Ibyahisuwe 10 - Kinyarwanda Bibiliya Ntagatifu

Umumalayika amanukana agatabo kabumbuye

¹ Nuko mbona undi mumalayika w’igihangange wamanukaga mu ijuru. Yari yambaye igicu, umukororombya uzengurutse umutwe we, mu maso he habengerana nk’izuba, n’ibirenge bye bisa n’inkingi z’umuriro;

² yari afite mu ntoki ze agatabo kabumbuye. Nuko ashinga ikirenge cy’iburyo ku nyanja, icy’ibumoso agishinga ku isi,

³ maze atera hejuru mu ijwi riranguruye, atontoma nk’intare. Igihe ateye hejuru, inkuba ndwi zirahinda.

⁴ Izo nkuba ndwi zimaze guhinda, nanjye uko nakiteguye kwandika, numva ijwi riturutse mu ijuru, rimbwira riti «Ubutumwa bw’izo nkuba ndwi ubugire ibanga, ntubwandike.»

⁵ Hanyuma wa mumalayika nari nabonye ahagaze ku nyanja no ku isi, abangura ikiganza cye cy’iburyo akerekeje ku ijuru,

⁶ maze arahira mu izina ry’Uriho uko ibihe bizahora bisimburana iteka, Uwaremye ijuru n’ibiririmo byose, isi n’ibiyirimo byose, inyanja n’ibiyirimo byose, ati ’Nta gihe kizongera kubaho.’

⁷ Ahubwo umunsi bazumva umumalayika wa karindwi avugije akarumbeti ke, ni bwo ibanga ry’Imana rizaba rigeze ku ndunduro, nk’uko yabimenyesheje abagaragu be b’abahanuzi.»

⁸ Nuko rya jwi nari numvise rituruka mu ijuru, ryongera kumbwira riti «Genda ufate agatabo kabumbye, kari mu kiganza cy’umumalayika, uhagaze ku nyanja no ku isi.»

⁹ Nuko ndatambuka nsanga wa mumalayika, musaba kumpa ako gatabo. Arambwira ati «Kakire maze ukarye. Mu nda yawe karagusharirira, ariko mu kanwa kawe hararyohera nk’ubuki.»

¹⁰ Mpera ko rero mfata ako gatabo ngahawe n’uwo mumalayika, maze ndakarya. Mu kanwa kari karyohereye nk’ubuki, ariko maze kukamira, mu nda yanjye harasharirirwa.

¹¹ Nuko barambwira bati «Ni ngombwa ko wongera guhanurira ibihugu, amahanga, indimi, n’abami benshi.»