Ibyakozwe 2 - Kinyarwanda Bibiliya Ntagatifu

Roho Mutagatifu amanukira ku Ntumwa

¹ Umunsi wa Pentekositi uragera, bose bakaba bakoraniye hamwe.

² Ako kanya, umuriri umeze nk’inkubi y’umuyaga uva mu ijuru, maze wuzura mu nzu bari barimo.

³ Nuko haboneka indimi zisa n’iz’umuriro, zigabanya zijya kuri buri muntu muri bo.

⁴ Ubwo bose buzuramo Roho Mutagatifu, batangira kuvuga mu zindi ndimi, uko Roho abahaye kuzivuga.

⁵ Aho rero i Yeruzalemu habaga Abayahudi bubaha Imana, bari baraturutse mu mahanga yose ari mu nsi y’ijuru.

⁶ Ngo bumve urwo rusaku, rubanda rwose barakorana maze barumirwa, kuko buri wese yabumvaga bavuga mu rurimi rwe bwite.

⁷ Barashoberwa, batangara bavuga bati «Mbese aba bose bavuga si Abanyagalileya?

⁸ Bishoboka bite se ko buri muntu muri twe abumva bavuga mu rurimi rwe kavukire?

⁹ Baba Abapariti, Abamedi n’Abelamu, baba abatuye muri Mezopotamiya, muri Yudeya no muri Kapadosiya, muri Ponti no muri Aziya,

¹⁰ muri Furujiya no muri Pamfiliya, mu Misiri no mu turere twa Libiya duhereranye na Sireni, baba abashyitsi baturutse i Roma,

¹¹ Abayahudi kavukire n’abayoboke b’idini yabo, Abanyakireta n’Abarabu, twese turabumva bamamaza mu ndimi zacu bwite ibitangaza by’Imana.»

¹² Bose bari bumiwe, bagatangara babazanya bati «Ibi birashaka kuvuga iki?»

¹³ Ariko hakaba n’abandi babakwena, bagira bati «Aba bantu basinze divayi nshyashya!»

Inyigisho ya Petero

¹⁴ Nuko Petero ahagararanye na ba Cumi n’umwe, arangurura ijwi agira ati «Bantu bo muri Yudeya, namwe mwese abatuye i Yeruzalemu, nimumenye neza ibi ngibi kandi mutege amatwi amagambo yanjye.

¹⁵ Aba bantu ntibanyoye nk’uko mubitekereza, kuko hakiri ku isaha ya gatatu y’igitondo;

¹⁶ ahubwo ibi mureba ni ibyavuzwe n’umuhanuzi Yoweli, ati

¹⁷ ’Mu minsi ya nyuma, — uwo ari Nyagasani ubivuga —, nzasendereza Umwuka wanjye ku cyitwa ikiremwa cyose. Abahungu banyu n’abakobwa banyu bazahanure, urubyiruko rwanyu ruzabonekerwe n’abasaza banyu bazabonere mu nzozi.

¹⁸ Koko muri iyo minsi, abagaragu banjye n’abaja banjye, nzabasenderezamo Umwuka wanjye maze bahanure.

¹⁹ Nzakora ibintu bitangaje hejuru mu kirere, n’ibimenyetso bikomeye hasi ku isi: hazaboneka amaraso, umuriro n’inkingi y’umwotsi.

²⁰ Izuba rizijima n’ukwezi guhinduke amaraso, mbere y’uko haza Umunsi wa Nyagasani, Umunsi ukomeye kandi w’ikuzo.

²¹ Ubwo rero umuntu wese uziyambaza izina rya Nyagasani, azakizwa.’

²² Yemwe Bayisraheli, nimutege amatwi amagambo yanjye: Yezu w’i Nazareti, uwo muntu Imana yemeje muri mwe, imukoresha ibitangaza, ibikorwa n’ibimenyetso bikomeye rwagati muri mwe, nk’uko mubizi ubwanyu,

²³ uwo muntu rero, bikurikije umugambi udakuka w’Imana, amaze gutangwa, mwaramwishe mumubambisha ku musaraba amaboko y’abagome.

²⁴ Ariko Imana yaramuzuye, imubohora ku ngoyi z’urupfu kuko bitashobokaga ko rumuherana.

