuntu ngo amutumize aze i Yeruzalemu, kuko bari baciye ibico byo kumwubikira ngo bamutsinde mu nzira.

⁴ Nuko Fesito abasubiza ko Pawulo afungiye i Kayizareya, kandi ko na we ubwe agomba gusubirayo bidatinze.

⁵ Arongera ati «Kandi ababa babishoboye muri mwe, baze tujyane i Kayizareya, barege uwo muntu niba hari ikibi yakoze!»

⁶ Fesito amara iwabo iminsi itarenze umunani cyangwa icumi, asubira i Kayizareya. Bukeye ajya mu rukiko, maze ategeka ko bazana Pawulo.

⁷ Bamugejeje aho, Abayahudi bamanutse i Yeruzalemu baramukikiza, batangira kumurega byinshi kandi bikomeye, badashobora no kubonera gihamya.

⁸ Nuko Pawulo ariregura ati «Nta kosa nigeze nkora, haba ku Mategeko y’Abayahudi, haba ku Ngoro cyangwa se kuri Kayizari.»

⁹ Ariko Fesito ashatse kwikundisha ku Bayahudi, abaza Pawulo ati «Mbese uremera kujya i Yeruzalemu kugira ngo abe ariho ucirirwa urubanza mu maso yanjye?»

¹⁰ Pawulo arasubiza ati «Dore ndi mu rukiko rwa Kayizari, ni ho ngomba gucirirwa urubanza. Nta kibi nakoreye Abayahudi nk’uko nawe ubizi neza.

¹¹ Niba koko ibyo bimpama, cyangwa se niba narakoze icyaha gikwiriye urupfu, sinanga gupfa. Ariko niba ibirego aba bantu bandega nta kuri kurimo, nta muntu ufite uburenganzira bwo kubangabiza. Njuririye Kayizari!»

¹² Nuko Fesito amaze kuvugana n’abajyanama be, arasubiza ati «Ubwo ujuririye Kayizari, uzajye kwa Kayizari.»

Pawulo imbere y’umwami Agripa

¹³ Hashize iminsi mike, umwami Agripa na Berenisa bagera i Kayizareya, baje gusura Fesito.

¹⁴ Bahamaze igihe, Fesito atekerereza umwami ibya Pawulo, agira ati «Hano hari umuntu Feligisi yasize mu buroko.

¹⁵ Igihe nari i Yeruzalemu, abatware b’abaherezabitambo n’abakuru b’Abayahudi baramundegera, bansaba ko yakwicwa.

¹⁶ Mbasubiza ko atari akamenyero ku Banyaroma gucira umuntu urubanza, nta we uhingutse ngo amushinje na we abone umwanya wo kwiregura, ngo yiyezeho icyaha.

¹⁷ Ubwo rero baje hano, nanjye sinazarira, bukeye nicara mu rukiko mpamagaza uwo muntu.

¹⁸ Abamuregaga baramukikiza, ariko ntibagira ikirego gikomeye na kimwe bahingutsa mu byo nakekaga.

¹⁹ Ahubwo bafite ibyo bapfa byerekeye idini yabo, ariko ku buryo bw’umwihariko bagapfa umuntu witwa Yezu wapfuye, nyamara Pawulo akaba yemeza ko ari muzima.

²⁰ Mbonye ko ntashobora gukemura ibyo bibazo byabo, mbaza Pawulo niba yemera kujya i Yeruzalemu, ngo abe ari ho acirirwa urubanza ku byo bamuregaga.

²¹ Ariko Pawulo arajurira, ashaka ko urubanza rwe rwarangizwa na Nyir’icyubahiro; ubwo nanjye ntegeka ko bamurinda kugeza igihe nzamwohereza kwa Kayizari.»

²² Agripa ni ko kubwira Fesito ati «Nanjye ndashaka kumva uwo muntu!» Undi aramusubiza ati «Ejo uzamwumva.»

²³ Nuko bukeye, Agripa na Berenisa binjirana ishema mu rukiko, bashagawe n’abagaba b’ingabo hamwe n’abanyacyubahiro bo muri uwo mugi, maze Fesito ategeka ko bazana Pawulo.

²⁴ Fesito afata ijambo, agira ati «Mwami Agripa, namwe mwese abateraniye hano, murabona uyu muntu. Imbaga yose y’Abayahudi yaje kumundegera i Yeruzalemu, ndetse na n’ubu baracyasakuza, bavuga ko adakwiye kubaho.

²⁵ Jye nasanze nta cyo yakoze cyatuma akwiye gupfa. Nyamara kuko we yajuririye Nyir’icyubahiro, niyemeza kumumwoherereza.

²⁶ Icyakora, nta kintu na kimwe cy’ukuri nabonye naheraho nandikira Kayizari ku bimwerekeyeho. Ni cyo gitumye muzana imbere yanyu, cyane cyane wowe, mwami Agripa, kugira ngo nimumara kumubaza mbonereho kugira icyo nandika.

²⁷ Kuko nasanze bidafututse kohereza imfungwa, ntagaragaje neza icyo iregwa.»