Hoseya 14 - Kinyarwanda Bibiliya Ntagatifu

¹ Samariya igomba guhanwa kuko yigometse ku Mana yayo. Bazarimburwa n’inkota, abana babo b’ibitambambuga bazicwe, abagore babo batwite babakuremo inda.

III. ISRAHELI YISUBIRAHO IKAGIRIRWA IMBABAZI Israheli izagarukira Uhoraho

² Israheli, garukira Uhoraho Imana yawe, kuko wayobejwe n’ibicumuro byawe.

³ Garukira Uhoraho, umubwire uti «Duhanagureho ibicumuro byose maze wakire ikiri cyiza. Aho kugutura ibimasa ho ibitambo, tuzakwegurira amagambo avuye mu kanwa kacu.

⁴ Ashuru ntizongera kudukiza ukundi, ntituzongera kugendera ku mafarasi, cyangwa ngo tubwire igikorwa cy’ibiganza byacu tuti ’Uri Imana yacu!’ kuko ari wowe impfubyi zikesha kugirirwa impuhwe!»

⁵ — Nzabakiza ubugambanyi bwabo, mbakunde mbikuye ku mutima, kandi sinzongera kubarakarira ukundi.

⁶ Israheli nzayimerera nk’ikime, irabye indabyo nk’iza lisi, kandi ishore imizi nk’ibiti byo muri Libani.

⁷ Imicwira yayo izasagamba, ubwiza bwayo bumere nk’ubw’umuzeti, n’impumuro yayo imere nk’iya Libani.

⁸ Bazagaruka bature mu gicucu cyanjye, bongere bashibuke nk’ingano, barabye indabyo nk’umuzabibu, kandi ube ikirangirire nka divayi yo muri Libani.

⁹ Efurayimu izavuga iti «Ndacyahuriye he n’ibigirwamana!» Ni koko ndayumva kandi nkayitaho, meze nk’umuzonobari utohagiye, ni jyewe ukesha umusaruro.

¹⁰ Ni nde muhanga ngo yumve ibyo bintu, cyangwa se umunyabwenge ngo abimenye? Inzira z’Uhoraho ziraboneye, zikagenderwamo n’intungane, naho abahemu bakaziteshuka.