Hoseya 9 - Kinyarwanda Bibiliya Ntagatifu

Agahinda bazagirira mu bihugu bya kure

¹ Israheli, wikwishima birenze urugero, wisabagizwa n’ibyishimo nk’indi miryango, kuko wigize indaya witarura Imana yawe, ukishimira igihembo cyahumanye uherwa ku mbuga zose zihurirwaho ingano.

² Ibivuye ku mbuga no mu rwengero ntibizabahaza, na divayi nshyashya bari bategereje ntibazayibona.

³ Ntibazongera gutura mu gihugu cy’Uhoraho, kuko Efurayimu izasubira mu Misiri, bakazajya no muri Ashuru kurya ibyahumanye.

⁴ Ntibazongera kumurikira Uhoraho divayi ho ituro riseswa, n’ibitambo byabo ntibizamushimisha ukundi. Bizabamerera nk’umugati barya bari mu cyunamo, abazabiryaho bose bazabe bahumanye; uwo mugati ni bo uzatunga ubwabo, ariko ntuzinjizwa mu Ngoro y’Uhoraho.

⁵ Ubwo se muzakora iki ku munsi w’ikoraniro, ari wo munsi mukuru w’Uhoraho?

⁶ Dore ngabo bahunze igihugu cyabo cyarimbutse, Misiri izabakira, ariko i Memfisi hazabe imva yabo; ibintu byabo by’agaciro gakomeye bizarengwaho n’ibitovu, n’amahwa apfukirane ahari amahema yabo.

Umuhanuzi atangaza igihano bikamuviramo gutotezwa

⁷ Ngiyi iminsi y’igihano iregereje, igihe cyo kuryozwa kirageze; Israheli nibimenye! Bariyamiriye bati «Umuhanuzi ahindutse umusazi, uwuzuwemo n’umwuka w’Uhoraho aravugaguzwa!» — Ni byo koko, ariko bitewe n’ubwinshi bw’ibicumuro byawe, kandi amagorwa azakugwirira, arakomeye cyane!

⁸ Umuhanuzi uri kumwe n’Imana ye, ni we murinzi urengera Efurayimu; ariko baramutega imitego aho anyura hose, bakamutera no mu nzu y’Imana ye.

⁹ Barihumanyije bikabije, nko mu gihe cy’i Gibeya, ariko Imana izibuka ibicumuro byabo, ibaryoze ibyaha bakoze.

Igihano cy’ibicumuro by’i Behali‐Pewori

¹⁰ Kera nigeze kurabukwa Israheli, imeze nk’imbuto y’umuzabibu mu butayu, mbona n’abasekuruza banyu bameze nk’imbuto y’umutini ihishije mbere; ariko bakigera i Behali‐Pewori biyegurira Sesoni, bahinduka batyo amahano nk’ibyo byabararuye!

¹¹ Ni cyo gitumye ikuzo rya Efurayimu rigurutse nk’inyoni: nta we ukibyara, nta n’uzatwara inda cyangwa ngo hagire uyisama.

¹² Ndetse n’iyo babyirura abahungu, nababagomwa bataraba abagabo; ni koko, bazabona ishyano nimara kwitandukanya na bo!

¹³ Efurayimu ndabona imeze nka Tiri, yubatse ahantu hatohagiye, nyamara bazayihatira gutanga abana ngo bicwe!

¹⁴ Uhoraho, jya ubahana! Ariko se uzabahanisha iki? . . . Bahanishe kuba ingumba, n’amabere uyumishe!

Igihano cy’ibicumuro by’i Giligali

¹⁵ Ububi bwabo bwose bwigaragarije i Giligali, ari na ho nahereye nkabanga urunuka. Nzabirukana mu nzu yanjye, mbahoye ububi bw’ibikorwa byabo, sinzongera kubakunda ukundi, bo n’abatware babo b’abahemu.

¹⁶ Efurayimu yarafashwe none imizi yayo yarumagatanye, ntibazongera kwera imbuto ukundi. Ndetse nibanabyara, nzabagomwa ibyo byiza bibarutse.

¹⁷ Imana yanjye izabaca kuko batayumvise, maze bazajye kubuyera mu mahanga.