Hoseya 6 - Kinyarwanda Bibiliya Ntagatifu

Israheli igarukira Imana by’akanya gato

¹ Nuko muravuga muti «Nimuze tugarukire Uhoraho. Ni we wadukomerekeje kandi ni we uzatuvura, ni we wadukubise, azomora ibikomere byacu.

² Nyuma y’iminsi ibiri azaba yaduhembuye, ku munsi wa gatatu aduhagurutse, maze twibanire.

³ Nidushishikarire kumenya Uhoraho, nta shiti, azatunguka nk’umuseke ukebye, azatugeraho ameze nk’imvura yuhira imyaka, mbese nk’uko imvura y’umuhindo isomya ubutaka.»

⁴ — Yewe Efurayimu, nkugenze nte koko? Nawe Yuda, rwose nkugire nte? Urukundo rwanyu ni nk’igihu cya mu gitondo, cyangwa ikime cyumuka ako kanya.

⁵ Ni cyo gitumye rero mbahanisha abahanuzi, nkabicisha amagambo avuye mu kanwa kanjye, kandi urubanza rwanjye rukazabagwa gitumo nk’urumuri;

⁶ kuko nshimishwa n’urukundo kuruta ibitambo, no kumenya Imana bikandutira ibitambo bitwikwa.

Ibicumuro bya Israheli, ibya kera n’iby’ubu

⁷ Ariko bo bishe isezerano bakiri i Adama, ari na ho bampemukiriye.

⁸ Gilihadi yahindutse umugi w’abagiranabi, wahindanyijwe n’amaraso.

⁹ Uko abambuzi biremamo ibico, ni na ko agatsiko k’abaherezabitambo kicira abantu ku nzira y’i Sikemu! Ngayo amarorerwa bariho bakora!

¹⁰ I Beteli nahabonye ibintu biteye ubwoba: Efurayimu ni ho ikorera uburaya bwayo, na Israheli yose ikiyandavuza.

¹¹ Nawe rero Yuda, icyo nguteze kiri aho, igihe nzaba nibutse umuryango wanjye.