Habakuki 3 - Kinyarwanda Bibiliya Ntagatifu

III. UHORAHO NABANGUKIRE GUTABARA

¹ Isengesho ry’umuhanuzi Habakuki, rimeze nk’amaganya.

² Uhoraho, numvise ibigwi byawe, birantangaza! Uhoraho, ongera ugenze utyo no muri iki gihe! Ibikorwa byawe bimenyekanye no mu minsi turimo; ariko mu burakari bwawe uribuke no kugira imbabazi!

³ Imana iturutse i Temani, Nyir’ubutagatifu aturutse ku musozi wa Parani. Ubwamamare bwe bwakwiriye ijuru, ibisingizo bye byuzura isi.

⁴ Ububengerane bwe burakirana nk’urumuri, imirasire nk’iy’izuba isohotse mu kiganza cye, ni na yo ububasha bwe bwihishemo.

⁵ Icyorezo kiragenda imbere ye, naho indwara iramukurikiye.

⁶ Arahagaze, isi ihinda umushyitsi, arebye, akangaranya amahanga. Imisozi yahozeho iratengagurika, utununga twa kera turarigita, izo ni zo nzira ze za kera!

⁷ Nabonye amahema y’i Kushani ari mu kaga, amazu yo mu gihugu cya Madiyani ahinda umushyitsi!

⁸ Uhoraho, waba se wararakariye inzuzi, cyangwa se umujinya wawuterwa n’inyanja, ku buryo ugendera ku mafarasi yawe, no ku magare y’indatsimburwa?

⁹ Umuheto wawe wawujishuye, injishi yawo uyihaza imyambi yica; isi yose wayisatagurishije imigezi.

¹⁰ Imisozi irakubona igahinda umushyitsi, amasumo y’amazi akadudubiza, ukuzimu kugatakamba, gushyize amaboko ejuru.

¹¹ Izuba n’ukwezi bihagaze mu mwanya wabyo, bihunga icyezezi cy’imyambi yawe iguruka, n’imirabyo y’icumu ryawe.

¹² Mu burakari bwawe uzenguruka isi, unyukanyuka amahanga n’umujinya wawe.

¹³ Wazanywe no gukiza umuryango wawe, unakiza uwo wisigiye amavuta y’ubutore. Wasambuye inzu y’umugome, urayisenya kugeza ku mfatiro zayo.

¹⁴ Wahinguranyije umugaba w’ingabo ze n’amacumu ye bwite, kandi bari bahuruye, bishimiye kudutatanya, bameze nk’abaremye igico, kugira ngo baconcomere umunyabyago.

¹⁵ Wavogereye inyanja n’amafarasi yawe, rwagati mu muvumba w’amazi menshi.

¹⁶ Narabyumvise maze nkuka umutima, iyo nkuru ituma iminwa yanjye ihinda umushyitsi, ingingo zanjye ziratatana, amaguru yanjye aradandabirana. Nyamara ntegereza nitonze uwo munsi w’amakuba, ugiye kugwirira ihanga ryadushikamiye!

¹⁷ Ni ukuri koko, umutini ntukirabya indabyo, imizabibu ntikigira imbuto, imizeti yarekeye aho kwera, imirima ntigitanga umusaruro, amatungo magufi yashize mu ngo, nta n’amatungo maremare akirangwa mu biraro.

¹⁸ Naho jyewe nzahora mu byishimo ku bw’Uhoraho, nzahimbarwe mbikesheje Imana yanjye!

¹⁹ Uhoraho ni Umutegetsi wanjye n’imbaraga zanjye, ibirenge byanjye abihindura nk’iby’imparakazi, akantambagiza mu mpinga z’imisozi! (Iyo ndirimbo igenewe umuririmbisha, icurangishwa inanga z’imirya.)