Ibyahisuwe 16 - Kinyarwanda Bibiliya Ntagatifu

Inkongoro ndwi

¹ Nuko numva ijwi riranguruye rituruka mu Ngoro, ribwira ba bamalayika barindwi, riti «Nimugende, maze mucubanurire ku isi izo nkongoro ndwi zuzuye uburakari bw’Imana.»

² Uwa mbere aragenda, acubanurira inkongoro ye ku isi. Nuko abantu bari bafite ikimenyetso cya cya Gikoko, n’abasenga ishusho yacyo, bafatwa n’ibisebe bibi by’umufunzo.

³ Uwa kabiri na we acubanurira inkongoro ye mu nyanja, maze ihinduka amaraso ameze nk’ay’umuntu wapfuye, n’ikinyabuzima cyose kiri mu nyanja kirapfa.

⁴ Umumalayika wa gatatu na we acubanurira inkongoro ye mu migezi no ku masoko y’amazi, maze ahinduka amaraso.

⁵ Nuko numva umumalayika utegeka amazi avuga ati «Uri intabera wowe Uriho kandi Uwahozeho Nyirubutagatifu, kuko wagaragaje utyo urubanza uciye,

⁶ maze ubwo bamennye amaraso y’abatagatifujwe n’ay’abahanuzi bawe, ukaba ubahaye na bo amaraso ngo bayanywe: bahawe rwose ikibakwiriye!

⁷ Hanyuma numva urutambiro ruvuga ruti «Ni byo koko, Nyagasani Mana, Mushobora byose, imanza uciye ziba zihuje n’ukuri n’ubutabera.»

⁸ Nuko umumalayika wa kane na we acubanurira inkongoro ye ku zuba, maze rihabwa ububasha bwo gutwika abantu.

⁹ Abantu rero batwikwa n’ubushyuhe bwinshi; ni ko gutuka izina ry’Imana itegeka ibyo byorezo, ariko ntibisubiraho ngo bajye bayisingiza.

¹⁰ Nuko umumalayika wa gatanu na we acubanurira inkongoro ye ku ntebe ya cya Gikoko, maze ingoma yacyo ihinduka umwijima, ububabare butera abantu kwikacanga indimi;

¹¹ ni ko gutuka Imana yo mu ijuru, kubera imibabaro yabo n’ibisebe byabo, ariko ntibisubiraho ngo bareke ibikorwa byabo.

¹² Nuko umumalayika wa gatandatu na we acubanurira inkongoro ye ku ruzi runini rwa Efurati; maze amazi yose arakama, kugira ngo haboneke inzira y’abami baturutse Iburasirazuba.

¹³ Nuko mbona roho mbi eshatu zimeze nk’imitubu, zisohoka mu kanwa ka cya Kiyoka, no mu kanwa ka cya Gikoko, no mu kanwa ka wa muhanurabinyoma.

¹⁴ Izo roho mbi ni za Sekibi zikora ibintu bitangaje, maze zigasanga abami bo ku isi yose, kugira ngo zibakoranyirize kurwanya umunsi ukomeye w’Imana Mushoborabyose.

¹⁵ «Ngaha ndaje nk’umujura! Hahirwa uba maso kandi agakomeza kwambara imyambaro ye, kugira ngo atagenda yambaye ubusa, maze rubanda bakabona ubwambure bwe.»

¹⁶ Nuko za roho mbi zikoranyiriza ba bami ahantu hitwa, mu gihebureyi, Harimagedoni.

¹⁷ Nuko umumalayika wa karindwi na we acubanurira inkongoro ye mu kirere, maze mu Ngoro, ku ntebe y’ubwami haturuka ijwi riranguruye, riravuga riti «Birarangiye!»

¹⁸ Nuko haba imirabyo, urusaku, imihindagano nk’iy’inkuba, n’umutingito w’isi ukaze cyane kuruta indi yose yigeze kubaho kuva aho umuntu agereye ku isi.

¹⁹ Umurwa w’icyamamare usadukamo ibice bitatu, n’imigi y’amahanga irariduka. Nuko Imana yibuka ityo Babiloni, wa murwa w’icyamamare, kugira ngo iwuhe ku nkongoro isendereye divayi y’uburakari bwayo.

²⁰ Nuko ibirwa byose birahunga n’imisozi yose irazimira;

²¹ urubura ruremereye nk’amatalenta rumanuka mu ijuru, rucocagura abantu, maze abantu batuka Imana babitewe n’icyo cyago cy’urubura, kuko icyo cyorezo ubwacyo cyari gikabije kuba kibi.