²⁵ Koko kandi, Dawudi yavuze ibimwerekeyeho ati ’Narebaga Nyagasani imbere yanjye ubudahwema, kuko ari iburyo bwanjye kugira ngo ntadandabirana.

²⁶ Ni cyo gituma umutima wanjye uri mu byishimo, n’ururimi rwanjye rukaba runezerewe, byongeye kandi nzaruhukana icyizere,

²⁷ kuko utazatererana ubugingo bwanjye mu kuzimu, kandi ntuzatume intungane yawe imenyana n’ubushanguke.

²⁸ Wamenyesheje inzira zigana mu bugingo, unyuzuzamo ibyishimo unyereka uruhanga rwawe.’

²⁹ Bavandimwe, nta cyambuza kubabwira nta shiti ko umukurambere wacu Dawudi yapfuye, ko yahambwe ndetse n’imva ye ikaba ikiri iwacu kugeza uyu munsi.

³⁰ Nyamara, kuba yari umuhanuzi kandi yazirikanaga ko Imana yamusezeranyishije indahiro kuzicaza ku ntebe ye y’ubwami uwo mu bamukomokaho,

³¹ yabonye atyo mbere y’igihe iby’izuka rya Kristu, maze amuvugaho ati ’Ntiyatereranywe ikuzimu kandi umubiri we ntiwigeze umenyana n’ubushanguke.’

³² Yezu uwo rero Imana yaramuzuye, twese turi abahamya babyo.

³³ Aho amariye gukuzwa n’ububasha bw’Imana, no guhabwa na Se Roho Mutagatifu wasezeranywe, amusendereza mu bantu nk’uko mubibona kandi mubyumva.

³⁴ Dawudi we n’ubwo atazamutse mu ijuru, nyamara yaravuze ati ’Nyagasani yabwiye Umutegetsi wanjye ati: Icara iburyo bwanjye,

³⁵ kugeza ko abanzi bawe, mbagira akabaho ukandagizaho ibirenge byawe.’

³⁶ Nuko rero, inzu yose ya Israheli nimenye idashidikanya ko uwo Yezu mwabambye, Imana yamugize Umutegetsi n’Umukiza.»

Abantu ibihumbi bitatu ba mbere bahindutse

³⁷ Ngo bumve ayo magambo barakangarana, babaza Petero n’izindi Ntumwa bati «Bavandimwe, dukore iki?»

³⁸ Petero arabasubiza ati «Nimwisubireho, buri muntu muri mwe abatizwe mu izina rya Yezu Kristu kugira ngo ababarirwe ibyaha bye, kandi muhabwe ingabire ya Roho Mutagatifu.

³⁹ Kuko Isezerano ari mwe ryagenewe kimwe n’abana banyu, ndetse n’abari kure bose, n’abandi batabarika uko Nyagasani Imana yacu azabihamagarira.»

⁴⁰ Ababwira n’andi magambo menshi yo kubemeza no kubakomeza, agira ati «Nimwirokore, mwitandukanye n’aba bantu bayobye.»

⁴¹ Nuko abemeye izo nyigisho barabatizwa, uwo munsi biyongeraho abantu bagera ku bihumbi bitatu.

Imibereho y’abakristu ba mbere

⁴² Bahoraga bashishikariye kumva inyigisho z’Intumwa, gushyira hamwe kivandimwe, kumanyurira hamwe umugati no gusenga.

⁴³ Abantu bose bagiraga ubwoba kubera ibitangaza n’ibimenyetso bikomeye byakorwaga n’Intumwa.

⁴⁴ Abemera bose bari bashyize hamwe, n’ibyo batunze byose bakabigira rusange.

⁴⁵ Bagurishaga amasambu yabo n’ibintu byabo, bose bakagabana ikiguzi cyabyo bakurikije ibyo buri muntu akeneye.

⁴⁶ Iminsi yose bashishikariraga kujya mu Ngoro y’Imana bashyize hamwe, bakamanyurira umugati imuhira, bagasangira mu byishimo no mu bwiyoroshye bw’umutima.

⁴⁷ Basingizaga Imana kandi bagashimwa n’abantu bose; nuko Nyagasani akagwiza uko bukeye umubare w’abacunguwe.