Ibyahisuwe 8 - Kinyarwanda Bibiliya Ntagatifu

Ikashe ya karindwi n’icyotezo cya zahabu

¹ Igihe ahambuye ikashe ya karindwi, mu ijuru haratuza bimara nk’igice cy’isaha . . .

² Nuko mbona abamalayika barindwi bahagaze imbere y’Imana; bahabwa uturumbeti turindwi.

³ Undi mumalayika araza, ahagarara iruhande rw’urutambiro, afite icyotero cya zahabu, maze ahabwa imibavu myinshi kugira ngo ayiture hamwe n’amasengesho y’abatagatifu bose, ku rutambiro rwa zahabu ruri imbere y’intebe y’ubwami.

⁴ Umwotsi w’imibavu wacumbekeraga mu kiganza cy’uwo mumalayika, uzamuka imbere y’Imana, hamwe n’amasengesho y’abatagatifu.

⁵ Nuko umumalayika afata icyotezo, acyuzuzamo umuriro arahuye ku rutambiro, maze awumena ku isi: ubwo haba imihindagano nk’iy’inkuba, urusaku, imirabyo n’umutingito w’isi.

Uturumbeti dutandatu twa mbere

⁶ Noneho ba bamalayika barindwi bari bafite uturumbeti turindwi bitegura kutuvuza.

⁷ Uwa mbere ngo avuze akarumbeti ke: urubura n’umuriro uvanze n’amaraso bigwa ku isi, maze igice cya gatatu cy’isi kirashya, n’igice cya gatatu cy’ibiti kirashya, n’ibimera byose birakongoka.

⁸ Umumalayika wa kabiri na we avuza akarumbeti ke: nuko ikintu kimeze nk’umusozi munini ugurumana kiroha mu nyanja, maze igice cya gatatu cy’inyanja gihinduka amaraso;

⁹ igice cya gatatu cy’ibiremwa biba mu nyanja kirapfa, n’igice cya gatatu cy’amato kirasenyuka.

¹⁰ Hanyuma umumalayika wa gatatu avuza akarumbeti ke: nuko inyenyeri nini cyane ihanantuka mu ijuru igurumana nk’ifumba y’umuriro, igwira igice cya gatatu cy’inzuzi no ku masoko y’amazi.

¹¹ Iyo nyenyeri yitwaga «Ndurwe». Nuko igice cya gatatu cy’amazi gihinduka indurwe, kandi abantu benshi barapfa kubera amazi yari yakarishye.

¹² Umumalayika wa kane na we avuza akarumbeti ke: nuko igice cya gatatu cy’izuba, igice cya gatatu cy’ukwezi, n’igice cya gatatu cy’inyenyeri birakobana; kimwe cya gatatu cyabyo kirijima, ku buryo amanywa yatakaje igice cya gatatu cy’umucyo n’ijoro bikaba bityo.

¹³ Nuko ndebye, numva ijwi rya kagoma yatambaga hejuru cyane mu kirere risakuza riti «Mwiyimbire! Mwiyimbire! Mwiyimbire abatuye isi, ku mpamvu y’umworomo w’uturumbeti tw’abamalayika batatu bagomba kongera kuvuza!»